IVIKI LEZIMULI LEMIZI – 2024
INDIKIMBA: ABAMELI BAKAKRISTU (2 KWABASEKORINTE 5:20)
Click or tap on the day number of your choice to jump down the page to the notes for that day:
Isingeniso
Umhubi usifundisa ngobuhle bemuli nxa ibambene (Amahubo 133). Imuli ebambeneyo iyindawo ebiyelwe izibusiso.
Kuthokozisa uNkulunkulu ukusibona siphila ndawonye ngothando, ngokuthula langokuzwana. Ngalokhoke, impilo yemuli ngeke izwisiseke njalo isebenze ngaphandle komlayo ongcwele. Sifanele silandele imilayo ebalulekileyo yalowo Owaqala ukuyibumba imuli.
Ngokuzwisisa lokho, siyahlangana njalo njengebandla sihlonipha lokukhumbula lokho uNkulunkulu ngokwakhe akumisa wakwenza kwabangcwele, yonake imuli. Lolugwalo lulungiselwe ukuthi sibelesikhathi sokukhumbula sicabangisise nxa sifuna ukumisa izimuli zethu kusimiso esililizwi
likaNkulunkulu esingeke sanyikinywa yilutho. Izihloko zalolugwalo zikhethwe zamiswa ngendlela ezaphathisa omunye lomunye emulini ukuthi azibone lapho ami khona lendima okufanele ayidlale kulesisimiso esibusisekileyo kangaka.
Ugwalo lolu luza ngesikhathi esifaneleyo lapho sesiphila emhlabeni osekusenzakala izinto ezitshiyeneyo esezisenza imuli ibonakale ngendlela engakhangelelwanga ngayo. Silifisela iviki elibusisiweyo lokufunda ngemuli lemizi yethu.
Revd. Dr. K. Paradza (Mission Director)
Isibongo
Umsebenzi wogwalo lweviki yokufunda ngeMizi yethu leMuli lulungiswe nguMfundisi uG. Hokonya. Sithanda ukuyibonga kakhulu lincekukazi kaNkulunkulu ngomusa wokwabelana lathi
ulwazi ngalokhu akuqoqileyo. UNkulunkulu akambusise.
Lungakapheleliswa ugwalo luhlolisiswe nguMfundisi W. Machirori, siyambonga ngokuzinikela kwakhe. Amakhomithi ethu abona ngendimi ezitshiyeneyo ayinsika yamandla ethu izikhathi zonke ngokuba lesiqiniseko sokuthi sithole ingwalo ngendimi zethu zakuqala esizisebenzisa ngekhaya ngesikhathi
sonke. Ngalokhuke, lolugwalo lweviki yeMizi yethu leMuli lutolikwe ngeSiNdebele nguMfundisi B Phiri, Nkosikazi Makoni, Nkosikazi Lemu bephathisana lo Nkosikazi Tshuma.
Sithandazela ukuthi izibusiso zandiswe kuzitsha ezizinikeleyo njengalezi.
UNkulunkulu kabusise imuli zamaWisili ngaleliviki esikhangela khona iMizi yethu leMuli.
Revd. O. Chagudhuma (Research and Publications Coordinator)
ILANGA LAKUQALA
AMAHEBHERU 10:25
SINGAYEKELI UKUHLANGANA KWETHU, NJENGOMKHUBA WABANYE, KODWA ASIKHUTHALE FUTHI IKAKHULU NJENGOBA LIBONA USUKU LUSONDELA.
AmaKhristu ayakhuthazwa ukuhlangana isikhathi ngesikhathi ukuze bahlale beqinile kuKhristu. Sihlangana ngamaSonto onke enkonzweni langamanye amalanga ayabe ehlelelwe ukudumisa
sindawonye. Kwenze kubeyimpilo yakho ukungasweleki emibuthanweni enjengale.
Izizatho zokungabi labanye.
Yiziphi izizatho ezivame ukuphiwa ngamaKhristu ehluleka ukuhlangana labanye?
Ziqiniseke kanganani lezozizatho?
