INYANGA YESIVUMELWANO – 2024
1-31 ZIBANDLELA 2024
INDIKIMBA: ABAMELI BAKAKRISTU (2 KWABASEKORINTE 5:20)
Click or tap on the day number of your choice to jump down the page to the notes for that day:
ISINGENISO
Sesigqibile umnyaka ka2023, silokhu sihamba njengebutho elilamandla. Umnyaka ka2023 wawehlukene leminye iminyaka yonke. Kwezombangazwe, ilizwe lenza ukhetho olwenza impumela yaletha imizwa etshiyeneyo sekusiya ngokuthi ukuliphi iqembu. Kuphakathi kwawo lumnyaka lapho intengo yempahla eziqakathekileyo yakhwela okwesabekayo okwenza imali yakuleli ilahlekelwe ngamandla lezikhwama zabanengi zingela lutho. Enhlalweni, kubelabantu abanengi abazibuleleyo kumbe ukubulalana ngoba bengasaboni ukuqakatheka kwempilo. Kuphakathi kwalomnyaka lapho ilizwe elibone ukugcwala kokusetshenziswa kwezidakamizwa kubatsha.
Lapha konke lokhu kusenzakala kuhlukuluza abantu bakaNkulunkulu, abanye bayalahlekelwa yikukholwa, bawe. Kusezikhathini ezinje lapho amaKristu sikhangelele elakusasa ngesibindi esikhulu sisazi ukuthi loba sisemhlabeni olobuhlungu thina singabadlulayo nje. Singabantu besivumelwano, siqalisa umnyaka ngokwenza isivumelwano loNkulunkulu lokuvuselela izivumelwano esingabonanga impumela yazo emnyakeni owedlulileyo. Njengabantu besivumelwano kutsho ukuthi kasisibo bantu nje. Ngakhoke lumnyaka ulomehluko kuleminye iminyaka, ulokuqakatheka kwawo. Sibizelwe ukukhunjuzwa ukuthi singobani njalo sihloseni. Singabameli ababizelwe ukumela umbuso kaNkulunkulu onganyikinyekiyo. Njengabameli sibizelwe ukuthunywa ukuthi abantu babuyisane loBaba uNkulunkulu.
Kungale injongo enze lolugwalo lwalotshwa ukuthi luncedise ukubayinsika yokulungiselela uhambo lwempilo loNkulunkulu. Izahluko zihlelwe ngendlela yokuthi thina njengabameli senelise ukuzihlola njalo sihlola lobizo lwethu lokwenza uKristu aziwe ngumhlaba wonke. Ngaphezu kwakho konke inyanga kaZibandlela ibayinsika yomnyaka wonke, njalo yiso isikhathi esenza izinqumo zokuthi sifisa ukwenzani phakathi komnyaka wonke. Isinqumo sinye ngasinye esisenzayo siphelekezelwa yinhlanyelo. Kutsho ukuthi yiso isikhathi lapho esiletha khona inhlanyelo yethu. Ngalokhoke lolugwalo lulungiswe ngendlela yokuncedisa ingqondo zethu ukwenza okufaneleyo, ngendlela efaneleyo, langesikhathi esifaneleyo njengalo iBhayibhili lisitsho ukuthi nxa umhlaba usesekhona ukuhlanyela lokuvuna kakuyikuphela (uGenesisi 8:22).
“Singabameli baka Kristu”. Abantu abathiwa ngamaMethodists kababe leNyanga yeSivumelwano elezithelo.
Revd. Dr. K. Paradza
(Mission Director)
ISIBONGO
Lolugwalo lweNyanga yeSivumelwano luqoqwe ndawonye ngu Revd. O. Chagudhuma labafowabo abeMarondera District, abahlanganisela uRevd. L. Panavanhu, Revd. C. Nunu Ndlovu, Revd. S. Gono, Revd. C. Maburutse, Revd. E. Tembo, Revd. N. Mutasa, Mr. S. Muradzikwa, Mr. Chuma and Mrs. Kusotera. Sithanda ukubabonga ngokuzinikela kwabo. Silesibongo esikhulu kubafowethu abasebenza nzima ukuguqulela ugwalo lolu ukuthi lutholakale kundimi ezithi isiShona, isiNdebele, isiTonga Kanye lesiKalanga. Ngakhoke lolugwalo lwaguqulelwa kusiNdebele ngo Ms Silibaziso Tshuma, Mrs Kutloei Lemu, Mr Mqoqi Ncube, Mrs Sithembile Ncube, Rev C Nunu Ndlovu, Bishop L K Rukarwa. UNkulunkulu ababusise kakhulukazi. Ekucineni sithanda ukubonga abeConnexional Bookshop abenze ukuthi ugwalo lolu lufike endaweni zonke ezitholakala khona amaMethodist, phakathi kwelizwe langaphandle.
UNkulunkulu makabusise abantu abathiwa ngamaMethodist.
Revd. O. Chagudhuma
(Research and Publications Coordinator)
USUKU LWAKUQALA
ISIHLOKO: ABAMELI BAKAKRISTU
ISIFUNDO: 2 KWABASEKORINTE 5:20
Ugwalo ku 2 KwabaseKorinte ngolunye lwencwadi zikaPawuli eziqotho owazibhala ekupheleni kweminyaka yakhe emibili kusiya kwemithathu yetshumayelo yakhe kwabase Efesu (Imisebenzi 19:8–10; 20:31). Imibhalo yaseBhayibhilini iyasitshengisa ukuthi ibandla laseKorinte lalilezinkinga ezisukela kumfundiso zamanga ngabafundisi ababekhokhela abantu bebasusa kulizwi likaJesu Kristu. Babeziqhenya ngamandla omuntu lokuphumelela ngokwenza izinto ezingela bukholwa, ukulandela ukholo ngokupheleleyo, njalo lokwehluleka ukuzwisisa insika zokholo. Impumela kwaba yikungazwani kwamaKristu lapho. UPawuli wathukwa njalo amandla akhe obupostoli achwayisiswa. Inkinga lezi zaqhubeka ziphambanisa ingqubela phambili yebandla laseKorinte, abanye baqala ukusuka kusiKristu sabo. Bekhangelane leziphepho lezi zemfundiso yezokholo, ibandla lalidinga kakhulu usekelo lukaPawuli.
Ephendula kundaba lezi, uPawuli kwakumele abhale echaze njalo emela ubupostoli bakhe lelizwi likaNkulunkulu. Indlela ayeyisebenzisa yayingasiyo yokulwa kodwa eyokubuyisana. Ekwenza lokhu ekhumbuza amakholwa eKorinte ukuthi ungubani yena, lokuthi bangobani bona njalo ebatshengisa umsebenzi okhangelane labo kulezo zikhathi, ukuthi bona bangabameli bakaKristu njengalokhu ayeyikho. Ummeli umela ilizwe lakhe kwelinye ilizwe. Lokhu kutsho ukuthi uPawuli ubona izizwe ezimbili ziphila empilweni yokholo lwamaKorinte.
Indaba ‘yobumeli’ ingaba yafika njani engqondweni kaPawuli lasendabeni zokholo lwakhe? UPawuli ubhala ekhangele indlela yombuso wamaRoma ayesebenza ngaleso isikhathi. Kumbuso wamaRoma kukhulu leminyaka yakuqala, kwakule ziqinti zezwe ezimbili, isiqinti somkhandlu lesiqinti samakhosi amanengi. Isiqinti somkhandlo sasilabantu ababethanda ukuthula njalo bengalwi leRoma babezehlisile, bethobela umbuso lababusayo. Kukanti isiqinti samakhosi sasithanda umsindo. Babesiba lomvukela kuRoma ngaso sonke isikhathi nxa bethole ithuba lokwenza njalo. Ngakho, ngendlela yokuletha ukuthula, iRoma yayithumela abameli kuziqinti zamakhosi ukuba lesiqiniseko sokuthi akubi lemivukela. Abameli labo babephila phakathi kwabantu bezama ukuletha uhlangothi oluhle ngeRoma kubantu beziqinti lezi. Ngokuzwisisana lokhu, uPawuli uletha umfanekiso lowo empilweni yebandla. Lokhu kungoba ibandla lalilezimo zeziqinti lakumpilo yabo yobukholwa. Ngenxa yempumela yemfundiso zamanga, abantu basebevukela uNkulunkulu. Ngokunjalo, amakholwa sethunywa njengabameli bakaKristu ukuze umvukela ungabi khona. Kumele bammele uKristu, bakhulumele uKristu, njalo basebenzele uKristu. Kumele benze umhlaba ukuthi ubuyisane lo Nkulunkulu.
Lalamhla umlayezo ofanayo usekhona phakhathi kwethu njengamakholwa eMethodist. Siphila emhlabeni ongalutho ukuthatheka ngemfundiso zamanga, njalo kwesinye isikhathi umhlaba osuthatheka ngempumela embi yobuchwephetshe (technology) lokunye okutshiyeneyo, isibonelo yindlela isayensi esithatha kancane kancane indawo yokholo. Laloba ithekinoloji ithuthukisa umhlaba, kwezinye indlela seyaba ngumjibila kukholo, isiyenza abantu ukuthi basuke kancane kancane kukholo lwesiKristu. Ngaphandle kwalokhu okuqanjwe lapha, umhlaba ugcwele ngobuyanga lokuswelakala kwemisenzi ngabatsha abafundileyo. Lokhu kutsho ukuthi impilo isile mibuzo eminengi. Amanga lezichazululo ezingela bukholwa ziyabekwa phambili kwabantu bakaNkulunkulu lapho bezama ukuthola incazelo yempilo emhlabeni ophicaphiceneyo. Kukulesi sibanga lapho amakholwa (ibandla) elikhunjuzwa khona ngobuyibo babo phakathi kwehlakahlaka esiphila kuyo. Bayathunywa ukuthi babe ngabameli bakaKristu. Sisukumela ukwenza umhlaba ubuyisane loNkulunkulu, njalo simise amathuba omvukela kuNkulunkulu.
Umcabango: Umbuso engiwumelayo mkhulu kulalowo okhula emhlabeni. UKristu kaziwe.
USUKU LWESIBILI
ISIHLOKO: ILUNGELO LIYADINGALAKA UKUBA NGUMMELI
ISIFUNDO: IMISEBENZI 1:4-8
Abameli badinga ukuthunywa njalo bamukelwe ngokusemthethweni ukuze benelise ukusebenza kungelakuthandabuza ngokwemvumo yabo. Lokhu kumele kulandele. Ngokombhalo, UJesu wabiza abafundi bakhe wahamba labo okweminyaka emithathu befunda kuye. Kuminyaka leyo emithathu wabona amaphutha kuzimilo zabo, lendlela yokwenza izinto. Kwezinye izikhathi bayatshengisa izifiso zabo ezingalunganga lentando yabo, isibonelo, abantwana bakaZebedee babefuna ukuthandwa ukwedlula abanye ukuze babephezulu kwabanye abafundi. (UMarko 10:35 – 44), abafundi babemisa abanye abengekho eqenjini labo ukwenza umsebenzi wabo (uMarko 9:38), njalonjalo. Babezikhangela bona ngokwabo. Wonke la maphutha wayewabona lapho ehamba labo, njalo wayelesikhathi sokubaqondisa ukuze bahambe kuhle.
Manje, abafundi kwakumele baqhubeke ngomsebenzi njalo bammele, lapho yena engasekho labo ngokwenyama. Ngokuzicabangela bona ngokwabo njalo lezifiso zabo kwakungonakala kakhulu. Babengasoze babe ngabameli abaqhotho. UJesu wayekwazi lokhu. Ngakho, ukuze kuvinjwe ingxabangxoza lokuxabana kokubusa lokuqhubeka belahleka, uJesu wabalaya ukuthi bame eJerusalema baze bathole uMoya oyiNgcwele. Kwakumele bathunywe njalo bahlolwe nguMoya oyiNgcwele kuqala bengakabi ngabammeli.
Lokhu yikho okwenzeka kubandla lalamuhla. Ibandla alingeke libe ngummeli oqotho kaKristu nxa bezicabangela bona ngokwabo lezifiso ezenziwa ngamalunga. Lesi yiso isikhathi sokuthi thina (ibandla) sithunyiwe njalo siholwe nguMoya oyiNgcwele, lokhu kusenzakala, kuba lempumela enhle lapho silethela umhlaba ukubuyisana lo Nkulunkulu. Ukuswelakala koMoya oyiNgcwele kwenza ibandla libe lokuxabana bobukhosi.
Umcabango: UMoya oyiNgcwele kawugcobe unikeze ibandla amandla.
USUKU LWESITHATHU
ISIHLOKO: UKUXOLELA NJENGELUNGELO LOKUBA NGUMMELI
IZIFUNDO: 1 KWABASEKORINTE 5:17 – 19
Nxa ummeli ebizwa ethunywa phandle kumele atshengise izincwadi zakhe ezichaza ngomsebenzi, izincwadi lezi ziyilungelo lomsebenzi elikhomba ukuthi umuntu ulungele okuthile angakwenza. Luphawo olutshengisa ukuthi ulungele ukusebenza lumsebenzi. Umuntu angeke abengummeli nxa eseke wabotshwa. Kudingeka umuntu omsulwa kukho konke. Njengamakholwa silokuxolelwa njengelungelo lethu lokuba ngabammeli.
