Mission Month 2023 (Ndebele)

Click or tap on the day number of your choice to jump down the page to the notes for that day:

ISANDULELO
Isisekelo sokuqala (Pillar 1) kugwalo lwe Strategic Plan lweBandla lama Methodist siyagcizelela ekubuyisweni kwabantu kuKristu ukuze kubelokukhula kunani lamalunga eBandla. Ukubuyiswa lokondliwa kwemiphefumulo yikho okuyisiqokoqela ebandleni, njalo kungumlandu wethu sonke ukuthi sibise kukristu iloba umphefumlo owodwa nje. Kusukela phansi kwaleyinjongo, uJesu wahlangana labagoli benhlanzi oLwandle lwase Galile (Matewu 4: 18- 22). Izigaba ezintathu kulindaba zizasincedisa ukuqedisisa ukuthi lumsebenzi ufunani, okuyikuthi ‘woza’,- ‘ngilandela’ njalo ‘ngizakulenza’. Lokhu kutsho ukuthi kulendaba yokubizwa, (woza): kubelendaba yokufunda kumnini womsebenzi (ngilandela) besekusibanjalo lendaba yokuguqulelwa umsebenzi (ngizakulenza). Yikho lokhu okwenza injongo yomsebenzi ibeliqiniso njalo ibe lezithelo.
Ukufa kukaJesu esiphambanweni kakuqedanga injongo kaNkulunkulu kodwa ngokuvuka kwakhe linjongo yavuselelwa njalo yaqiniswa. Ngemva kokuvuka, uKristu wabuthanisa abafundi bakhe wabanikeza amandla (Matewu 28: 16- 20). Wabalaya abafundi ukuthi basabalale benze abanye abafundi. Okunye njalo, umlayezo wokucina kaJesu utsho ukuthi uNkulunkulu uyakhetha lokuhlomisa abantu kulowumsebenzi. Ukwengezelela, umlayezo wokucina kaJesu yisithembiso esikhulu sikaNkulunkulu, lesipho eBandleni, sibambelela sethembele emazwini kaJesu athi, “Ngizakuba lani kuze kube sekupheleni.” Isibusiso esingakanani sobukhona bukaNkulunkulu kulomyalezo lowu. (Matewu 28: 20).
Sisemoyeni ofanayo, yiso ke lesi sikhathi lapha sihlangana khona njengamaWesili endaweni ezehlukeneyo zokukhonzela, eziQintini, kuma Sekethi lakumabandla ukuthakazelela lokukhumbula ukuhlanganyela kwethu kuleyinkonzo yokubisa abantu kuKristu. Lolugwalo lulungiselwe ukusisiza ukuthi sithathe indawo yethu emsebenzini kuNkulunkulu lebandleni. Kakuthi ke, sonke isifundo esikulolugwalo sikuphefumulele njalo sikufuqe ekwenzeni umsebenzi kungabi sekukhulumeni kuphela. Ekuthatheni indawo zethu, siyakhunjuzwa njalo ukuthi ukuhlanganyela kulomsebenzi kuyikubonakalisa uthando. Uthando lwethu ngalowu msebenzi luyasinikeza amandla ukuthi sifumanise ibandla likaKristu izinto ezifanele ukusetshenziswa ukuze lale limile.
Sengathi uNkulunkulu angabusisa amaMethodist
Revd Dr. K. Paradza
(Mission Director)