Kuyaxwayiswa ukuba uthole isikhathi sokukhonza ngoba uzacina usiba lezizatho zokungenzi konke okufanele ukwenze njengomKhristu.
Ingxoxo
Uzwa njani nxa ukhuthe inkonzo?
Kuqakathekile ukungena inkonzo ngesikhathi sonke, ukuhlangana labanye ekuhlabeleni, ukungena izifundo zamakilasi lezinye inhlelo zokudumisa okuzo.
Khuthaza abantwabakho ukungena imihlangano yokudumisa lokukhonza labanye. Asikhuthazeni abemuli labangane babengamaKhristu ngokubanxusa enkonzweni ngoba labo bayingxenye yemuli.
Inkonzo zethu kanengi ziqala ngezifundo zamakilasi.
Aqakathekile kakhulu amakilasi ngakho kufanele kube yimvamo yethu ukuwangena. Nxa silenkonzo zaphakathi kweviki, zama kakhulu ukubakhona.
Indlela esipha ngayo izaziso ifuna siyiguqule. Isibonelo yikuba uGosa athi, “NgeNsonto siqala ngamakilasi ngo10am inkonzo yethu ibengo11 am.” Kokubili kuqakatheke okufanayo,
akuthiwe inkonzo yethu iqala ngo10am ukuze sibuthane ndawonye sibeleizifundo zeBhayibhili. Lokhu kungantshintsha indlela yokuza kwabazalwane kanye lezethekeli.
Ukuzihlola ngamunye
Hlola indlela ohamba ngayo enkonzweni lakunhlanganiso yakho ubone ukuthi injani. Ulokupha okuyizizatho okuthile zokungayi na?
Singadeli ukuhlangana ndawonye ukuze sikhuthazane njalo sikhule emoyeni.
ILANGA LWESIBILI: UMVULO
ISIHLOKO: UKUQAKATHEKA KWEMITHANDAZO YEZIMULI
IZIFUNDO: KWABASE-FILIPHI 4: 6, AMANANI 6: 24- 26
Njengezimuli sidinga imithandazo yokuvikelwa, yokuqondiswa, ukunikezwa amandla ngezikhathi zokulila, imithandazo yokuthula, ukwelatshwa, ukuvuselelwa kanye lokubonga. Njalo siyathandazela imicimbi eyenzakalayo; imihloliso, imitshado, inhambo kanye lokunye okunengi esingakuthandazela.
Imuli ethandaza ndawonye ihlala ndawonye njengokulotshiweyo ku Amahubo 133: 1 lapho isithi, “Kuhle njalo kulungile kangakanani uma abantu bakaNkulunkulu behlala ndawonye ngokubambana”. Ukubambana kubuyisa ukuthula emulini, sifanele ukuthandaza ndawonye izikhathi zonke. Lokhu kuzakusinikeza amandla okulwa loSathane ndawonye.
Njengemuli, sifanele ukuba lesikhathi sokuthandaza ndawonye kugoqela lezisebenzi zethu kanye lezivakatshi. Imithandazo yansuku zonke izakwenza uhlale uphakeme emoyeni. Ngoba, ilanga ungelamthandazo lifana lelanga ungelamandla.
Sifuna izibusiso zemuli empilweni zethu. AmaNani 6: 24- 26 isifundisa ukuba singafisa njani kanye lokuthandazela izibusiso zemuli zethu. Yifunde lindima njalo. Ncedisanani ngamazwi asekelayo izikhathi zonke.
Umphostoli uPhawuli unikeza amazwi okukhuthaza kanye lomthandazo ethi “ngakho konke ngomthandazo langokubonga izicelo zenu kazazakale kuNkukunkulu”. Ngezinye izikhathi siyehluleka ukubonga uNkulunkulu ngezibusiso besesinika izicelo kuphela. U-Phawuli usifundisa ukuthi silinganise imithandazo yethu. Ukubonga kutshengisela ukuba siyamukela uNkulunkulu asenzela khona, simbonga izikhathi zonke.
Nikeza ilunga linye ngalinye lemuli ukukhokhelela imithandazo. Yindlela enhle yokufundisa abantwana ukuthadaza. Ncedisanani ngemithandazo.