Kusifundo sanamhla, simelwa nguPawuli lapho esithi nxa umuntu ekuKristu ungumuntu omutsha ngokupheleleyo. Okudala sekudlulile njalo okutsha sekufikile. UMpostoli ngokwakhe uyibufakazi balokhu. UMpostoli uPawuli waba ngummeli kaKristu eyisibonelo sentethelelo. Sonke siyazi ukuthi waphenduka njani, lapho esuka ukuba nguSawuli waseThasisi esiba yinceku yeNkosi (Imisebenzi 9). Impilo yakhe endala, nxa ikhangelwa ngokujulileyo, iyamsusa ekubeni ngummeli kaKristu. Imuva yakhe yayimbi kakhulu. Kodwa uNkulunkulu waguqula imbali yakhe, wamxolela, wamnika impilo entsha, njalo walungela ukuba yisithunywa sakhe. UNkulunkulu wayemfundisa ukuthi ubumeli bamakholwa bakhelwa phezulu kokuxolela. Waba ngumuntu oxolelweyo. Konke ayekutsho kusiya phambili wayekutsho ngesiqiniseko sokuthi imisebenzi yakhe yemuva uNkulunkulu uyithethelele, wambuyisa ngaKuye, waba ngumuntu omutsha ngokupheleleyo. Lokhu yikho ukuphenduka okwamnika isibindi sokubhalela ibandla laseKorinte ngendaba zokubuyisana.
Ibandla laseKorinte lalilokubandlululana ngokwembala, lalakhelwe endaweni yokuthengisela lapho abantu abamasiko atshiyeneyo, imibuso etshiyeneyo, ukholo lemikhuba etshiyeneyo ngokutshiyana kwemvelo yabo, kodwa uMpostoli uthumela umlayezo kubo wokubuyisana. Lokhu kuba yinto engeke yenzeke aluba yena umakhuluma engenzi okuqondileyo.
Ummeli kaKristu kumele asebenzise intethelelo yakhe njengelungelo lokusilisa ibandla likaNkulunkulu. Ukuvela kwakhe kumele kubesekuthethelelweni kwakhe kokubi akwenzileyo. Intethelelo engapheleliswanga ibuyisela ukusiliswa emuva.
Umcabango: Umuntu angeke abengummeli uma ethwele inhlupho ezimhlukuluzayo ezakudala. Xolelwa njalo uxolele.
USUKU LWESINE
ISIHLOKO: ABAMELI NGABANTU BESIVUMELWANO
ISIFUNDO: UGENESISE 15 :1 – 20
Isivumelwano kumhlaba wakudala besifana lalokhu esikubiza ngokuthi yincwadi lesivumelwano kumbe isivumelwano sombuso kumhlaba wakhathesi. Lezi izivumelwano zenziwa ngamaqembu amabili. Siyachaza izinga lobungane, indlela okwenziwa ngayo izinto, izithembiso lempumela nxa lezindlela zingenziwa ngendlela. Kunjalo lakubameli.
Abameli njengamanxusa awombuso athile ngabantu besivumelwano. Lapho beqhatshwa bethunywa kulemigoqo ethile okumele bayilandele lapho besenza umsebenzi wabo abawuthunyiweyo. Lezo ndlela ziyabagcina belobudlelwano obuhle phakathi kwabo lenkosi ebathumileyo, obabizileyo wabaqhatsha. Indlela lezo zifana lesivumelwano. Kucele lenkosi kulesithembiso kuthi kucele lenxusa kulo kulalela.
Nxa sibala isifundo salamuhla, sinikezwa lesinye sezivumelwano eziyisikhombisa kuTestamenta elidala, isivumelwano sikaAbrahama. UAbrahama wabizwa nguNkulunkulu ukuthi atshiye umuzi kayise aye lapho uNkulunkulu ambonisa khona. Ngesikhathi ebizwa, uNkulunkulu wathembisa uAbrahama izibusiso njalo lokumvikela (uGenesise 12:1ff). UAbrahama wayezakuba ngummeli kaNkulunkulu konke lapho abezakuya khona njengesithembiso sokubusisa abantu ngaye. UAbrahama wamlalela uNkulunkulu. Isahluko 15 sisinika iminininga yesivumelwano esenziwa nguNkulunkulu kuAbrahama njalo isivumelwano saqiniswa ngegazi lenyamazana lenyoni lezo uAbrahama ayelaywe ukuthi azibulale njalo azibeke eAlitharini. Umsebenzi wokwenza i-alithari wahlangana lodubo lwamanqe ayebhuza efuna ukuzisuthisa ngalokhu uAbrahama ayekulungisele uNkulunkulu kanye lempumelelo yakhe. Ngokunjalo uAbrahama wama waqina wawaxhotshwa ahamba.
I-alithari yalungiswa njalo yalondolozwa. Kuzithembiso zesivumelwano, bekulesiqiniseko sokuthi uNkulunkulu uzagcwalisa izithembiso zakhe kuAbrahama ngesikhathi embiza. Isiqiniseko sanikwa uAbrahama ukuthi uzakuba lendodana. Okwasekusele kuAbrahama lapho ehamba ngobubanzi balomhlaba yikulalela lo omkhethileyo njalo owenza izithembiso kuye. Kusenjalo lakubandla lalamuhla. Njengabameli bakaKristu singabantu besivumelwano. Yikho lesi isikhathi singesokwenza lokuvuselela izivumelwano zethu loNkulunkulu. Nxa singaba ngabameli bakaKristu kumele sigxile kulokhu uKristu asithembise khona njalo senze owethu umsebenzi ngokumlalela.
Umnakano: Abameli ngabantu besivumelwano. Kuyini okuphakathi kwesivumelwano esisenze loNkulunkulu?
USUKU LWESIHLANU
ISIHLOKO: ABAMELI BATHEMBEKILE
ISIFUNDO: AMANANI 13:1 – 3, 17 – 33
Ummeli omuhle ngokwaziyo intando yalowo omthumileyo kulowo msebenzi. Ummeli uzasebenza ngobuqotho ukuze angeyisi isimilo salo omthumileyo, kumbe ukudonsela ibizo lenkosi yakhe edakeni. Akumelanga adlulise amalawulo kulokhu akwenzayo njalo kaguquki kulokhu akuthunyiweyo. Ummeli kumele agcwalise izinjongo zalowu amelayo, kungaba kwezinye izizwe kumbe ezweni angalithandiyo. Yena kenzi intando yakhe kodwa intando yalowo omthumileyo. Ummeli omuhle ulokwethembeka, kulowo muntu omqhatshileyo.
Kusuka kusifundo esisifundayo, siphiwe inhloli ezilitshumi lambili (abameli) abathunywa nguMose ukuthi bayehlola ilizwe laseKanani. Sebethunyiwe, bahamba bayabuya lempendulo ngemva kwamalanga angamatshumi amane bekhangela umhlaba ngokupheleleyo. Ngeshwa, inhloli ezinengi (ezilitshumi) zabuya lombiko ongamuhle loba belobufakazi ukuthi indawo inhle. Kuphela ababili, uJoshuwa loKelebhu, babuya lombiko omuhle. Ngemvama, bekuzakubalula kulabo abasele ekhaya ukuthi bakholwe imibiko yabalitshumi ngenxa yobunengi babo, kulokukholwa indaba kaJoshuwa loKelebhu. Kodwa ke, ngabameli laba ababili ababelendaba lenjongo kaNkulunkulu abalombiko owalandelwayo.
Njengoba bekutshiwo ngaphambilini, zonke inhloli zavuma ukuthi umhlaba uvundile njalo kuyavunwa. (Ilizwe eligeleza uluju lochago) ngokweqiniso babebuye lezithelo njengobufakazi obuvela kulelo lizwe, kodwa abanye babo baswela ubuqotho bokuveza umlandu wabo abawuphiwe nguNkulunkulu. Balahlekelwa ngumfutho wokunqoba ilizwe.
Izifundo ezimbili ezitholakala kundaba leyi lapho sidinga ukuba ngabameli abathembekileyo kuKristu.
a) Izikhathi ezinengi njengabantwana bakaNkulunkulu njalo abameli sithanda ukufuna ukukholisa izithelo zomhlaba singakhangelanga umsebenzi owenziwayo. Njengabameli kumele sizilungiselele ukuhlangana lezilingo zabakhulu elizweni esisebenzela kulo, ukumelana lomsebenzi ensimini, njalo kwesinye isikhathi ukuhlekwa lokuphikwa, kodwa sikhangele kunjongo esibizelwe ukuyiphelelisa.
b) Asikho konke okunqoba ngamavoti okungumbono oqondileyo. Esikhathini esinengi ibandla lijwayele ukulandela ilizwi labanengi ukuthi imibono yabalutshwana ilahlwe. Esikhathini esinengi sithatha izinqumo zethu ngamavoti hatshi ngombono, njalo ezikhathini ezinengi siqamba amanga sithi yikho uNkulunkulu asinike khona, sikhohlwe ububi ebesibenza sidinga amavoti, sivota njalo lendlela okwenziwa ngayo. Sibusisiwe isizwe sakho Israyeli lapho ukunqoba kwabo kwakusebantwini ababili, uJoshuwa loKelebhu, ababeloNkulunkulu kulokuba labantu. Sidinga ukukhuluma loNkulunkulu kakhulu kulokukhuluma labantu.
Ummeli omuhle njalo oqotho uthembele kumandla eNkosi emthumileyo ukuya sebenza. Njengabameli bakaKristu, kumele sifunde ukuba lesibindi kakhulu ukuze sithembe lokulalela iNkosi yethu njalo sithembele emandleni akhe. Loba kulabakhulu baseAmoni elizweni eliphambili, siloNkulunkulu omkhulu ongakwazi kunqotshwa loba kuyiphi impi, ukunqoba sikukhangelele. Asenzeni konke emandleni Akhe.
Umnakano: Abameli bathembekile. Sithembeke okunganani lapho sisenza imisebenzi yethu sikhangelene lobunzima?
USUKU LWESITHUPHA
ISIFUNDO: Kwabase Efesu 1: 17 – 18
Abameli bayazazi ingqwele zabo. Bayakudinga ukuthi bathathe isikhathi bebafunda, okuyikuthi, bazi ubuntu babo, abakuthandayo, labangakuthandiyo, bengakaqali ukwenza umsebenzi wabo wenhloso ngokuhlakanipha. Ukwehluleka ukubamazi lokuyiqedisisa ingqwele yakho kwenza umsebenzi wobuMeli ubenzima, kumbe ungeneliseki. Kuyadingeka futhi ukuthi uMmeli azi okukhangelelwa yingqwele yakhe kuphuma kuyo.
Ngendlela yinye yokuzwisisa siyavezelwa iqiniso leli encwadini yabaseEfesu. Umlobi wencwadi yabaseEfesu ulalokhu ukukholelwa. Uyakwazi kakuhle ukuthi umuntu angazake abenguMmeli kaKristu nxa engamazi ngokugcweleyo uKristu. Ngale indlela [umlobi] wathandazela abantu ababala incwadi yakhe. Njengokulotshiweyo kumbhalo esiwufundayo uyalithandazela ibandla labantu baseEfesu ukuthi liphiwe uMoya wenhlakanipho lesibonelo ukuze ulwazi lwabo ngoKristu lwengezwe. Ubuye athandazele ukuthi angani amehlo abo enhliziyo angakhanyiselwa ngendlela yokuthi mhlawumbe bengabakwazi ithemba ababizelwe kilo.
Inkulumo le iyasebenza lakithi lamuhla. Umuntu angazake abeyisithunywa somuntu angamzwisisiyo. Akutshoyo yikuthi kumele siziphe isikhathi sokufunda ngoKristu, sithandazele isibonakaliso, lokunye okunjalo. UKristu kasivezele ukuthi ungubani, thina singobani, lokuthi senzani kanye lokuthi usibizela ngaphi. Singehluleka kulokhu singacina singammeli kuhle. Sicine sisenza injongo yethu kuleka Kristu, futhi lokhu yikho okubonakala emabandleni lapho uKristu athathwa njengenye nje into yokwenza. Kulamabandla ehlukeneyo lapho okulobufakazi bokuthi benza izinto zabantu beholwa yintando yabantu okwedlula lokhu okufunwa yibuKristu. UKristu kaziwa kubo bonke abantu kodwa abantu bazithi benza injongo yakhe. Akesizehlise sifunde kutsha. Sihlakulele intshukuntshu yokulamba lokomela ukwazi uKristu okwedlula lokhu esike sakwenza, kusuka kulelilizwi.
Umnakano: UKristu uyaziwa ngokugcweleyo emabandleni ethu na? Asizameni ukuba lesiqiniseko sokuthi sigcwele ngelizwi leNkosi njalo sigcwale ngoKristu.
USUKU LWESIKHOMBISA
UKUPHILA NGOKWECEBO LE ZULU
ISIFUNDO: ULUKA 19: 18 – 30
Amacebo lezibonelo zokuziphatha kwabameli kugoqelwe kusimiso somthetho wombuso kumbe kuHulumende welizwe abalimelayo. Ngitsho lefulegi (flag) ephaphayo endaweni yabo yokuhlala lasemawofisini ngeyalelo lizwe abalimelayo. Abaphili kumbe benze ngendlela abayifunayo. Abakhohlwa futhi ukuthi bathunyiwe ukuba bamele isizwe benganqotshwa yibuncindezeli lezibonakaliso zaleso sizwe abakiso.