^^ go back to the top ^^

ISIBONGO
Ugatsha lwe Research and Publications lubonga kakhulu ibandla ngokulinikeza ithuba lokuqoqa lokukhutshwa kwezingwalo, okuyikuthi lolugwalo ngolunye lwemisebenzi yakhona. Lokhu kuza ngemva kweqiniso lokuthi ama Methodist ‘bangabantu ababalayo’, njalo lolusiko lwathabathwa kumsunguli weMethodism uqobo lwakhe- uJohn Wesley. Kungasenani, umuntu wanelisa ukubala kuphela lokhu okulotshiweyo. Ngezinye indlela, sithi; ‘Kungekho okubhaliweyo akukho ukubala’. Ngakhoke sifuna ukwedlulisela isibongo sethu kulaba abafundisi: E. Madaka, J. Mangwende, S. Chiramba, S. Mugova, B. Tshuma, kanye lo O. Chagudhuma ngokuphumisa lolugwalo. Lolugwalo lwatolikelwa kusiNdebele yilaba abathi Rev. C. Sibanda, Rev. S. Ndiweni, Rev. N. Ndlovu, uSakhile Ncube, lo Lizzie Tshuma; lwahlelwa ngu Nks. Sithembile Ncube. Siyababonga ngokuzinikela kwabo okungaphenzulu.
Siqhubeka sibonga ubukhokheli bebandla lethu elikhokhelwa ngu Presiding Bishop umfundisi u G.T Mawire, Connexional Lay President ubaba u G. Hanyane, uNobhala jikelele uDokotela M. Mujinga, Mission Director u Dokotela K. Paradza, amaBishop lama Lay President eziQinti ezehlukeneyo, abafundisi bonke ngokugcina limbali iphila. Inhlangothi zethu ze Research and Publications eziQintini lokhu ziqhubeka zisiba ngamehlo lendlebe zethu phansi, ngakho baqakathekile kithi. AmaKomiti ethu awenlimi ezehlukeneyo basebenza gadalala ukubona ukuthi wonke obizwa kuthiwa ngumMethodist endaweni zonke uyaluthola ugwalo lwakhe ngolimi lukanina. Benza umsebenzi omkulu kakhulu phansi lapha. Abokucinake, esibabongayo ngabe-Connexional Bookshop ngokusebenza gadalala lokubona ukuthi leligugu liyafika ezindaweni zonke okulamaMethodist khona, eLizweni langaphandle kweLizwe ngendlela zonke ezibalulekileyo. Liqembu eliqakathekileyo leli.
Sengathi iNkosi ingabusisa abantu abathiwa ngamaMethodist
Revd O. Chagudhuma
(Research and Publications Coordinator)

^^ go back to the top ^^

Usuku Lwakuqala
Isihloko: INkosi yemvuselelo lokubuyisela
Isifundo: AmaHubo 85:1-6

Ibhuku lamaHubo luluhlu lwezingoma. Ihubo ngalinye liyikunanzelela okwenzakala embalini yesizwe sako Israyeli kumbe kwabanye abantu bakoIsrayeli,(Amahubo 85). Abantu baka Nkulunkulu abakoJuda bamonela uNkulunkulu wabajezisa ngokuvumela ukuthi banqotshwe ngu Nebukhadineza inkosi ye Bhabhiloni ngomnyaka ka 605 BC. Abaprofethi abanengi okunjengo Jeremiya 29:1 babe profithile ngalesisiga.Ukuhlala kwabo eBhabhiloni kwakuyi nkohliso njalo kungelula.Impilo yabo yokukholwa yabhidlizeka. Nxa sibala kumaHubo 137 siyananzelela ukukhala kwabo ngobunzima abahlangana labo baze behluleka lokuhlabelela iNkosi yabo loba ukutshaya amachacho.
Ngokuya kwesikhathi izinto zaguquka ngoba uCyrus inkosi ye Persia eyayinqobe amaBhabhiloni yavumela abako Israyeli ukuthi babuyele kwabo ngomyaka ka 535 BC Sebevunyelwe, ihlekana labuyela inengi lachithakala ePersia. Ekufikeni kwabo ekhaya izinto azizange zibelula. Ubukhulu beJerusalama njengesigodlo sikaNkulunkulu basebungasekho. Ubukhulu buka Juda njengesizwe esikhulu babungasekho ngoba kwase kubonakala ihlekanyana lizama ukwakha abanengi basebechithekile. Kwakungela ngqubekala phambili eyenzakalayo ngeminyaka engamatshumi ayisikhombisa begqilaziwe. Abazali babo bafela ezizweni. Ukuziqhenya ngokuba ngabakhethiweyo kwaku ngasekho.Basebe khangelelwa phansi.
Kungenxa yembali leyi lapho umlobi wamaHubo enanzelelela ukuthi uNkulunkulu wabenzela umusa wababuyisela elizweni labo. Kodwa kunengi okwakumele kwenziwe nguNkulunkulu kuphela, okwakuyikuvuselelwa lokubuyiselwa kwesizwe ebukhosini baso.
Umlobi uyananzelela ukuthi lanxa basebebuyele elizweni labo ,uJuda wayelokhu engumsebenzi kaNkulunkulu, ngakho kwase kumele aqede lokho ayekuqalile, imvuselelo lokubuyiselwa kwasekudingakala.
Indaba leyi ilokwenza ngomumo wesizwe sakithi, ibandla, izimuli labantu nje. Nxa sikhangela imnyaka emine-emihlanu edlulileyo siyavuma ukuthi kuke kwaba lesikhathi lapho impilo yethu ike yema mpo. Ngempela ke imvuselelo iyadingakala . Ukubuyiselwa kuyadingakala njalo nguNkulunkulu kuphela ongakwenza lokho.