ILANGA LESITHATHU: OLWESIBILI
ISIHLOKO: IMISEBENZI YEZANDLA KANYE LOKUTHUTHUKISWA KWEMIZI LAMABHIZIMUSI LEMULI
IZIFUNDO: UDUTERONOMI 8: 18
UGENESISE 2: 15 “INKOSI UNKULUNKULU
YASIMTHATHA UMUNTU, YASIMBEKA ENSIMINI YASE EDENI UKUBA AYILIME, AYILONDOLOZE”
Sebenza endaweni yakho. Umkhonomi esiphila kuwo awumanga kuhle. Sileholo elincane njalo abanye abantu kabala holo lokukhuluma ngalo. Imuli ezinengi sezisenza imisebenzi eminengi yezandla lamanye amabhizimusi. Umuzi wakho kawube yindawo yakho yokusebenzela.
Ngesikhathi saleliviki lezimuli lemizi xoxanini ngezindlela elingazenza ukusekela amabhizimusi kumbe imisebenzi yenu yezandla elingabe liyenza kulezinsuku. Zama ngazo zonke indlela ukuthi ilunga linye ngalinye lemuli libe yingxenye yalokhu. Kuqakathekile ukusekela imisebenzi yezandla engabe isenziwa yimuli, kungaba yikulima, ukubhekha, isitolo leyinye nje.
Xoxanini ngezifundo ezilandelayo:
Izaga 10: 4 “Izandla ezingasebenziyo ziveza ubuyanga, kodwa izandla ezikhutheleyo ziyanothisa”
Izaga 11: 1 “Isilinganiso esikhohlisayo siyisinengiso eNkosini”
Izaga 16: 3 “Nikela eNkosini konke okwenzayo”
Uma uthole inzuzo gcinela ikusasa. Bonke abantwana labazukulu emulini bafanele ukusekela imisebenzi kumbe amabhizimusi ekhaya besebenza ndawonye ngokubambana.
Dingani ibhizimusi elingalenza njengemuli, lingaqala phansi likhula lisiyaphambili
UDuteronomi 8: 18. INkosi uNkulunkulu yiyo elinikeza amandla okuzuza.
U-John Wesley wathi yena-
“Zuza konke onganelisa ukukuzuza”
“Gcina konke onganelisa ukukugcina”
“Nikela konke onganelisa ukukunika”
Uyaqhubeka esithi “kungabi ngokubangela ukulahlekelwa yimpilo yakho”. Okutsho ke ukuthi konke okufaneleyo ngokokholo lwesiKristu ekwenzeni ibhizimusi kufanele ukulandelwa. Kuzame, kungaba yikuguquka kwempilo yakho.
ILANGA LESINE: OLWESITHATHU
ISIHLOKO: UKUXOLELA KUMQOKA KUBO BONKE UBUDLELWANO ESILABO
ISIFUNDO: KWABASEKOLOSE 3: 13
Ngokuchasiswa, ukuxolela kulibanga elithathwayo ekususeni imizwa engafanele enjegenzondo komunye umuntu kumbe iqembu labantu elingabe lingakwenzelanga kuhle; kungakhathalekile ukuba bafanele ukuxolelwa kumbe hatshi.
Ukuxolela kuyisitshengiselo sothando. Isikhathi sonke lapho sisenza umthandazo weNkosi siyathembisa ukuxolela abanye ngokuba iNkosi yasixolela. Kasibeni mnene ekuxoleleni ngoba
kungumthwalo kulowo ongaxoleliyo.
Siphila phakathi kwabantu abaseduze labakhatshana.
Bayasiphambanisa kodwa kumele kube lisiko lethu ukuxolela.