Kusiya ngokulotshiweyo esikufundayo, sitshengiswa ngesehlakalo sikaJesu ekhuluma ngombusi omncinyane oyisinothi esingathembakalanga. Indoda le encinyane ingaba yiyo yodwa ema Vangelini oweza enyaweni zikaJesu wabuyela esekusimo esedlula leso ayebuye ekiso. Ekuqaleni indoda le yayizamile ukwenza kuhle kakhulu. Wayelengxenye yakhe enhle engakezi kuJesu. Indoda yayiqotho, ikholwa, izimisela njalo, okungangokuthi kukho konke lokhu kwakubukeka. Kungenani iphutha elilodwa labulala lacitsha bonke ubuhle ayephile kubo okweminyaka. Ngalokhu-ke wabuyela elokudangala okukhulu. Ukuphambanisa kwakhe kwaba yikuthi wayefuna uJesu agcizelele ukungathembeki kwakhe njalo aphile ngezibonelo zakhe. Langaphandle kokuthi wayeze emuntwini oqondileyo, wabuza imibuzo eyiyo eyazuza impendulo eziqondileyo, wenza isinqumo esingaqondanga. Wabuza uJesu ukuthi kuyini ayengakwenza ukuze athole impilo engunaphakade. Njengaye wonke umJuda wayekholelwa ekutheni umuntu kwakumele enze enye into ukuze athole impilo engunaphakade, kodwa wathi esetshelwe okwakumele akwenze, wala. Luhlobo lwamaKristu olukhuluma okunye kodwa lwenze okunye.
Eqinisweni, uJesu kanqumi ukuthi sonke sithengise yonke into esilayo siphe abampofu. Kanti-ke ubeka umunwe wakhe wokholo loma kungaphi empilweni zethu lapho esingathembekanga khona. Nxa esewufakile lowomunwe, sekusiba kithi ukuvumelana lawo sibengabameli abaqotho. Ukuphikisana lalokhu esikutshelwa nguJesu ukuthi sikwenze kutsho ukuphikisana lendlela zakhe besesizama ukwenza ngezethu izindlela, okuyinto engakhangelelwanga kubaMeli beqiniso.
Umnakano: Nxa uJesu wayengafaka umunwe kwenye ingxenye yakho empilweni yakho lapho ongathembakalanga khona, ingaba yiphi ingxenye yakho? Xwaya umnakano walo mbusi omncinyane.
USUKU LWESITSHIYA NGALOMBILI
ISIHLOKO: LAPHO SIHAMBA NGOKHOLO
IZIFUNDO: 2 KWABASEKORINTE 5:7; AMAHUBO 23: 4; 1 SAMUYELI 17: 45 – 47
NjengabaMeli baka Kristu, sibizelwa empilweni yokuphila ngokholo. Ezikhathini ezinengi sihlangana lokuthonisiswa losizi. Indlela yaphambili ayingeke ihlale ibutshelezi, kanti kumele siqhubeke sihamba; ukuze sale sisiya phambili. Kuloluhambo, amehlo amanengi azakuba ephezu kwethu, ukuze kubonakale ukuthi sinqoba njani ezikhathini zobunzima kumbe siyawa.
Lapha lalaphaya, kumele sizihlole, ukuze sibone ukuthi siqinile ekholweni (2 KwabaseKorinte 13: 5). Siyabudinga ubufakazi obokuthi uJesu Kristu uyaphila kithi, ukwenzela ukuthi nxa sisehluleka umhloliso singenza okunye ngakho. Uhambo oluphambili aluwadingi amandla omzimba kuphela kodwa lamandla emfundiso yomoya.
Kuyinjayelo ukuthi izinto esizesabayo ezikhathini ezinengi ziyenzakala. Singani sihlala sisevalweni ngezithiyo ezikhangeleka zinkulu kakhulu kithi. Kwenye yezingwalo eziphiweyo ngaphezulu, uDavid kazange abone uGoliyathi njengento engamphazamisa, kodwa njengethuba lokutshengisa izimanga ezinkulu zika Nkulunkulu. Wayenga gxilanga kumibono yakhe, kodwa emandleni okholo lwakhe ku Nkulunkulu, njalo wenelisa ukunqoba isitha. Nxa sihamba ngokholo, akutsho ukuthi asisoze sihlangane lobunzima, kodwa kutsho ukuthi sizanqoba ngoba uNkulunkulu wethembekile. Ukuhamba ngokholo akutsho ukuthi indlela ibalula, kodwa kwenza kuqakatheke ngoba siyaqhubeka sikhula emandleni.
Umhlabeleli uyasitshela ngokuthi ezinye izigodi ezimnyama sizaphutsha kizo, njalo abanengi sebengawa bakhalale, kanti lesi isiqiniseko ngesokuthi umalusi olungileyo uyasipha ukuvikeleka kakho omunye ongakwenza. Intonga yakhe lodondolo lwakhe kuzasiduduza. Kwesinye isikhathi uzabe uhamba wedwa ngokwenyama kodwa emoyeni uyabe ungewedwa. Kwesinye isikhathi uhambo luzakube lugcwele ngezimpi ezingela kunqoba okukhanyayo. Kungenani-ke, kumele siqhubeke sihamba, ngoba ukholo lwethu luzasiphutshisa. Inkangelelo yakho kumele ibekho, ‘lanxa ngingeke ngikubone Nkosi, ngiyazi ulami’.
Umnakano: Izithiyo zingamathuba okutshengisa ukuthi uNkulunkulu ulamandla anganani.
USUKU LWESITSHIYA NGALONYE
ISIHLOKO: SIBUYISELWE KUBABA
IZIFUNDO: ULUKA 15: 11 – 20
Njengabameli beNkosi yethu uJesu Kristu siqhubeka sibizelwa ekubuyisaneni loNkulunkulu. Injongo yethu kuleli ilanga lesikhathi yikuthi sinqobe izilingo ezehlukeneyo esikhangelana lazo kusa kwamalanga. Lanxa singehluleka, kumele sibuyele kuBaba masinyane.
Kusibonelo sendodana yolahleko, umfana omncinyane wakhetha ukuchitha ingxenye yelifa lakhe ngokuphila eyedwa impilo ebuhlungu. Mhlawumbe wayengacabangeli ukuthi kukhona okwakungahamba kubi. Ngomnyama-ke, indlala elizweni ayehlala kilo yakuchitha konke ayelakho kanye lalo lonke ithemba lokukuthola, waba yisiphepheli. Ekusweleni kwakhe, wazinikela ekubeni yisigqili kanti uyise uqobo wayenothile. Lesi yisibonelo sokuthi kwesinye isikhathi siyaphatha butshapha okuyilifa lethu embusweni, njalo besesiduha sidinga amadlelo aluhlaza.
Kulesikhathi lapho izinqumo esizithathayo zingasenza sisuke ebukhoneni buka Nkulunkulu sesilandela inhloso zethu. Kwezinye izikhathi kungaba yizikhundla zethu ekukhokheleni ibandla elisivumela ukukhetha ukwenza izinto ezingekho endleleni yentando kaNkulunkulu. Lolu ukhetho lungadala ukungakhuli ebandleni, kumbe ukoma. Nxa sesikunanzelela lokhu ingqondo zibuyele endaweni yazo, akumelanga siphuze ukubuyela kuBaba.
UBaba wethu ulenhliziyo enkulu angazake asitshiye elizweni elomileyo. Ingalo zakhe zivulekile ukusamukela futhi embusweni wakhe. Kumele sinqobe idimoni lokuzigqaja sisithi kuyayangisa ukubuyela emuva ngemicabango yethu. Nxa ukuzigqaja kuphila phakathi kwethu, singacabanga ukuthi ukuphenduka kuzinqumo ezimbi, kumbe ukutshiya okubi kuyayangisa; akusisiszi. Kumele sibuyele kuBaba ngokuzithoba njalo sivume lapho esiphambanise khona ukwenzela ukuthi siqale kuhle kakutsha. Ukuzehlisa akutsho ukuthi uyabe ulahlekelwe yikuba nguwe, kodwa kutsho ukuzuza lokho uJesu Kristu akufelayo, ukuze labo abasilandelayo bayazi indlela.
Asibambeleleni kuVangeli leqiniso, ukwenzela ukuthi sizuze usindiso njengabameli baka Kristu. Inkangelelo yikuba seduzane laye ngaso sonke isikhathi, ukuze nxa sivikelekile njengabantwana bakhe, silakho ukumelana lamaqhinga lokuyengwa yisitha.
Umnakano: Nxa singavumela ukuzigqaja kugxila impande, izithelo zethu azisoze zidleke. Kodwa nxa singazehlisa ngokuzithoba sivume amaphutha ethu, singabuyela kuBaba njalo uyasipha isiqiniseko sempilo engcono.
USUKU LWETSHUMI
ISIHLOKO: UKUZISONDEZA ENTANDWENI KA NKULUNKULU
ISIFUNDO: UJOHANE 6: 37 – 40
Umhlaba esiphila kuwo lamuhla udinga elinye izinga lokuzimisela empilweni yokusebenza. Abameli ayisibo abanikazi lenjongo yenhlakanipho abayithweleyo. Umnikazi wenjongo ngulowo abameleyo. Yiso isimo sethu lamuhla. Injongo ngeka Nkulunkulu (Missio Dei). Ngokunjalo, ukuba ngummeli ngumsebenzi oqakathekileyo ofuna ukuphikelela lokuzinikela ukumelana lobunzima obuvela emhlabeni jikelele.
Esifundweni esisibalayo sibona uJesu ekhuluma lexuku elalimlandele lisuka endaweni ethuleyo lidinga ukuhlala liphiwe isinkwa owayeke wabapha sona, ngokuya kwesikhathi lapho inkulumo iqhubeka basebelela isibonelo. Enkulumeni yakhe uJesu walitshela ixuku kwacaca ukuthi lokhu ayekwenza kwakungela mpande, noma ukuqondiswa zinhlelo zabo kodwa kuyintando langokufuna kuka Baba. Wayengadingi ukubathabisa. Kumbe ukuthi abachazele ukuthi wayesendleni yabo. Wayengadingi imvumo yabo.
Weza njengesithunywa sika Baba elenhloso kaBaba ezandleni zakhe wakuthwala konke ngokwentando kaBaba. Wayeyivumela intando kaBaba kwaze kwaba sekucineni. Esazi kamhlophe okwakumlindele ngaphambili eCalvary. UJesu wathandaza kuBaba ukuthi amsusele inkezo nxa yena (uBaba) ethanda kodwa wagcizelela ukuthi ukususwa kwenkezo kwakungamelanga kube ngokwentando yakhe kodwa ekaBaba (Matewu 26:39). Wayengafuni ukuthi intando yakhe yandulele intando kaBaba ngoba wayezwisisa ukuthi kazizelanga ngokwakhe kumbe ngokohlelo lwakhe, kodwa ngokwentando kaBaba. Ngokunjalo kazange adinge ukuthi uBaba aguqule intando yakhe. Wayengeke aguqule uhlelo lukaBaba lanxa yayilakho ukwaliwa, ukuhlupheka lokubulawa okolunya.
Lokhu kuveza isifundo ebandleni [thina]. Akumelanga siguqule uhlelo lukaKristu ekuzameni ukuzihlalisa kuhle emhlabeni olezimpi. Asiziphileli thina kodwa siphila ngokoMbuso. Kwesinye isikhathi indlela okumele uKristu aziwe ngazo zingabe ziphikisana lentando yakhe. Kungenani, kungekuhle kunjalo, intando zethu akumelanga zenziwe ezakuqala kulentando eyakhe oYedwa osibizileyo wasithuma. Kumele sizisondeze entandweni ka Baba.
Umbuzo odinga ukuphendulwa yithi sonke siphila njalo siqhuba injongo emhlabeni lo, ngokunjalo sisadinga isibonakaliso yikuthi, ‘Yintando kabani elawulayo, phakathi kwentando yethu leka Baba?’ Kungumnyama ke ukuthi ezikhathini ezinengi yintando yethu eqhutshwayo. Ezikhathini ezinengi intando kaBaba iyahlanganiswa lapho abantu lobukhokheli bezama ukuthokozisa abantu besesaba ukuthi nxa bengekela ukuba thokozisa bazakhitshwa ezikhundleni ngevoti. Lamuhla ibandla linxuselwa ukutheni lizisondeze entandweni kaBaba. Yisikhathi sokuzisola!
Umnakano: Nxa uJesu wazisondeza entandweni kaBaba, singobani thina ukuthi siphikisane lalokhu sizenze abalomahluko?
USUKU LWETSHUMI LANYE
ISAHLUKO: UKWENZA UMAHLUKO ELIZWENI LASEZIZWENI
ISIFUNDO: MATEWU 5: 14 – 16
Kulokuzwisisa okujwayelekileyo lenkangelelo yokuthi abantu banxuselwa ukuba ngabameli kumbe izithunywa zezinhlanganiso, kuyadingeka ukuthi babe ngabantu abathembekileyo. Amabandla [thina] kumele abe yingxenye yalo umcabango. Abameli baka Kristu bachazwa njengabantu abathunywe emsebenzini bengabahlali basembusweni kaNkulunkulu abamele iqiniso lokukhanya emhlabeni wesono lobumnyama.