Umnakano
AmaHubo akhuluma njani ezimpilweni zethu lamhlanje?

^^ go back to the top ^^

Usuku Lwesibili
Isihloko : Ukuvuselelelwa ukuqhuba umsebenzi
Isifundo : 2 KwabaseKorinte: 8: 1-5

Ukuze ibandla liphumelele ukuqhuba inhloso yalo emsebenzini kaNkulunkulu, amalunga alo kumele bazinikele kulowo msebenzi. Sebebalutshwana abantu abazinikele kulo umsebenzi, inengi lipha izizatho zokungenelisi ukuphathisa emsebenzini webandla beqamba ubunzima bomnotho welizwe njengesizatho esikhulu esibenza bengenelisi ukupha ebandleni. Bayalibala ukuthi uKristu ulabo ebunzimeni babo . Leyiyo ingqondo abafundi ababelayo lapho uJesu ebasa endaweni yabo bodwa . Baphikisana loJesu ebatshela ukuthi baphe abantu abazinkulungwane ezinhlanu ukudla. Ingqondo yabo yayi yikuthi bangeke bakwenze lokhu ngoba besegangeni. (UMarko 6 v 4 ) bekhohlwa ukuthi nguJesu owayebalethe kuyonale indawo, njalo elabo kuyonaleyo ndawo . Asingeke sitshele uJesu ukuthi siphakathi kokuhlupheka yena ekhona phakathi kwakho. Akulasizatho sokwehluleka ukusiza umsebenzi weNkosi.
Kulesi isifundo salamuhla uPawuli uncoma ibandla leMakedoniya ngalokho elalikwenzile ngokuphathisa ibandla. Kunengi esingakufunda lapha:
Bona bazinikela kuqala
Phakathi kwezinhlupho babethokoza, kabazange badinge ukuhawukelwa
Phakathi kokuswela bapha ngamandla
Kukho konke banikela ngokwedlulisileyo langa phezu kwamandla abo.

Umnakano
Kambe umumo wethu wedlula owaseMakedoniya okokuthi singeke sinike emsebenzini webandla na?

^^ go back to the top ^^

Usuku Lwesithathu
Isihloko: Sivuselelwe ukuba ngabameli baka Kristu
Izifundo: 2 KwabaseKorinte 5 v 20; UMathewu 28: 18-20

Umeli ngumuntu owaziwayo oyisithunywa, uyibuso balowo ameleyo. Abamele uKristu yizithunywa zikaNkulunkulu eziqakathekileyo ababizelwe ukumemezela izindaba ezimnandi, lokuhola abantu ekulaleleni uNkulunkulu.Ukuthunywa okukhulu kusenza sibengabameli bokusabalalisa indaba ezimnandi bemele umbuso wezulu. Wonke amaKristu alomlandu wokuhambisa ilizwi ezindaweni zonke lakuyo yonke imihlobo yabantu.
Injongo kaNkulunkulu yikuthi sitshumayele ilizwi abantu baphenduke njengoba umlayo usitsho ku Mathewu 28:18-20 ucindezela okumele kwenziwe .Umsebenzi lo kawumanga kumele kube lengqubela phambili ebandleni kwabaseGalathiya 4:4-5 uPawuli uthi “Kodwa kwathi isikhathi sesiphelile uNkulunkulu wathumela iNdodana yakhe yazalwa ngowesifazana yazalelwa ngaphansi komlayo ukuze ihlenge abangaphansi komlayo ukuba samukele ukuma kwamadodana”. Ibandla lithunywa ngaphi? Kulabo abagqilaziweyo ,iziphofu,abangaziyo lalabo abangakamukeli izindaba ezimnandi. Ukuba ngumeli kulemivuzo ebalisela ilungelo lokwamukeliswa okusuthisa umzimba kanye lomoya uMathewu 6:33, uvikelo lwasezulwini lokuba lamandla phezu kwakho konke uLuka 9:1. Ngakho kumqoka ukuthi ibandla liqakathekise umsebenzi wokuvangela.Ukuvangela kubobonke ngabo bonke.

Umnakano
Ukuvangela ngalezi insuku akusafani lakudala ngoba umhlaba usuguqukile. Ngakho kudingeka amaqhinga lemizamo emitsha ukuze umsebenzi wokuvangela uphumelele. Yiziphi izindlela ezingasetshenziswa libandla ukuze libe lokunanzelelwa ikakhulu ezindaweni ezintsha ?
Siyenza okwaneleyo yini emsebenzini ka Nkulunkulu?