Yekela kwedlule njalo unikeze ithuba amaphutha abanye
Kuyisibonelo esilamandla ukuthanda abakonelayo
Kuyakha ubudlelwano njengalokhu uKristu wasixolela izono zethu
Siyimuli njalo laba abaxolelayo balakho ukuthwala imithwalo yabanye. Funda ukuthi phepha njalo lawe funda ukwamukela uphepha
U-Matewu 18: 21- 22 yingxoxo etshengisa ukuthi awufanele ukuxolela ngokubala ukuthi sewonelwe kangaki. Ukungaxoleli kuyavalela imithandazo yethu {U-Makho 11: 25}
U-Matewu 5: 23- 24 unikeza umcijo oqakathekileyo wokuba ngezake udlulele phambili ngomnikelo wakho ungazange waxolela kumbe ubuyisane lomunye wakho. Yikho ke okutshengisa ukuqakatheka kwaleyindaba. Ukuxolela kuza kuqala kulominye imicimbi.
Kasiqaleni ngokuzixolela thina ekusileleni kwethu besesixolela iloba ngubani ongabe esonele sicele njalo lokuxolelwa.
Umhlaba ungaba lokuthula uma singaba ngabaxolelayo.
ILANGA LESIHLANU; OLWESINE
UKUGQOKA OKUMNYAMA NGOLWESINE
Ukugqoka okumnyama ngolwesine kutshengisa ukuthi uyingxenye yohlangothi olusebenzela ukuthi umhlaba ongela ukudlwengula lo kuhlukumezeka.
Emazweni wonke ukuhlukumezeka kwabantu ngobulili yisenzakalo esiqotho kodwa esifihlakeleyo ngoba abahlukunyezwayo bengakhulumi besesaba ukuhlazwa lokuqhubeka behlukunyezwa. Kungakho sonke silomsebenzi wokukhuluma ngokuhlukuluzana.
UGenesisi 1; 27, 28 isinika isibonakaliso sokuthi uluntu lwabunjwa ngomfanekiso kaNkulunkulu njalo saphiwa isibusiso lobukhulu. Kungakho asibonaneni njengabantu abalomfanekiso kaNkulunkulu; asisoze sahlukumeza omunye umuntu odalwe ngomfanekiso kaNkulunkulu.
KwabaseRoma 12; 9-10 ‘’ Uthando lwenu kalube qotho.
Zondani okubi, libambelele kokulungileyo. Thandanani ngothando lobuzalwane, liziqhenye ekuhloniphaneni.’’
KwabaseGalathiya 6; 10 ithi yona silethuba lokwenza okuhle kumuntu wonke. Amakholwa akumelanga alethe okubi ngokuphambanisa amalungelo abanye.
Asibikeni amacala okudlwengulwa lamanye amacala okuhlukuluzwa. Kube ngumsebenzi wethu ukuqeda ukuhlukuluzwa komoya, ukutshaywa njalo leminye imihlobo yokuhlukunywezwa.
Balani uTitosi 3: 2
UJakobe 1; 19 itshengisa ukuthi abantu benelisa ukuzibamba imizwa yabo noma beqaliwe.
Asiqedeni ukudlwengula lokuhlukunyezwa njalo sisebenzise ucingo lwamahala 0808 0551.
ILANGA LESITHUPHA OLWESIHLANU
UKUHLANZA INDAWO YANGEKHAYA
Asinikeleni ilanga lalamhla ukukhangela ngaphandle okugombolozele imizi yethu. Susa izibi zonke ezigombolozele umuzi wakho, ugcine utshani bubuncane njalo lezihlahla zilungisiwe zizinhle.
UDuteronomi 23;12-14 Siyakhuthazwa ukuba lezambuzi zokusebenzisa ngekhaya.
Kulohlupho olukhulu ngokulahlwa kwezitshubo zakulezi nsuku, amaphampa. Xoxani ngokuthi singawalahla njani amaphampa ukuze engagcwali yonki ndawo.
Siyenelisa ukulahla izibi endaweni ezifaneleyo; asikwenzeni kuhle.
Amanani 35;34 Asingeke sangcolisa lapho esihlala khona, abantu asisahloniphi indawo lamagceke; ngokuthengisa izidakamizwa lokulahla nje amaphampa indawo yonke lalapho okuhlala khona abantwana kumbe abedlula khona.
Lokhu kwenza befune ukuzama ukubona ukuthi kanti vele kwenzakalani ungabhema okusuka kube kubi.