Umbhalo esiwubalayo uyingxenye yemfundiso kaJesu kumbe intshumayelo yase Ntabeni. Nxa sikhangelisisa ngukugoqelwe kulolu gwalo siyabona ukuthi uJesu uyakuzwisisa ukuthi abalandeli bakhe basebenza baphile emhlabeni ongayisiwo wabo. Lokhu kuzwisisa kumi kusifundo seTestamente ELitsha. Amakholwa ayisiwo walo umhlaba lanxa bephila besebenza kiwo (Johane 17: 11; 1 Johane 3:1). Kungenani-ke, kukulelo lizwe [umhlaba] elingayisilo labo lapho okumele bakhanye benze abantu bakulowo mhlaba babone izenzo zabo besebedumisa iNkosi yabo eseZulwini.
Kusukela ezinsukwini zika Pawuli, abameli bakaKristu batshengise ukukhanya kumakholwa lakulabo abangayisiwo makholwa. Kumbali yebandla silabantu abanjengo Martin Luther, uJohn Calvin ngitsho lowethu uJohn Wesley abatshengise ukuthi abameli bakaKristu bamelani. EZimbabwe singakhuluma ngamaMissionery aweWisili abanjengo Isaac Shimmin, uOwen Watkins, uJohn White, labanye abanengi. Sasilaye futhi umhlali ongowethu kusigaba sika Revd, Andrew Ndhlela, uMathew Rusike labanye abakhokheli abatsha kuzigaba zeConnexional, District, Circuits lama Society abamele uNkulunkulu kuhle kakhulu.
Kungenani-ke, kuyadanisa ukuthi iapula (apple) elibolileyo lihlala lidinga indawo yalo phakathi kwamahle. Kulabanye abameli abawayo endleleni nxa sebekhohliwe ngokumele bakwenze besebegxumukela kuzenzo lembeko engemukelekiyo. Esikhundleni sokuthi babe yikukhanya kwelizwe bona bakhuthalela ukucitsha ilayithi okumele likhanyise ebandleni. Bangabameli bobumnyama njalo sebechaphakele emagumeni ebandla lakuzingatsha. Abanye bayengeza uhambo kusiya kuzigaba zokudonsela ibizo lika Kristu lebandla lakhe, okumele bakuvikele, ekuyangisweni kuma social media abo anjenge Face Book le Whatsapp. Sekuye ngaphi ukukhanya? Abantu abanje bayakhunjuzwa ngesidingo sosindiso lwesiphangephange nxa kumele baqhubeke benceda njengabameli baka Kristu.
Umnakano: Kungaphi ukukhanya kwakho? Khazimula emhlabeni udonsele abanye kuKristu.
USUKU LWETSHUMI LAMBILI
ISIHLOKO: UNGESABI, UKRISTU ULAWE
IZIFUNDO: DETERONOMI 31:6; ULUKA 10:1 – 3
Abameli abathunywangwa ukuthi bayesebenza enkangala, bathunyelwa lapho okulabantu khona, bahlale labo njalo baphile bephakathi kwabo. Kwezinye izikhathi indawo abathunyelwa kizo abameli ziyabe zingahlaleki kumbe kungalula ukuphila kizo, kwakunjalo lakubafundi lapho uJesu wayebathuma ngababili ngababili. Esazi kuhle ngohlobo lwabantu ababezakuya hlangana labameli, uJesu wabachaza abantu bakhona njengempisi. Ubuntu bangaphakathi, ngokwazi ngobuthakathaka babafundi bakhe uJesu wayebalisa njengezimvu.
Lokhu kutsho ukuthi njengabameli, sisebenza umsebenzi esiwuthunywe nguKristu, kusifaka egcekeni njengokwakusenziwa yena uJesu. Uyayazi ingozi lokwesabekayo esiphakathi kwakho. Lapho ethuma abafundi bakhe, kazange abathembise yonke imikhubo yokuziphumuza leyokuzithabisa kodwa ukuthi kulokuzinikela okuhlanganyela lomsebenzi wabo. UJesu wabachaza njengezimvu ezithunyelwe phakathi kwezilwane; Wabatshela ukuthi encwadini kaLuka 10:3 kuthi “ngilithuma phandle njengezimvu phakathi kwempisi.” Lokhu akwenzi lihlaliseke kodwa kuyethusa, ngoba imvu phakathi kwempisi iba yikudla okulethwe kusemganwini wesiliva. UJesu wayebalimukisa njalo ebalungiselela ngobunzima bomsebenzi ophambili. Esinye sezizatho abavuni babebalutshwana (vs 2) kungoba umsebenzi unzima. Kulempisi ezimelele ukuginya izimvu phandle.
Kungenani-ke, izimvu zivikelekile empisini lezinye inyamazana eziphila ngokudla ezinye ngoba zingenelisi ukuzivikela. Azilakho ukuhlakanipha lamandla okuzilwela; yilobubuthakathaka obenza sibone ukuthi ukuxhumana loJesu kwenzani phakathi kwabalandeli lezimvu. Amakholwa kulula ukuthi bahlukumezeke lokuhlaselwa zinhlupheko nxa besenza umsebenzi. Ngomnyama omkhulu, kulokuthi bakhangelane lodubo ngomdladla, abanye abameli bahlakulela ekwesabeni. Kulabatshumayeli abanengi kulezi insuku abalobudlova bokukhankasela ukuthi baphiwe amathuba awokuya tshumayela emabandleni abawafunayo ngenxa yokwesaba ukuya kwamanye amabandla. Kanti bakhona njalo abafundisi abalokuxhwala bokuthi bakhankasele ukuthunyelwa ukuya sebenzela lapho abacabanga ukuthi angamabandla amahle, besesaba umnyama ongela mpisi. Benza lokhu bezilungisela inhlala kahle. Kunjalo-nje njengabameli baka Jesu kumele siqine njalo sime isibindi. Ukuhlukumezeka kwabalandeli baka Jesu akuzange kube yimfihlo, uJesu watshela abafundi bakhe ukuthi bazazondwa bahlutshwe njengalokhu abantu abafanayo ababekwenze kuye, ngoba isigqili asimkhulu kulenkosi (John 15:19-20). Singacindezelwa njengezimvu kodwa asisoze siginywe. Izinto ezinengi ezinxele zingakhulunywa phezu kwethu kodwa akukho lokukodwa kwakho okungasibhidliza.
Njengabameli bakaKristu simele sibe yisizwe esilamandla njalo esiqinileyo. Abameli bamela izizwe eziqinileyo abesabi lanxa besebenzela emazweni esabekayo ngoba bayakwazi ukuthi amazwe abo ayabavikela loma bekuyiphi indawo. Ngokunjalo bahamba ngokwethemba lesiqiniseko salowo obathumileyo. Njengabameli baka Jesu, ibhayibhili liyasikhuthaza ukuthi siqine ngoba uKristu owanqoba ngitsho lokufa lethuna wasipha isiqiniseko sokuthi uzakuba lathi kuze kubesekucineni kwesikhathi (Matewu 28:18 – 20).
Umnakano: Nxa uKristu engowethu ngubani ongamelana lathi? Kakho. Senza konke emandleni akhe.
USUKU LWETSHUMI LANTATHU
ISIHLOKO: UKRISTU UYAPHILA PHAKATHI KWAMI
ISIFUNDO: KWABASEGALATHIYA 2: 20 – 21
UMmeli umela omunye umuntu. Siyizithunywa ezithunywe ukuza tshumayela iVangeli kuzo zonke izizwe. Ngokuloba kuka Pawuli, isifungo sokuthi ‘akuseyimi ophilayo, kodwa uKristu uyaphila kimi’ kusitshengisa kwenye into eqakathekileyo. UPawuli ulesiqiniseko sokuthi ugcwele ngoKristu. Ukugcwala ngenye into kutsho ukuthi ibanga elilandelayo liyaphuphuma. Noma yini ephuphumayo iyabe igcwele ngaphakathi. UPawuli ulesiqiniseko sokuthi ugcwele ngoKristu, konke ayekwenza layekutsho kwakuyikuphuphuma kwalokhu okwakugcwele ngaphakathi kwakhe. Ngaleyondlela, indlela akhuluma ngayo laziphatha ngayo itshengisa lokubonisa kwalokhu okuphakathi, onguKristu uqobo lwakhe.
Ibandla lamuhla libizelwa ekutheni ligcwale ngoKristu ukuze libe lokuphuphuma kobungcwele. UKristu ophila phakathi kwethu asikho kutsho nje esikwenzayo njengama Kristu, kodwa labo abasigombolozeleyo kumele babone njalo bathintwe yikuphuphuma kobuKristu obukithi. Njengalokhu abafundi baqala ukubizwa ngokuthi ngamaKholwa aseAntioch (Imisebenzi 11:26) yilabo ababebabona, kufanele kwenzakale kithi ngokufanayo. Ukuphuphuma kuka Kristu ophila kithi kufanele kuthinte impilo zalabo abasigombolozeleyo kubakhokhelele ekukholweni koYedwa osithumileyo. Isono kube yinto yemzini kithi (singasibambi).
Umnakano: Njengamakholwa, siyaqiniseka yini ukuthi siyammela uKristu ngokwethembeka kukho konke esikwenzayo sisesemhlabeni? Siyanxuselwa ekuzihloleni munye ngamunye.
USUKU: LWETSHUMI LANE
ISIHLOKO: ABAMELI KUFANELE BAQINISELELE UKUHLUKUNYEZWA
ISIFUNDO: KWABASE EFESU 6:19 – 20
‘Ngithandazela ukuze ngenze imfihlakalo yeVangeli yaziwe ngingela kwesaba, ngoba kungalokhu ukuthi nginguMmeli obotshwe ngamaketani. Thandazela ukuthi ngilimemezele ngingela kwesaba njengoba kumele ngenze.”
Ubuhlungu obuqinisekileyo babuveza indlela kaNkulunkulu yokuhlenga kumbali yabantu bakhe bako Israyeli. Enkangala bahlupheka ngezingozi zemvelo babuye bahlaselwa yimikhuhlane, kodwa wabaphephisa ngesandla sakhe. Nxa izilingo zibehlela omunye wayengabuza ngobukhona bukaNkulunkulu, kwezinye izikhathi babuze labo abazithi bangaba profitha ukuze bathole impendulo, kodwa nxa konke kusehlula, bakhalela kuNkulunkulu.
UPawuli wayebhala izincwadi esentologweni njengendlela yokutshumayela izindaba ezinhle ebantwini. Wayeze acele abanye abazalwane ukuthi bamthandazele ukuze aqhubeke etshumayela iVangeli engelakwesaba. Izanuse labafundi baqhubeka befundisa njalo betshumayela ilizwi likaNkulunkulu ngitsho lakuzitha zabo, amakhosi lamaFarisi. AmaHeberu 12:7 uthi, ‘Qinisela ekuhluphekeni njengemfundiso; UNkulunkulu uliphatha njengamadodana. Ngoba nguwuphi umntwana ongafundiswa nguyise?”
Nxa sihlangana lezinhlupheko, asibaleki kodwa siyakhangelana lazo siziqonde ngqo ukwenzela ukuthi sitshengise amandla kaNkulunkulu. Ekuhlanganyeleni lo Nkulunkulu, sibonakalisa amandla akhe. Encwadini ka Isaya; siyezwa uNkulunkulu etshela abantwabakhe ukuthi akulamlilo kumbe izikhukhula okuzabatshabalalisa ngoba ubukhona bakhe buzahlala bukibo (Isaya 43: 2 – 3). Kumele sibelalo lelo themba kukho konke esikwenzayo ukwenzela ukuthi singqobe izilingo.
Sesananzelela ukuthi nxa sikhangelane lenhlungu abokubonisa babuya kuqala engqondweni kuloNkulunkulu. Nxa umuntu efikelwa yikugula, into yokuqala efika engqondweni yakhe ngudokotela kumbe ikilinika eseduzane bengaka thandazi lokuthandaza kuNkulunkulu. Kukho konke esihlangana lakho, uNkulunkulu kumele abengowokuqala ukufika emicabangweni. Ngaye siyathola ukubekezela lokunqoba.
Umnakano: Angani uMoya oyiNgcwele ungasivikela usikhokhele lapho sithatha amazopha ethu eNsimini Yakhe.
USUKU: LWETSHUMI LANHLANU
ISIHLOKO: UHLONZI LWABAMELI ABAKHETHIWEYO
IZIFUNDO: KWABASEFILIPHU 3: 20 – 21; IMISEBENZI 1:8
UMmeli olohlonzi ngumuntu osekhethiwe waphiwa umsebenzi othize emele iqembu elithize ekhusela ubuhle bempahla kumbe izithelo. UPawuli kwabaseFiliphu 3:20, uphakamisa indaba yamalungelo ethu njengabahlali basezulwini. UMhlengi ovela ezulwini simlindele ngokulangatha okukhulu, iNkosi uJesu Kristu. Kumavesi alandelayo uyagcizelela ukuthi umeli ulomqhele wakhe obalulekileyo, owokuba njengenkosi yakhe. Kusahluko 3:21 uchasisa lowo amsebenzelayo, ukuthi, kakube ngamandla amncedisayo ukuthi alethe konke ngaphansi kombuso wakhe, besekuguqula imizimba ukuze ibe njengomzimba wakhe olodumo.