Umthandazo
Nkulunkulu siphe amandla okwenza umsebenzi wakho osiphe wona.

^^ go back to the top ^^

Usuku Lwesine
Isihloko: Linda amandla kaMoya logcobo lwakhe
Isifundo : IMisebenzi 1: 6-5

ULuka kusahluko sokuqala encwadini yeMisebenzi yabaPostoli,usitshela ngeziqondiso abazamukelayo kuKristu engakenyukeli ezulwini .Ngakho- ke umsebenzi uqhutshwa kuhle nxa umuntu esethe wagcotshwa waphiwa lamandla wokusebenza. Abafundi bamelela ugcobo luka Moya oyiNgcwele kuqala. Ngezinye indlela uJesu wayebalaya ukuthi kumele bamelele ukuhlonyiswa kuqala bengajahi.
Nxa sithunywa emsebenzini uNkulunkulu uyasipha amandla ngokwentando yakhe. Njenge bandla sidinga amandla ezulu ukuze sisebenze ngokwentando kaNkulunkulu, akumelanga sijahe kodwa kumele silindele ukuphiwa amandla. SiloNkulunkulu olomusa lesihawu ongasivuselela aguqule umhlaba ngokusebenza kwalaba abathumileyo. Njenge bandla nxa sikhangela umbhalo, uJesu usesehlukana labafundi abesebakhuza, “akusikho okwenu ukwazi, ngokunjalo asikho kwenu ukubuza…” Walaya abafundi ukuthi balindele amandla ayezakwehlela phezu kwabo ngoMoya oNgcwele. Umsebenzi webandla ugxile ekugcotshweni nguMoya oyiNgcwele okuyiwo onikeza ibandla amandla okuqhuba umsebenzi.

Umnakano
Kuyini okungenziwa ukuze sibe lamandla njalo sihlale silawo kanye logcobo emsebenzini ka Nkulunkulu?

Umthandazo
Nkulunkulu sikhulekela amandla lo gcobo ukuze siqhube umsebenzi wakho.

^^ go back to the top ^^

Usuku LweSihlanu
Isihloko : Ukusiliswa lokukhululwa
Izifundo: ULuka 4v18

Umsebenzi kaKristu ogoqela ihlangothi ezintathu utshengisa ukuthi uNkulunkulu uyakhathalela ukuphelela kwethu.Okwenyama loko moya womuntu kuqakathekile emehlweni ka Nkulunkulu.Ezincwadini kusobala ukuthi umsebenzi ka Jesu wawungo wokusilisa lokukhulula abagulayo.Iziphofu, abolobulepheru, izacuthe lalabo ababelama dimoni basiliswa basindiswa. Kungenxa yalokhu ukuthi njengama Wisili, sidinga amandla ovuko luka Jesu, ngoba uNkulunkulu uyasebenza. Umbhalo uyafakaza ukuthi uNkulunkulu uyelapha lokukhulula. Sikutsho lokhu ngoba kukhona ukungaqedisisi ngalolu daba ngoba abanye bethu bacabanga ukuthi lokhu kulabanikazi. Lanxa uNkulunkulu engasebenzisa abanye abantu, iqiniso yikuthi ukusiliswa lokusindiswa kuvela kuNkulunkulu ngo Jesu Kristu.
Isimilo salokhu kungaba ngokulandelayo konke kusenzelwa udumo lukaNkulunkulu:
1 Okumasinyane
Ukusila kwenzakala ngesikhatshana ngamandla ka Nkulunkulu okungeke kwenziwe ngumuntu kungela Jesu phakathi kodwa ngokudlulisela koMoya oyiNgcwele. UNkulunkulu nguye yedwa osilisayo. KuTestamente elitsha ukusila kwakungathathi isikhathi eside kodwa kwakusenzakala khonapho. Lanxa kukhona lapho okwakuthatha isikhathi, isibonelo uMathewu 17 v 19-21. Kodwa ke ukubona usila ngemva kwesikhathi akutsho ukuthi ukusiliswa akwenzakalanga ngaleso sikhathi.
2 Okungapheliyo
Ukusiliswa nguNkulunkulu kwakuhlala impilo yonke yomuntu .Umuntu owayesilisiwe kwakungadingeki ukuthi ahlale ebuyela edinga ukusiliswa.
3 Okulokuqiniseka
Ukusiliswa okuvezwa kuTestamente Elitsha kwakulobufakazi. Abantu ababe siliswa kwakungabantu abaziwayo kuzakhamizi njalo lemikhuhlane yabo isaziwa. Lokhu kusiliswa okwakulesiqiniseko kwafakaza ukuthi uJesu ungubani, kanye lamandla abapostoli (Mathewu 4:28; Mathewu 8:8-13; Marko 5v 23; Imisebenzi 8v7; 9 v 40; 28v8) Kuyini osekonakele kul’ umhlaba wethu? Zonke inkonzo zokusiliswa lokukhululwa esizibonayo ngezabantu abangasibo bahlali bendawo yalapho. Lokhu kusenza sibe lemibuzo ukuthi kambe lokhu ayisizinto ezihlelwe ngaphambilini ukuze bahugele abantu ezinkozweni zabo.