UMtshumayeyi 3 uyasifundisa ukuthi konke kulesikhathi sakho, njalo uvesi 6 uthi kulesikhathi sokulahla. Siqala emkhulwini, asilahleni imiganu esimidala engasafanelanga ukungcinwa; ngena endlini ongcinela ukudla njalo ususe ukudla konke osekudlulise isikhathi ukulahle. Sinanzelele ukunganiki abanye abantu ukudla osokudlulise isikhathi.
Siqhubeke siye emahodurophini, sisuse izigqoko ezinye sinike kwabaswelayo. Singakuxoxa lokhu Labantwana bethu abalempahla ezincane besesizinika abaswelayo.
Liqhubeke lasemagalajini lezinye izindlu zokugcinela impahla lihlanze.
Asikhangeleni njalo kuzakhiwo zethu zesonto, sikhangele ingwalo zezinto, singathola kulezinye izinto ezingasuswa kumbe zithengiswe. Sikhangele lasevestri lapho esikhuleka khona labatshumayeli.
Asenzeni indawo zethu zihlaleke njalo zihlanzeke, lizazithanda indawo zenu kulomoya omnandi njalo kuhlanzekile yonke indawo.
ILANGA LESIKHOMBISA UMGQIBELO
UKUNIKELA EMSEBENZINI KANKULUNKULU
Imideni yonke iyingxenye yohlelo lukaNkulunkulu olungcwele. Imideni ilomsebenzi wokukhuphula izinga lomsebenzi kaNkulunkulu.
Okwetshumi lomnikelo kuyingxenye eqakathekileyo ekuzimiseleni koMkhristu. Ngokunika sibeka uthando lwethu ngoNkulunkulu ngaphambili kwemali. Ukunika kuncedisa isonto ukuthi kutshunyayelwe ilizwi lokuba lokunengi kulowo onikayo.
Ukwethemba kwakho kuyavivinya ngokwetshumi. Isonto lomdeni kumele kubambane hatshi ukuncintiisana.
1 Imisebenzi 20; 35 Kubusisekile ukupha kulokwamukela. Sonke siyazidinga izibusiso ezivela
kuNkulunkulu ngakho sinikela kumbe kukonke okwenzelwa ukudinga imali ngomsebenzi
kaNkulunkulu.
Abantwana labo kumele banikele esontweni Abantwana beSunday School Labantwana abafundayo bayingxenye yesonto ngakho kumele labo banikele.
Besesikhuthaza abantwana bethu abasebenzayo ukuthi labo banike ngokuthembeka kuNkulunkulu ngoba wonke umuntu kumele anike. Abalomusa bayazifica beneme njalo belesizatho sokuphila, njalo belempila kahle.
Ukunika abaswelayo UMatewu 6;2-4
2 Ngakho, nxa unika isiphiwo, ungakhalisi uphondo phambili kwakho, njengokwenziwa ngabazenzisi
emasinagogeni lasezindleleni ukuba badunyiswe ngabantu. Ngiqinisile ngithi kini; Sebewamukekele umvuzo wabo.
3 Kodwa wena nxa unika isiphiwo, isandla sakho sokhohlo kasingakwazi esikwenzayo esokunene sakho
4 Ukuze isiphiwo sakho sibe sekusithekeni, loYihlo obona ekusithekeni uzakukuvusa.
Indatshana leyi ingokunika abampofu, asingazibonakalisi.
Xoxani ngemihlobo yokunikela esiyinika kuNkulunkulu njalo lichasise ukuqakatheka kwayo
Khagelani ku GENESISI 14;19-20, Eksodusi 35;22, uDuteronomi 14;28-29
Ukunika ngezikhathi ezinzima; 2 KwabaseKhorinte 8;1-5
Asipheni ngokupheleleyo noma kungalula ngoba kuyikuzinikela kuhambelana lezibusiso zakho. Kubizwa kuthiwa yikulinganiswa kwesipho ngaso sonke isikhathi ubuya kuAlithari. Sinika ngothando singabanjwa ngamandla.
Siphiwe izandla ezimbili ezimela ukunika lokwamukela.
Methodist Church: Hillside Circuit 
You must be logged in to post a comment.