Kule ingxoxo, uPawuli usitshela ngokubaluleka kokukhethwa kwakhe njengommeli. Okunjengokuthi, inkampani yonke elungisa impahla, izithengise, ilophawu olucacileyo kubathengi bayo. Abantu abadumileyo bayaqhatshwa ukuze babe luphawu njengabameli njalo ngobungcitshi babo lodumo abalalo, impahla lezo ziyafika indawo zonke, ibizo lelo libelodumo lasezindlini. Ngokumayelana lombuso kaNkulunkulu silalo iVangeli okumele silimemethekise siqala “eJerusalema, eJudea, eSamaria lasemhlabeni jikelele”. UKristu luphawu njalo thina singabameli balolu phawu, ngalokho kukithi njengabameli baka Kristu. IVangeli kumele lifinyelele kiwo wonke amagumbi omhlaba kanti lokukholwa kube yisibonelo ezindlini zonke.
Bonke abakholwa kuKristu bangabameli abaqakathekileyo boMbuso kaNkulunkulu. Amakholwa angabantu abanika ubufakazi obuthembekileyo ngelizwi likaNkulunkulu. Abameli balomsebenzi oqakathekileyo njalo bakhethelwe inhloso ethize kunhlelo. Amakholwa aluphawu lwabameli bombuso kaNkulunkulu. Baqhubekisela phambili uhlelo lwevangeli lika Jesu Kristu njengeNkosi loMsindisi ebantwini. Amakholwa akhethelwe ukuthi ame echasisa uphawu lwevangeli , bedonsela imiphefumulo embusweni ka Nkulunkulu.
Okumele kwaziwe njalo kuzwisiswe ngabaMmeli yikuthi abayisibo bomhlaba lapho abathunyelwe khona kodwa bangabathenjiweyo labakhethelwe ukuyamela isizwe sabo. Isizwe sethu liZulu njalo sithunyelwe ukuyakhuluma ngokwezulu lapha emhlabeni ukwenzela ukuthi sizuzele uKristu imiphefumulo. Sibiziwe sathunywa ngenjongo yokwehlisa inani lesihogo njalo siphakamise okwezulu.
Umnakano: Uphawu engiyilo njengoMmeli kambe luyaphakamisa ibizo lendlu yami na? Kusamele ngizame.
USUKU LWETSHUMI LASITHUPHA
ISAHLUKO: VIKELA UBUNTU BAKHO
ISIFUNDO: DANYELI 1: 1-21
Ukuzwisisa lokuvikela ubuqotho bakho yizinto eziqakathekileyo kuluhlu loMmeli. Ulodumo lokuvikela njalo okwesizwe asimelayo. Kugwalo esilubalayo, sinikwa udaba lwamaJuda beselizweni elalingesi labo, iBabiloni. Umlobi wogwalo luka Danyeli uchaza ukuthi abanye bamaJuda bekulelozwe baphakanyiselwa kuzikhundla eziphezulu besebenzela esigodlweni seNkosi uNebuchadnezzar. Kulabo abane, uDaniel, Hananiya, loMishayeli kanye lo Azariya, lokhu kwaba yinhlonipho enkulu kakhulu. Siyatshelwa kumbhalo olandelayo ukuthi isikhonzi seNkosi esikhulu sazama ngendlela zonke ukuthi siguqule amadoda esiHebheru la ukuthi babe ngamaBabiloni lokubapha amabizo aseBabiloni kanye lokudla kwakhona okwakuzenza bakhangeleke ngesikhatshana esifitshane.
Kuzo zonke izindlela ezazanywa yizikhonzi zamaBabylon Ibhayibhili liyayacaca kuvesi 8 ukuthi uDanyeli wakhetha ukungazingcolisi ngokudla lewayini yasesigodlweni. Lokhu kwakulithuba lalamadoda lawa ukuzidlela lokunatha bengacalwa lokubonwa muntu. Kodwa bona babekholelwa ukuthi lanxa babeselizweni lama Babiloni, babengayisiwo amaBabiloni. ‘Yekela amaBabiloni adle ukudla kwabo banathe lewayini labo, hatshi thina.’ Babengeke bathengise ubuntu babo ngenxa yokudla lewayini. Babesazi ukuthi bangabameli baka Nkulunkulu elizweni lemzini, ngokunjalo kwakudingeka ukuthi bavikele isimo sabo kanye leseNkosi yabo.
Nxa kulento yokufunda ngama Kristu yilobo buntu lesinqumo sala amadoda amaHeberu amane. Siphila emhlabeni esingathi unzima, kodwa ubunzimeni balo umhlaba akhona amathuba abekiweyo phambi kwethu kusa kwamalanga, ezikhathini ezinengi amathuba anje athembisa ukuphumelela ngokuphazima kweso, ngendlela ezimbi. Ubuntu bethu njengamaKristu buyanyikinywa lapho amathuba amanje ezembula phambi kwethu. Kwezinye izikhathi abanye bethu bayawa endleleni sebekhulelwa yincindezelo eziza lalawa mathuba. Ekucineni badinga izizatho zokuwa kwabo. Bacina besola amathuba anje njengezizatho zokuwa kwabo. Bayakhohlwa ukuthi la amadoda amaHeberu ayephiwe izikhundla lamathuba kodwa bazigodla bavikela ubuntu babo lobuntu buka Nkulunkulu. Asibafuzeni lapho sidinga ukuba ngabaMmeli baka Kristu ngeqiniso elizweni lemzini.
Umnakano: Kuyini okungabe kukudonsela ekutheni uthengise ubuntu bakho obuqakathekileyo? Vikela ubuntu bakho Mmeli.
USUKU LWETSHUMI LESIKHOMBISA
ISIHLOKO: UKWETHEMBEKA KUSIVUMELWANO
IZIFUNDO: DUTERONOMI 7:7-11; UJOHANE 14:15; 2 IMILANDO 19:7
Ukwethembeka kuNkulunkulu yikubizelwa ukulandela izimiso, imithetho, lezahlulelo zikaNkulunkulu. UmKristu olungileyo engummeli kaNkulunkulu umele ananzelele lokugcina imithetho kaNkulunkulu. Ukuba mbaxambili kufana lokungathembeki kuNkulunkulu. Uhlonzi lommeli lukhanya ngokuthembeka kuNkulunkulu. UDuteronomi 7:9-11 uthi, “Yazi-ke ukuthi uJehova uNkulunkulu wakho unguNkulunkulu, uNkulunkulu othembekileyo, ogcina isivumelwano lomusa labamthandayo abagcina imithetho yakhe … Ngalokho uyakugcina imithetho, lezimiso, nezahlulelo engiyakuyala ngakho lamuhla ukukwenza”
UNkulunkulu wethu omuhle akadingi lutho kithi angeke aluphe yena. UNkulunkulu ngokwakhe uthembekile kubantu bakhe lakusizukulwane sakhe. Isifundo esilandelayo siyasisiza ukuba sizwisise ukwethembeka lokhu. Nxa sikhangela kuDuteronomi 32:4 “… unguNkulunkulu wokwethembeka ongelakonakala, ulungile uqotho yena”. Kugwalo lwaMahubo umhlabeleli uthi, “UNkulunkulu uthembekile kukho konke akutshoyo; njalo ulothando kubo bonke abadalileyo (Amahubo 145:13). Ekuthembekeni kukaNkulunkulu sifumana ukwethembeka kwethu lathi. Ukwethembeka kuNkulunkulu kubangela ukwembeswa kwethu ngezibusiso zakhe. “Othembekileyo uyazibonakalisa ethembekile…” (Amahubo 18:25). Ukuba ngothembekileyo kuNkulunkulu njengabameli bakhe kumele kube yindlela yokuphila, umkhuba, ubuntu lesimilo ngoba kuthiwa ukwethembeka akusilo bala-nje kuphela kodwa yindlela yempilo.
UIain Murray uthi, “kukhona okungahambi kuhle ngawe nxa amathuba akwehlelayo eyiwo alawula ukwethembeka kwakho.” Uqhubeka esithi, “ukwethembeka kuNkulunkulu ngumsebenzi wokuqala esiwubizelwe ukuba siwenze ekuqhutshweni kweVangeli’
Njenga maKristu angabameli bakaKristu, sikhangelelwe kakhulu ukuba silondoloze isivumelwano esimumethe izibusiso ezivela kuNkulunkulu. UNkulunkulu wethu uthembekile ukuba agcine lokugcwalisa izithembiso kodwa kufuneka ukwethembeka kwethu ukuze samukele lezozibusiso. Izwi likaNkulunkulu lidinga ukuba thina sithande uNkulunkulu wethu njalo kumele kubesobala ekugcineni imithetho yakhe yonke. Kusobala njalo ukuthi uyamthanda uNkulunkulu nxa umesaba. Lowo othanda uNkulunkulu, uhle amesabe. (Johane 14:15).
Umnakano: Nxa silandela ukwethembeka kuNkulunkulu lesivumelwano sakhe, silandela ubudlelwano obuqinileyo laye ngoba lokhu kuyikulalela. Nxa silalela uNkulunkulu kulobudlelwano obuhle phakathi kwethu futhi njalo lobu budlelwano buthela izithelo ze “Zibusiso”
USUKU LWETSHUMI LASIFICAMINWEMBILI
ISIHLOKO: ABAMELI ABAHLE BAKAKRISTU YIZIZALWANE EZIQOTHO
ISIFUNDO: JAKOBE 2:14-17
UJohn Wesley wayebona amaWisili beyizizalwane eziqotho. Umbono wakhe wawuqiniswa yikufundisa kwakhe ngensuku zakhe. Izifundo zikaJohn Wesley zazigxile kakhulu kumfundiso yokukuhlambuluka. Kumizamo yakhe yonke uJohn Wesley wasungula ‘Amahamente/Class Meetings’ njengesakhelo lensika yemvuselelo yamaMethodist. Ekudingeni ukwazi kabanzi ngelizwi likaNkulunkulu uJohn Wesley wakhuthaza kakhulu amaMethodist ukuba babengabantu “bogwalo lunye” (IBhayibhili). Mayelana lemibhalo uWesley wayekholwa njalo ehlala esithi “Umbhalo ngumthetho omkhulu wokholo lokuziphatha”. Ethuthukisa kabanzi ukuzwisisa kwakhe imibhalo uWesley wayelokutsho lokhu esithi “AmaMethodist alungileyo bayisizalwane esiqotho.”
Kumizamo yokuchaza umutsho lowu, isizalwane esiqotho ngumuntu ovumayo lothatha indawo eqondileyo ezweni lakhe, umuntu ongafulatheli kumbe ukuvala indlebe kuzidingo zesigaba kumbe abantu bakhe. Isizalwane esiqotho sithanda ukungena kunhlelo eziguqula isigaba ngendlela zonke anelisa ngazo. UJohn Wesley wayebona isizalwane esiqotho singumuntu omele angene kunhlelo eziletha ukuhlaliseka emhlabeni esikuwo ngaphandle kwebandla. AmaMethodist alungileyo awathokali kumiduli yebandla kuphela; bamele benze eminye imisebenzi yokusiza kuzigaba zabo. Bamele badingisise, bakhathazeke, bangene njalo kumihlamgano yentuthuko yesigaba sabo. Isizalwane esiqotho kasimelanga sihlale sodwa kodwa phakathi komphakathi, kwesinye isikhathi esola ubuguluva lokunye okungenziwa kuhle.
Abameli abahle bakaKristu bamele batshengise umusa wokuba lusizo, okutsho ukuthi bazindlela eziletha uNkulunkulu emhlabeni esikuwo ukuze abonakale njengo Nkulunkulu onanzelela abantu kunhlangothi zonke zempilo, kwezombangazwe, esigabeni, kumnotho, kwezomoya, enyameni, kumfundo, ebungcitshini, lokunye okunengi Abameli bamele batshengise ukuthi uNkulunkulu uyakhathazeka ngalokho esikhathazeka ngakho lathi.
UJohn Wesley emsebenzini wakhe wayengena kakhulu kunhlelo zesigaba lomnotho/Socio-Economic lakundaba zombangazwe. Kwezombangazwe wayekhuthaza ukuthi ukuvota yikukhuluma ilizwi lakho. “Ukuqina kwesisekelo sezombangazwe sibangelwa yikuphelela lokuthanda kokungena kwezizalwane zakhona. Ibandla limele liqhubeke likhuthaza ukulandelwa kwezindlela eziqondileyo elizweni, isekela imithetho lezinhlelo ezibonakala ziqotho lokuphikisa ezinye. (The Book of Discipline of The United Methodist Church- 2016)
Ukuba nguMkristu ongelandaba lelizwe okuwo ngaphandle kwebandla yibufakazi bokholo olungela misebenzi. Ukwehluleka ukunanza abangambathanga (abafuna izambatho), labo abalambileyo (abangela kudla), kodwa bebafisela ukuba bakhudumale lokugcwala ngomusa kaNkulunkulu bengabaphanga okufunekayo kufana lokholo olungela misebenzi. Kuyisibonelo esisegcekeni kumbe ubufakazi besizalwane esingela ncedo lomeli kaKristu lo, ngaleyondlela siyabe singameleli uKristu kumbe siyabe sitshengisa angayisikho Yena. “Inkolo yeqiniso kumbe ehlanzekileyo engangcolanga phambi kukaNkulunkulu ubaba yile, ukuhambela intandane labafelwakazi ekuhluphekweni kwabo. …” (Jakobe 1: 27).