Umnakano
UNkulunkulu usasebenza yini ngo Jesu Kristu langamandla kaMoya oyiNgcwele?
Ukusiliswa lokukhululwa kambe lokhe kusenzakala khona kube ngokumasinyane, okungapheliyo njalo okuqinisekileyo?

^^ go back to the top ^^

Usuku LweSithupha
Isihloko: Ukuzinikela emsebenzini kaNkulunkulu
Izifundo: Luka 9: 23 – 26

Ukuzinikela kuyinkolelo eqinisekileyo, kuyi kusebenza umuntu ezidele esenza isifungo kumbe isithembiso. AmaKristu amanengi alendlela zawo zokuzinikela. Bayakhuluma kodwa bengenzi ukwenza kwabo kukhuluma kakhulu kulenkulumo zabo.Ukuzinikela emsebenzini kaNkulunkulu yikuzikhethela njalo njengamaKristu kumele sihlale sizinikele kungelani lomumo osihanqileyo. Ukuzinikela kwethu ukusebenzela uNkulunkulu kumi kunjalo kukuhle kumbe kukubi. Ukuzinikela emsebenzini ka Nkulunkulu akubanjwa ngamandla.Nxa abantu bebanjwa ngamandla ukuthi bezinikele emsebenzini ka Nkulunkulu umsebenzi awuphumeleli. Ukuzinikela kudinga inhliziyo evumayo ngoba kufuna isikhathi lamandla akho: (KwabaseKolose 3:23; Mathewu 16:24; Joshuwa 6:15)
Nxa ukuzinikela kusiya kukhula kudala ukuba umuntu athathe ukuqhutshwa komsebenzi lemibono yenhlanganiso abeyingxenye yakho, besekusiba lokuzidela lokuthembeka. Okunye okuqakathekileyo yikuthi ukuzinikela lokhu sikwakha njani.Ukuzinikela kungakhiwa:
Ngokwethembeka
Ukusebenza kuhle
Ukuhlala usebenza
Ukuba ngofundisekayo
Ukuba ngovumayo, lozimiselayo
Kulesi isifundo uJesu ucacile ukuthi ukumlandela kudinga ukuzinikela okuphezulu .Kumele umuntu azihlolisise adingisise ngenzuzo lokungamlahlekela azimisele ngakho konke okungenzakala.

Umnakano
Kuyini okunqabela amaKristu ukuzinikela emsebenzini kaNkulunkulu?

Umthandazo
Nkulunkulu sisize sizinikele emsebenzini wakho.

^^ go back to the top ^^

Usuku Lwesikhombisa
Isihloko:Ukweyamana kuqakathekile emsebenzini kaNkulunkulu
Izifundo: Kwabase Efesu 4:16; 1 KwabaseKorinte 12

Ukweyamana kuyikubambisana lisebenza ndawonye. Lokhu kutsho ukuthi omunye lomunye udinga usizo komunye ukuze sifinyelele ukusebenza ngokupheleleyo, yibo UBUNTU. Encwadini yakhe yakuqala KwabaseKorinte uPawuli uyasikhumbuza ukuthi sonke singumzimba olezitho ezehlukeneyo osebenza nxa izitho zisebenza ndawonye ( 1 KwabaseKorinte 12). Nxa sikhonza, sinikela sifunda njalo sikhula ndawonye njengebandla imithandazo yethu lamandla ethu ezimalini lokukhuthazana kwethu kwenza sibumbe umzimba wamaKristu olamandla okuphumelela emisebenzini engeke yenziwa ngabantu abangazwananiyo ekusebenzeni. Amabandla ethu atshengisa amandla kaNkulunkulu enza sisebenzelane ndawonye Kwabase EFesu 4:16, ugcizelela ukweyamana kubudlelwano ebandleni lapho ekhuluma ngomzimba obanjaniswe yimsipha. Amalunga ebandla kumele amanyane enanzelele lezipho ezitshiyeneyo ezingasetshenziselwa ukukhula kwebandla. Izitho zonke ziqakathekile ebandleni akukho okumele sikhangelelwe phansi.