Umnakano: Ukholo olungela misebenzi lufile. Indawo engikuyo idinga mina ukuthi ngiyiguqule.
USUKU LWETSHUMI LASITSHIYAMUNWE MUNYE
ISIHLOKO: AKULA SIZATHO SENZONDANO
ISIFUNDO: UJOHANE 13:35
UJesu uyasazi kuhle. Uyazi ukuthi ukuthandana omunye lomunye kuyikusilinga. UE Stanley Jones waloba ngentombazana owayeguqa emathangazini kayise emtshela ukuba umthanda kangakanani, kodwa ngasikhathi sinye ekhangele ngaphezu kwamahlombe kayise enyonkoloza umnawakhe ongumfana. Unina wakubona wathi kuye, “Wena mzenzisi, utshela uyihlo ukuthi uyamthanda ngapha ukhipha ulimi kwakho ubopha ubuso bakho busiba bubi kumnawakho.” Inengi lethu liphose lenze khonokhu ukuthi siphakamisa ilizwi lethu sisithi siyamthanda uNkulunkulu ngangxanye sihwaqela abafowethu. UJesu wakuchaza kwabasobala njalo leBhayibhili likubeka kucace, “Thandanani omunye lomunye”., lokhu kungumthetho.
Kuyadanisa kakhulu ukuthi kulezi insuku ibandla ligoqela abantu abahlabela kusihlabelelo sinye, bebala iBhayibhili linye, besamukela isidlo seNkosi sinye, belalela umtshumayeli munye etshumayela ngelanga lenkonzo, okubi, bavale amehlo bethandaze ndawonye kodwa kutholakale ukuthi kulabanye phakathi kwabo abangathandaniyo. Izinga lenzondano lokudilizana izimilo ebandleni kancane, kancane sekusiya kusedlula abazombangazwe. Okumangalisayo, yikuthi, loba kulezondano engako, bazibiza ngokuthi ngamaKristu alandela uKristu. Bazenzisi! Kuyadanisa. Nguphi uKristu okhuluma ngaye? Nguphi uKristu omlandelayo? Kulo Kristu oyedwa owathunywa nguBaba ukuba nguMsindisi womhlaba lokuzosifela, lokuqala ibandla nguye kuphela olothando oluqotho olungela mgoqo kubalandeli bakhe. Ngeqiniso labo abazonda njalo belimaza izimilo zabanye, abasibo balandeli bakhe. Abasibo maKristu loba bengabafundisi kumbe abakhokheli. Uphawu lokuba ngumfundi kaJesu weqiniso luthando. Yiba lothando.
Umnakano: Ibandla selingenelwe ngamaqembu amadimoni azama ukudala ukuzonanda phakathi kwabazalwane. Kasikhulekeleni uMoya oNgcwele ukuba ugeze lelidimoni egameni likaJesu. Kasivumeleni uthando lukhokhele.
USUKU LWAMATSHUMI AMABILI
ISIHLOKO: UHLELO LOBUYISANA
ISIFUNDO: MATEWU 5:9
Ukubuyisana yikuvuselela ubudlelwano bobungane. Lokhu kungalungiseka kuphela nxa kube lokunanzelela ukuthi kulobudlelwano kumbe ubungane osebuchithekile. Khona kusetshenzwa ngabameli (agents). Ngamanye amazwi, lokhu kudinga kube lomuntu oma phakathi kwabangazwisisaniyo ukuze kube lokubuyisana. Ithemba lokubuyisana liksesekhona loba nje siphila phakathi komumo omubi kumuli, esigabeni, isizwe kanye lomhlaba jikelele.
Kuntshumayelo leyi yasentabeni, kumazwi ezibusiso, uJesu wakhuluma ngokuqakatheka lenzuzo yokuletha ukuthula kulabo abalwayo. Kuvesi 9 uthi,“Babusisiwe abalamulayo, ngokuba bayakuthiwa ngabantwana bakaNkulunkulu.” Kulethela izibusiso kulowo oba ‘ngumfundisi wokubuyisana’. Ukwenza njalo kukwanelisa ukuba ngumntakaNkulunkulu. UJesu njengo mntakaNkulunkulu weza ukubuyisa umhlaba loBaba, ngokunjalo bonke abazithi ngamaKristu bamele baphathe kanjalo limfundiso emhlabeni, okutsho ukubuyisa abalahlekileyo kumbe ubudlelwano osobonakele ebunganini.
Siphila emhlabeni lomphakathi olobudlelwano obephukileyo. Ngesibonelo, ilizwe leZimbabwe lilendlela zokwenza ngazo ukhetho lukahulumende ngemva kweminyaka eminhlanu, olusanda kwedlula lwenziwe nyakenye [2023]. Kumalungiselelo okhetho kwezinye izikhathi kubalamazwi enzondano, ukudilika lokuchitheka kobudlelwano, njalo kwezinye izikhathi ukudilika kobudlelwano lobu buqhubeka langemva kokhetho. Ngaphandle kokwenzakala kwezombangazwe, ibandla leMethodist (MCZ) lalo liba lokhetho lwabakhokheli bebandla iminyaka yonke. Ku2023 kwabalokhetho loBishop oyedwa lonobhala jikelele webandla. Ngokunjalo-ke, indlela zokukhankasela ukuphuma lelunga elilodwa kwezinye izikhathi kungenwa ngendlela ezingayisizo zesiKristu, ezifana nje lezomhlaba kumbe ukwedlula, okubangela ukuthi ngemva kokhetho abanye basale bedabukile lobudlelwano sobulimele. Abanye abafundisi bacina bengasabonani ngeso ngemva kokhetho. Abanye, ikakhulu abafundisi, bacina sebehlukuluzwa ngemva kokhetho, okuyinto edanisayo njalo engakhangelelwanga. Ibandla liqhubeka lilabantu abalamanxeba, kukanti phakathi kwalabo bantu abalamanxeba yibo abamele njalo bayebopha amanxeba abantu esigabeni. Lokho yikuzihlohla ‘elakho ibhola’, nxa sesikhuluma ngomdlalo wenguqu. Lokhu yikuzigwaza ngowethu umkhonto ngasikhathi sinye sisithi simele siyephambili. Ngokunjalo sihle sinqotshwe singakadlali.
Lokhu-ke kwenza kudingeke ukuthi kube lokukhumisana umlotha. Endaweni yokukhombana ngeminwe lokuzama ukudinga ukuthi ngubani ongakuvotelanga kumbe ilunga alifunayo, kumele kudingwe ukuthula lokuhlalisana phakathi kwabanqobi labanqotshiweyo. Ukuthula kakubekhona.. Babusisiwe abalamulayo.
UJesu Kristu uyilizwi lethemba lokubuyisana. Ukubuyisana ayisikho kwamandla ethu okokuthi sesingaziqhenya ngakho kodwa kutsho ukuthi uNkulunkulu usemsebenzini emhlabeni ukuba aguqule okungela themba lomumo omubi ubemuhle ukuze “Umbuso wakhe uze” le “ntando yakhe yenziwe emhlabeni njengokuba isenziwa ezulwini.” Njenga maKristu sibizelwe ukwelapha lokubuyisana emphakathini. Sifumana ngaphi ukutshisekela lokhu? Impendulo esekwalapheni lokubuyisana kuhambo lemfundiso kaJesu Kristu.
Umnakano: Simele singene kumfundiso yokukhumisana umlotha njengabameli bakaKristu.
USUKU LWAMATSHUMI AMABILI LANYE
ISIHLOKO: UKUZIHLAMBULULA
ISIFUNDO: MATEWU 21:12-14
KuTestamente eliDala uNkulunkulu uthi kuma Israyeli, “Liyakuba ngcwele kimi, ngokuba mina Jehova ngingcwele …” (Leviticus 20:26). kuTestament eliTsha, uPawuli uthi kumaRoma, “… Linikele imizimba yenu ibe ngumnikelo ophilileyo, ongcwele, othandeka kuNkulunkulu, kube yikukhonza kwenu” (Rom 12:1). Lokhu kusitshengisa ukuthi ukuhlanzeka kwakukhona njalo iqhubeka iyikukhangelelwe nguNkulunkulu kubantu bakhe.
Kusifundo esibaliweyo sinikezwa isehlakalo sikaJesu ngelanga lokungena kwakhe eJerusalema.UMatewu uyasitshela lapha ukuthi okwakuqala uJesu akwenzayo kwaba yikungena kwakhe eTempelini, leloTempeli lalisaziwa ngobuhle lobungcwele. Kodwa akufica lapho kwakungenye into. Ukukhuleka kwasekungomunye nje umsebenzi ongaqakathekanga osekumqoka sekuyikutshintsha imali, labantu besigaba bethatha amathuba okuhlangana labavela kwamanye amazwe akhatshana ukuzokhonza eTempelini laseJerusalema ukuze benze imali. UJesu wayengelawo amazwi amahle kulababantu ababetshintsha imali. Wawisela phansi amatafula abo njalo wabatshela ukuthi indlu isingcoliswe yizenzo zabo. ITempeli imele ibe yindlu yokuthandazela ngoba kungumthandazo owenza ukuba yakhiwe. Indlu kaNkulunkulu [iTempeli] imele igcinwe ingcwele.
Ekuzwisiseni lokhu uPawuli uthi imizimba yenu ilitempeli loMoya oNgcwele (1Kwabase Korinte 6:19). ITempeli limele livikelwe kukho konke okungalingcolisa. NjengamaTempeli oMoya oNgcwele, amele ahlale ehlanzekile. Okunye njalo, indawo zethu zokukhonzela zimele zilondoloze ubungcwele bazo njalo lobungcwele obuzifaneleyo. Loba yiluphi uhlobo lobubi buyangcolisa iTempeli ngitsho loJesu akala mazwi amahle ngezenzo ezinje. Ngokuba lo esimmelayo uNgcwele, lathi simele sibeNgcwele.
Umnakano: Konke ukungcola okwenziwa ngaphandle komzimba kuyangcolisa ingaphakathi, okutsho iTempeli. Nxa iTempeli selingcolisiwe lokukhonza kuyathinteka. Kasigcineni iTempeli lethu [imizimba yethu] lingcwele.
USUKU LWAMATSHUMI AMABILI LAMBILI
ISIHLOKO: UKUZWISISA IZIKHATHI – ISIKHATHI SOKUHLANYELA
IZIFUNDO: UMTSHUMAYELI 3:1-2; GENESISE 8:22
UZibandlela yinyanga yakuqala yomnyaka. Kulapho njalo abantu abenza izinqumo zabo zomnyaka wonke. Ngamanye amazwi, yiyo eyendlala isisekelo sokuthi umnyaka wonke uzabe unjani, lokuthi lumnyaka uzakusilethelani omunye lomunye. Okuqakathekileyo kulesisikhathi yikuthi sendlale isisekelo emqondweni wethu njengabantu abalenqondo yokulima. Senza amadili okuhlanyela ngoZibandlela. Kulokuphikisana okukhulu phakathi kwemikhubo yamabandla ukuthi lesi senzo siyafunyanwa yini ebhayibhilini, kumbe ukusekelwa libhayibhili. Yebo, silalo usekelo. Enye into ngokuhlanyela yonke nje indawo okulinywa khona yikuthi akubanjwa ngamandla. Uyahlanyela ngoba ufisa ukuvuna njalo uzuze amabele ufake esiphaleni. Kodwa, nxa ubona angani akukusizi ukuhlanyela, kukuwe ukwenza okunye. Yekela labo abadinga inzuzo kunhlanyelo eqotho bahlanyele.
Nxa sikhangela kusifundo esibaliweyo, siyakhunjuzwa ngoNkulunkulu ohlelekileyo yena esimkhonzayo. Ngokuhleka kwakhe uNkulunkulu wahlela izigaba zomnyaka ukuthi kwesinye lesinye kube lokwenzakalayo kusenzakala kusigaba saso. Phakathi kwezigaba zomnyaka uNkulunkulu wahlela isigaba senhlanyelo. Ugenesise 8:22 ukubeka sobala ukuthi isigaba senhlanyelo kasisoze siphele. Lokhu ukutsho ukuthi izigaba zomnyaka ziyahlala zikhona. Ibala elithi inhlanyelo (Seed) litholakala ka116 ebhayibhilini. Ngokunjalo, okuqakathekileyo lapha yikuthi abantu bakaNkulunkulu bamele bazuze inhlakanipho efaneleyo ukuze benze okufaneleyo ngesikhathi esifaneleyo. Ukuhlanyela kwenziwa ngesikathi senhlanyelo.
Okunye njalo, akula muntu okhangelela isivuno lapho angahlanyelanga khona. Into yakuqala kayenziwe kuqala, njalo imele yenziwe kusigaba sayo. Njengabantu bakaNkulunkulu, siyahlanyela ukuthi uNkulunkulu ayandise(Amahubo 65:9-13). Kusigaba esikuso okwamanje yisigaba senhlanyelo. Siyakhuthazwa ukwenza okufaneleyo, ngendlela efaneleyo njalo ngesikhathi esifaneleyo nxa simele sibelesivuno esihle phakathi komnyaka.
Umnakano: Okunye lokunye kulesikhathi sakho. Ngingaphuma njani kusigaba somnyaka esaleso sikhathi? Ngisize Nkulunkulu.
USUKU LWAMATSHUMI AMABILI LANTATHU
ISIHLOKO: UHLONZI LOBUNENGI
ISIFUNDO: 2 KWABASEKORINTE 9:6-9
Uhlonzi lobunengi buqakathekile ekuhlanyeleni njalo kuhamba ndawonye. Kufana lamaphiko amabili enyoni yinye. Ngeke uthathe okunye utshiye okunye, ubusukhangelela izithelo. Kakwenzi.
Kusifundo lesi esisikhangelayo uPawuli upha indlela zokwanda ezenzakala kumpilo yethu yansuku zonke njengabantu abalimayo. Uhlonzi benhlanyelo ehlanyelwayo ngokunye umlimi akukhangela kakhulu nxa elungisa insimu yakhe. Akula simanga esingenzeka kunhlanyelo ehlanyelwe ibolile emhlabathini loba kulezulu elihle elitholakeleyo, kanye lomhlabathi omuhle. Ngaphandle kobuhlonzi, ubunengi labo bumqoka. Umlimi ohlanyela inhlanyelo enengi ulamathuba angcono wokuvuna isivuno esikhulu. Usomabhizimusi ofaka imali enengi kubhizimusi ufumana inzuzo enengi. Nxa sisehlelwa yisilingo sokukhohlwa lindlela loba yisiphi isikhathi simele sizikhumbuze ukuthi uNkulunkulu yena akagodlanga ukupha kwakhe (KwabaseRoma 8:32). Ngokwemvelo lomusa, uNkulunkulu upha ekhululekile njalo uyisibonelo sasezulwni esise duze lathi.
Ngale indlela, sinikezwa ithuba lokuba senze okuhle nxa silungiselela imimoya yethu, umnotho lensimu zethu phakathi komnyaka. Kuyini wena ofisa ukukuvuna? Inhlanyelo yakho, lendlela zakhona sezendlelwe nguPawuli. Ubuhlonzi lobunengi buqakathekile,
Umnakano: Nxa abanye besiya ensimini, sizatho bani esingenza ngisale emuva? Ungatholakali ungaphandle kwesikhathi lesigaba somnyaka.
USUKU 24
ISIHLOKO: UKUHLANYELA UMOYA UVUNE ISIVUNGUZANE
ISIFUNDO: HOSEYA 8:7
Kungaba nguwuphi umhlobo wenhlanyelo onhlanyelweyo uthela izithelo ezinkulu lezilohlonzi kulayo. Indaba yokuhlanyela lokuvuna nxa sikhangela ngokuziphatha isetshenziswa kanengi emibhalweni njalo uHoseya uyisebenzisa kabili (Hosea 8:7; 10:12-13). Lindaba ivela ekuthini ekukhonzeni kwabo izithombe lokubambana lezinye izizwe kwezombusazwe abakoIsrayeli babezama ukuhlanyela inhlanyelo ezakupha isivuno esihle, kukanti babehlanyela umoya njalo bezovuna isivunguzane. Isivuno sasizaba sibi kakhulu okwedlula inhlanyelo ngokwayo.
Kule indaba uHoseya uthi wonke umuntu uzavuna okwedlula akuhlanyelayo okutsho ukuthi kuyabesekudlula inhlanyelo ehlanyelweyo. Inhlanyelo embi izakupha isivuno esibi kakhulu njalo leso sivuno silethele ukuhlupheka okukhulu kuye ohlanyeleyo. Kuzakuba lokuchitheka.
Ngale indlela, nxa sihlanyela (seeding), inqondo zethu azimelanga zikhangele inhlanyelo kuphela siphelele khona. Ukuhlanyela kwethu kumele kuholwe yisivuno esifuna ukusivuna ekupheleni kwesikhathi sakhona. Siyafisa yini ukuvuna isivunguzane? Hatshi kayisikho. Ngokunjalo kasihlanyeleni inhlanyelo enhle.
Umnakano: Isivunguzane pho? Hatshi, mina angiphuphi isivunguzane siyisivuno sami.
USUKU LWETSHUMI AMABILI LANHLANU
ISIHLOKO :QINA, IMPUMELELO YAKHO ILAPHO OKHONA
ISIFUNDO: GENESISE 26:1-13
Ngalezi insuku ’21st Century’ iBandla liphawulwa ngamaKristu azulazulayo. Kulabazulayo lamabandla ehlukeneyo bedinga imvuselelo. Kukanti, lanxa besiyagcwala ngamandla kulawo mabandla laloba bethenjiswe inotho khonale, batholakala belokhu bengabayanga. Baswela ukuhlaliseka okholweni. Isifundo sihle sethulwa kithi siphuma kumbhalo walumuhla.
Umlobi wogwalo luka Genesise usilandisela ngo Isaka ese Gerar. Sitshelwa ukuthi indlala yamemetheka ezweni lapho okwakulo Isaka labanye. Zazinengi indlela uIsaka ayngazithatha ukubalekela indlala. Eyinye kwakuyikuthi aye kwele Gibhithe njengo yise uAbrahama nxa sikhangela incwadi ka Genesise 12:10-20. Kodwa uNkulunkulu wenqabela uIsaka ukuthi aye kwele Gibhithe wamlaya ukuba ahlale kwele Gerar, lapho okwakulendlala khona. Wamthembisa uIsaka ukuthi uzakuba laye phakathi kwaleyo ndlala. UIsaka wamlalela uNkulunkulu wangasasuki.
Kuvesi 12 sithola ukuthi uIsaka wahlanyela izilimo kulelozwe njalo ngalowo mnyaka wavuna amakhulu aphindiweyo ngoba uNkulunkulu wambusisa. Kambe ukuvuna izinkulngwane endlaleni na? Yebo! uIsaka kazange avumele indlala yasezweni ukuthi ibe yisizatho sokungahlanyeli kumbe ukuthi enze lokho okumele akweze. Phakathi komkhathi lomnotho onzima, wahlanyela njalo wavuna isivuno esimangalisayo.
Ibandla lanamuhla kumele lenze lokhu okwenziwa yindodana kaAbrahama. Lokhu kungenxa yokuba abantu bahlala bexolisa nxa sokufika isikhathi sokuhlanyela. Njalo ukuxolisa okuvamileyo yikukhala ngenyanga yakuqala‘January Disease’. Yebo, izinto kazimanga kuhle kodwa asikho esimeni esedlula esikaIsaka. Ungaze usuke kwelinye ibandla uye kwelinye, kuyabe kunjengo kusuka eGerar usiya eGibhithe. Isivuno sakho asikho eGibhithe kodwa siseGerar lapho izinto ezingamanga kuhle. UIsaka waba lokuhlaliseka kulelozwe wahlanyela izilimo njalo isivuno samangalisa ngoba wethemba lowo owamtshela ukuthi ahlale kulelozwe.
Umnakano: Yala ukuzulazula lamabandla. Impumelelo yakho ilapho okhona. Hlanyela izilimo ngalesi isikhathi.
USUKU LWAMATSHUMI AMABILI LASITHUPHA
ISIHLOKO : INHLANYELO IZAKHUNJULWA
ISIFUNDO: UMARKO 14:1-9
Umlobi wevangeli kuMarko usitshela ngokwenzakalayo ngeviki yothando “Pasion Week” kwele Bethany, ngensuku ezimbili kungakafiki iPhasika. UJesu wayesendlini kaSimon owaye lamalepero. Kasitshelwa ngokwenziwa kuJesu ngabanye abafundi kuleyondlu okutsho ukuthi mhlawumbe kwakungekho okuqakathekileyo. Ukucabangela kwethu kungabe kuqondile ukuthi kabenzanga lutho.
Sihlangana lowesifazane olomehluko, owangena phakathi endlini. Kuzamele sinanzelele okulandelayo mayelana ngalowu owaesifazane:
Wayengelandaba ukuthi abanye kabenzanga lutho. Ukwehluleka kwabanye endlini kwakungayisiso isizatho sokwehluleka ukwenza okuhle.
Wathenga amakha adulayo. Uhlonzi luqakathekile nxa sokuhlanyelwa
Wathela wonke amakha ekhanda likaJesu. Kazange athele abafundi. Ukupha kwakhe kwakungelani labanye abantu. Kazange aphe lomnikazi wendlu. Wapha uJesu Kristu. Ukuhlanyela kwakhe kwakukuKristu.
Abanye bakhonona besithi okwenzakeleyo kube yikudlalisa amakha njalo bamthuka kakhulu. Kunjalo lasebandleni lalamuhla. Umsindo omnengi uyaphakama nxa kukhulunywa ngokuhlanyela. Lalabo abanganikeli lutho ebandleni bafuna amazwi abo azwakale bechothoza abanikela ngesihle. Ngempela kuyamangalisa. Owesifazana waphathwa kubi ngabanye abahlali kuleyondlu ababengenzanga lutho. UJesu wangenela wammela. Wabaphumela egcekeni wabatshela ukuthi okwenziwe ngowesifazane kayisikho kudlalisa njalo kwakungasoze kwakhohlakala. Wathi kubo lokhu okwenzakeleyo kuzakhunjulwa lapho kutshunyayelwa ivangeli, ngempela lalamuhla sikhuluma ngaye. Ukuhlanyela kuKristu akutshabalali ngitsho. Ngelinye ilanga kuzakhunjulwa njalo hatshi kanye kodwa ngokunaphakade. Kodwa labo abahlanyela ebantwini bazakhohlakala. Akumelanga simelwe kumbe sidunyiswe ngabantu ,kodwa uJesu uyananzelela kuhle amakha adulayo esimnika wona njengenhlanyelo.
Umnakano: Inhlanyelo yami ayilani labantu. Ngihlanyela kuKristu
USUKU LWAMATSHUMI AMABILI LASIKHOMBISA
ISIHLOKO : YENZA NJENGOBA INKOSI ISITSHO
ISIFUNDO: 1 AMAKHOSI 17:7-16
Ukuhlanyela ngokukholwa langokulunga kuletha izithelo ezinhle. UElija wathunywa nguNkulunkulu ukuba aye kwele Zarephath anakekelwe ngumfelokazi ompofu ngesikhathi sendlala. Nxa sifunda ngalindaba kuvela engathi nguElija owayenakekelwa njalo ekhunjulwe nguNkulunkulu, kodwa iqiniso yikuthi umfelokazi ompofu nguye owayekhunjuliwe. UElija wayengadingi umfelokazi ukuthi aphile, ngoba ngaphambilini uNkulunkulu wayeke wamnakekela ngokuthumela amahwabayi, kodwa umfelokazi wayedinga ubukhona bukaElija emzini wakhe ukuze aphile. Ngokuzwisisa iqiniso leli,uNkulunkulu kasidingi thina ukuthi abe nguNkulunkulu, kodwa siyamdinga ukuze siphile. Lemali yethu kayidingi ukuze abe nguNkulunkulu ngokuba leyo mali ngeyakhe. KuHagayi uNkulunkulu uthi, “isiliva ngelami , legolide ngelami …” (Hagayi 2:8). Yithi esimdingayo ukuba asiphe imali yakhe, ukuze sisinde.
Okufunwa ngu Elijah kumfelokazi ompofu kungakhanya njengokulingwa kumfelokazi. Ngempela wayengacela njani isinkwa somfelokazi owayesele lefulawa lamafutha amalutshwane okwakusanela yena lendodana yakhe ukuthi badle okokucina emhlabeni bafe ngendlala? Nxa sikhangela indaba yomfelokazi singacabangela ukuthi kwakulabanye abantu kuleyo ndawo yaseSidon abafayo ngendlala njalo wayekhangelele ukuthi labo bazakufa. Kodwa kwakulomgoqo owodwa owawuzakwenza asinde. Kwakumele alalele izwi lenceku kaNkulunkulu qha.
Umfelokazi walalela okwatshiwo nguElijah wamphekela isinkwa njalo amafutha kawaphelanga. Kwaba lokudla kwakhe, lendodana yakhe, kanye lo Elija ngalolosuku. Wanikela ngefulawa langamafutha lokhu kwenza ukuba avune okwaneleyo ukuthi aphile yena lendodana yakhe kanye lesethekeli. Ngabe wala ukunikela ngefulawa langamafutha ukuze aphekele uElijah isinkwa, wayezakudla okokucina lendodana yakhe bafe. Lapha sifunda ukuthi isikhathi sokuhlanyela yisikhathi sokuthi sikhunjulwe njalo sithole okokuphila nsukuzonke.
Umnakano: Ungagodli inhlanyelo, ilekhiye yokuvula izibusiso ezingapheliyo
USUKU LWAMATSHUMI AMABILI LASIFICAMINWE MBILI
ISIHLOKO: ULANI?
ISIFUNDO: UJOHANE 6:1-13
Umlobi wevangeli kuJohane usitshela ngoJesu esenyukela entabeni ngemva kokuwela okhunjini olukude loLwandle lwaseTiberiya. Ixuku lamlandela wabakhangela wabona isidingo sabo sokudla. Wabuza omunye wabafundi bakhe (uFiliphu) ukuthi ukudla kokunika isixuku esingako kuzavela ngaphi. UFiliphu waphangisa ukwahlulela ngombono womuntu ukuthi kwakunzima ikakhulu ngalokho okuncane abafundi ababelakho ezikhwameni zabo.
Esikhundleni sokugxila esikhwameni sakhe, u-Andreya wakhangela isikhwama somfana omncane futhi waletha umbiko kuJesu wokuthi kulomfana omncane olezinkwa ezincane zebhali ezinhlanu lenhlanzi ezincane ezimbili, kodwa wagomela ukuthi azanele ixuku. Sifuna ukunanzelela idlela uAndreya achaza ngayo lokho umfana ayelakho, izinkwa ‘zazincane’. inhlanzi ‘zazincane’. Futhi yilokho kuphela izinto umfana omncane ayelazo. Lokhu kungafananiswa lenhlanyelo. Isikhathi sokuhlanyela sibonakala ngokulutshwana okuyabe kusele esiphaleni kube buhlungu ukutshiyana lakho.
Isinkwa lenhlanzi zomfana zathathwa zanikwa uKristu, zababusiswa, abantu badla basutha. Kwaqoqwa izitsha ezilitshumi lambili (12) ngokudla okwakusele. Abantu abangaphezu kwe-5000 badla izinkwa ezincane ezinhlanu lenhlanzi ezincane ezimbili njalo kwasala. Asitshelwa ngalokho uJesu akwenza ngezitsha zokudla okwasalayo, kodwa singanakanela nje. Kungenzeka wanika umfana owayenikele ngokudla kwakhe kosuku okwacina kunjengenhlanyelo eyasetshenziselwea ukondla ixuku
Umfana wenza inhlanyelo ngezinkwa ezincane langenhlanzi ezincane kodwa wasuka lezitsha ezilitshumi lambili (12) esinkwa lenhlanzi. Kunjalo ngokuhlanyela. Lapho abantu bengafuni ukuhlukana lenhlayelo encane abalayo baswela ngamandla izitsha zokusuka lazo. Ukuhlanyela kuqala ngokuncane olakho
Umnakano: Ulani? Kuhlanyele.
USUKU LWAMATSHUMI AMABILI LASIFICAMUNWE MUNYE
ISIHLOKO: UKULINGANA ENKONZWENI YOMUSA
IZIFUNDO: GENESISE 1:26-28; IZAGA 22:2
Nxa kukhona okwenzakala sobala emhlabeni yikudala amazinga kubantu(classes) kusetshenziswa ubulili(gender) kumbe isimo senhlalo (status). Lokhu kudala ukuthi abanye abantu bacabange futhi bazizwe sengathi baphakeme kulabanye, ngokufanayo labanye bazizwe sebephansi. Lokhu kakusiyo nhlonso kaNkulunkulu. Akukho ubulili noma isimo esenza omunye abengcono kulomunye.
Enye yamagugu e-MCZ luhlelo lokunazelela wonke umuntu ngokufanayo. Silokuqiniseka ukuthi asilakho phakathi kwethu ekukhonzeni kumbe kunhlelo zethu ukutshiya phandle iloba ngubani. Asikho isimo somuntu, esingasetshenziswa ukuba bangaphatheki enkonzwei yomusa.
Sitshelwa encwadini kaGenesise ukuthi ekuqaleni uNkulunkulu wabadala owesilisa lowesifazane, futhi bonke babusiswa futhi banikwa ubukhosi phezu kwazo zonke izidalwa eziphilayo. Amandla aphiwa phezu kwezidalwa hatshi phezu komunye lomunye. Lokho ukuqiniseka esilakho njengebandla futhi kuyamjabulisa uNkulunkulu ukusibona sidala indawo yokuthi wonke umuntu wethu abambe indima yakhe ngokugcweleyo kulenkonzo yomusa laphezu kwezimo lezimo ezahlukeneyo. Akukho okungasihlukanisa. Ngitsho lokunotha ngeke kwadala amazinga kithi. Futhi kungeke kwasetshenziselwa ukuvimbela abanye ukuba bahlanganyele enkonzweni yomusa.
Kubuhlungu kakhulu ukuthi kwezinye zezikhundla zobukhokeli bamaBandla ethu ziphiwa ngokuya ngezinga lomuntu lenotho yakhe. Labo abangelazo izindlu lezimota abakhethelwa ezikhundleni zobukhokheli lanxa beleziphiwo njalo besenelisa. Imibono yamaqembu abampofu ayizwakali ezinkundleni zokukhokheli. Eqinisweni lokhu kubi. Umbhali wencwadi yeZaga uletha impendulo. Abampofu labanothileyo bazwisisa ngokufanayo ukuthi uNkulunkulu unguMenzi wabo bonke. Ngakho, ngubani okufanele asihlukanisane? Sonke siyalingana embusweni. Ibandla elisebenzisa amazinga omphakathi kanye lesimo sabantu emisebenzini yobunxusa lalitshengisi ukuba libandla elasungulwa nguKristu njalo walifela.
Umnakano: Sonke siyavumelana ukuthi uNkulunkulu unguMenzi wethu sonke
USUKU LWAMATSHUMI AMATHATHU
ISIHLOKO: IBANDLA ELAKHELWE EDWALENI; UMELI WOKUKHULULWA
ISIFUNDO: MATHEWU 16:13-20
Senziwe abameli enkonzweni yokukhululwa. Umbhali wevangeli ngokutsho kukaMathewu usidonsela ekutheni sazi njalo sizwisise ngesikhundla sethu, kanye lesikhundla sikaKristu sokuba linxusa(umeli) lapho yena [uJesu] ebuza abafundi bakhe ukuthi wayengubani
Kuvesi ka16 uPetro waphendula ngokuveza izinto ezimbili mayelana ngoJesu. Okokuqala, wathi uJesu unguMesiya, okutsho ukuthi ‘ogcotshiweyo’ kaNkulunkulu. Okwesibili, wathi uJesu uyiNdodana kaNkulunkulu ophilayo. UJesu waphendula ngokukhomba ubunxusa babafundi bakhe langesikhundla sabno emsebenzini weNkosi. Kuvesi 18, uJesu watshela uSimoni [Petro] ukuthi “… ungu Petros”. ‘Petros’ ngesiGriki litsho idwala kumbe ilitshe. Waqhubekela phambili ekhuluma ngokwakhiwa kwebandla lakhe. Kodwa, kufanele siqaphele lokho akutshoyo lapha. Loba wathi uSimoni [Petro] wayelidwala kumbe ilitshe [uPetros], akazange athi ‘kuwe ngizokwakha ibandla lami kodwa wathi ‘kuleli dwala’. Ibizo lesiGriki uJesu alisebenzisa esitsho ‘kuleli dwala’ akulona ‘iPetros’ kodwa ‘Petra’. ‘I-Petra’ iyidwala elinganyikinyekiyo. Akazange atsho kuPetro kodwa wazitsho yena ukuthi uliDwala laphakade; ilitshe elaliwa ngabakhi, seliyinhloko yengosi (AmaHubo 118:22). Lokhu kutsho ukuthi ibandla lalikhona, futhi alakhelwanga kuPetro, ngoba wayengumuntu, kodwa kuJesu Kristu. Alikho ibandla elingakhelwa phezu kwabantu. Kuliphutha elikhulu ukucabanga ukuthi iba ndla lakhelwe phezu kwethu. Ngeqiniso, singaba lamandla emabandleni ethu kodwa ibandla alakhelwanga phezu kwethu. Abantu [Petros] bangamanxusa nje kaKristu. Kuvesi 19, wabanika umlandu womsebenzi wokukhulula, khona okwakumqoka. UPetro, omele ibandla, wanikezwa amandla ezintweni zasezulwini ngokusebenzisa lowo mlandu. Lokhu kutsho ukuthi ibandla lithole izihluthulelo zokukhulula abantu emasangweni esihogweni libangenisa emasangweni ezulu.
Kungumlandu webandla ukubona ukuthi ukukhululwa kwenziwa kubo bonke kungelani lobulili isimo somnotho, umhlobo, isimo somtshado, imvelaphi,……. Akumelanga kube lemgoqo ebekwayo ukuze umuntu akhululwe. Ukngaqedisisi ‘ngoPetro’ umfundi kanye no’Petra’ iDwala udala ukuthi abantu abanengi ebandleni balahleke becabanga ukuthi baphakeme kulabanye kumsebenzi wokukhululwa kwabantu. Bacabanga ukuthi bangakhipha amadimoni kangcono kulabanye, liphutha lelo. Ngaphandle kwalokho, uJesu wayetshele uPetro ukuthi lokho ayekutshilo kwakungayisikho ngokuhlakanipha kwakhe, kodwa wakwambulelwa nguYise osezulwini. kakho umuntu okumele aziphakamise ebandleni. Singabantu nje ‘Petros’ sihlangana ku’Petra’. Okuqakathekilyo kayisikho ‘uPetros’, kodwa ‘uPetra.
Umnakano: Amandla okukhulula kumele asetshenziswe kodwa ngasetshenziswa kubi.
USUKU LWAMATSHUMI AMATHATHU LANYE
ISIHLOKO: UKUTHOBELA
ISIFUNDO: 1 SAMUWELI 3:1-10
Ukuthobela kuyinto enhle nxa sikhuluma ngobumeli. Kuqala ngokunanzelela ukuthi bakhona abasezikhundleni eziphezulu kulasami. Ukwehluleka ukuzwisisa lokho kwenza ukusebenza kwethu kube lokuxokozela.
Umlobi wogwalo lwakuqala kuSamuweli wethula isehlakalo esenzeka eShilo. USamuweli njengomfana omncane wayekhonza ngaphansi kuka-Eli, okutsho ukuthi ngaphansi kokuqondiswa, ukwelulekwa lokunakekelwa kuka-Eli. Kwakungaleso sikhathi sokukhonza ngaphansi komuntu uNkulunkulu ambiza khona uSamuweli phakathi kobusuku. Ibhayibhili lisitshela ukuthi umfana omncane wagijima waya ku-Eli ecabanga ukuthi ngu-Eli owayembiza. Kodwa, ingabe uSamuweli waphosisa izwi likaNkulunkulu lelikaEli? Eqinisweni hatshi.
Uvesi 7 engasisiza ukuzwisisa ukuthi kwenza kalani. Sitshelwa lapha ukuthi uSamuweli wayengakayazi iNkosi, futhi izwi leNkosi lalingakavezwa kuye. Lokhu kwakungayisiyo imfihlo kuNkulunkulu.
UNkulunkulu wayesazi ukuthi uSamuweli wayengalazi izwi Lakhe, ngakho wasebenzisa izwi lika-Eli, uSamuweli ayelazi. UNkulunkulu wakhuluma ngezwi lika-Eli. Ngezinye izikhathi uNkulunkulu ukhuluma lathi ngalabo esibaziyo. Ngakho, uSamuweli akazange enze iphutha. Wezwa izwi lika-Eli limbiza futhi wagijima eqondise kuEli. UNkulunkulu wakwenza ngamabomu lokho ukuze afundise uSamuweli isifundo esikhulu ngokuzithoba. USamuweli ‘wayelobizo’ lamandla, kodwa wayengelalo ulwazi olujulileyo ngezinto zikaNkulunkulu. U-Eli wayengelalo ‘ubizo’ ngaleso isikhathi kodwa wayelolwazi njalo uNkulunkulu wayesazi ukuthi uSamuweli wayengeke abe yisithunywa sakhe ngaphandle kokusizwa u-Eli. Wayedinga ulwazi lukaEli ukuze abekwazi ukuthi kwakunguNkulunkulu owayembiza, njalo lendlela yokuphendula lokuziphatha lapho uNkulunkulu ebiza. Lokho kwakungenzeka kuphela uba u-Eli embonisile umfana omncane
Ibandla lanamuhla lakhiwa ngabantu beminyaka ayahlukeneyo kanye leziphiwo. Isizukulwane esincane sigcwele amandla njalo benza izinto zenzeke ngokuphangisa, futhi lokho kuhle. Isizukulwane esidala kancane kancane,njalo ezikhathini ezinengi banamathela isiko lasendulo. Impumela yikuthi isizukulwane esincane sisola isizukulwane esidala ngokungabi loMoya kaNkulunkulu, futhi abafuni ukuvumela inguquko.
Ngakolunye uhlangothi isizukulwane esidala sisola isizukulwane esincane ngokuphambuka ezimisweni eziqondileyo. Lokho kuliphutha. Akumelanga sisolane kodwa sizuze ulwazi olulusizo komunye lomunye. Isizukulwane esincane, njengomfana uSamuweli, singaze sibe lawo wonke amandla, umoya, ubizo, ….., kodwa abalayo into eyodwa okuyinto isizukulwane esidala, njengo-Eli, esilayo, futhi esihlangene laso empilweni. Sidinga ubizo lamandla kaSamuweli, lokuhlangenwe lakho kuka-Eli ukuze siphumelele Isizukulwane esincane kumele sizithobe esizukulwaneni esidala, futhi isizukulwane esidala sisize isizukulwane esincane siqonde ukuthi empeleni nguNkulunkulu osebenza kuso. Asincedeni isizukulwane esincane siqonde izwi likaNkulunkulu, lendlela yokusabela lokuziphatha lapho uNkulunkulu ebiza
Umnakano: Ukuzithoba kuyinto enhle. Ibandla lidinga kokubili abancane labanamandla, futhi abadala abalolwazi ekusebenzeni.
Methodist Church: Hillside Circuit 
You must be logged in to post a comment.