Umnakano
Kuyini okwenza abantu bakhangelelwe phansi ebandleni lokubandlululwa?
Singakuqeda ngani lokhu?

Umthandazo
Nkosi loMsindisi wethu,sisize sihloniphe njalo siqakathekise umuntu munye ngamunye ukuze umbuso wakho ukhule.

^^ go back to the top ^^

Usuku Lwesificaminwembili
Isihloko: Ukuvuselelwa kokholo lamandla
Imibhalo: Isaya 40:29-30; AmaHebheru 11 :1-7

Ukuphila kungumgodla oxubeneyo, futhi ngaphakathi kwalowo mgodla kulezinkinga lezimo ezenza abantu bokholo bakhathale futhi balahlekelwe lukholo ngalesosikhathi. uMphakathi wako Israyeli ngesikhathi sikaIsaya wabhekana lobunzima lezimpi ezivela e-Asiriya lakwezinye izizwe. Ngenxa yalokhu, baphetha ngokuthi uJehova akabanakile. Isizwe esazizwa singafunwa, silahliwe futhi lokho kwasenza sazehlukanisa kakhulu loJehova njengoba sasicabanga ukudinga ezinye indlela. UIsaya ungena lombiko wesiprofethi othi insindiso lokusinda akulakutholakala iloba ngaphi njalo yonke imizamo iyize. Njengoba labo esicabanga ukuthi balamandla sibenza izibonelo zethu belakho ukukhubeka bawe, bakhona abangayi kukhubeka bawe. Yilabo kuphela abalindela iNkosi esimweni esinzima kangaka abayovuselela amandla abo lamandla okuqhubekela phambili. Lapho abantu bekuzimo ezibahlukuluzayo badinga umuntu ozabatshela ukuthi kuzadlula. Zinengi izikhathi lapho amaKristu ezwa sengathi uNkulunkulu kasabanakile, njengesikhathi seCovid19, lapho inengi lethu lalahlekelwa ngesibathandayo, lemisebenzi, impilo yaqala ukuba lobunzima, abantu bonke bathinteka ngendlela ezitshiyeneyo. Okuphazamisa kakhulu ngalesi isikhathi yikuthi abanengi balahlekelwa lukholo lamandla kuNkulunkulu.
Njengoba ubhubhane seludedile lungasabulali njengaphakathi keminyaka ka2020 lo 2021, abanengi bethu abakakwazi ukubuyela endaweni yakuqala, abakatholi amandla lokholo okuthi baqhubeke lempilo egcwele ithemba. Ezikhathini silingwa kangaka, kulesidingo sokuthi kufike elinye ilizwi lisitshele ukuthi silindele uJehova futhi sithembeke kuye ngoba ngaphandle kokholo, akulakwenzeka ukujabulisa uNkulunkulu njengoba umbhali wamaHebheru ekubeka sobala. UEnoch, uNowa lo Abrahama baphumelela ngenxa yokukholwa. Lokhu kakutsho ukuthi kuhambo lwabo kabazange bahlangane lobunzima. Ubunzima babukhona kodwa bamelana labo banqoba baze bayatshaya intambo. Kasigcineni ukholo lwethu ngesikhathi sobunzima.

Umnakano
Linganani izinga lokukholwa kwakho kulobunzima obhekane labo?
Uyenelisa ukuma lokugcina ukholo lamandla akho phakathi kobunzima obhekane labo yini?
Kuyini esingakwenza ukuze siqhubeke sivuselelane ekukholweni lasemandleni?

Umkhuleko
Vuselela ukholo lamandla Baba wethu osezulwini ngalesi sikhathi sokulingwa.

^^ go back to the top ^^

Usuku Lwesificamunwemunye
Isihloko: UNkulunkulu ulindele ukuzwa imithandazo yethu
Imibhalo: Amahubo 85:4-9; Jeremiya 33:3

IMethodist isungulwe ngomthandazo, lamaWisili bangabantu abakhulekayo. Leli siko lithethwe kuye uMfundisi omkhulu uJesu Kristu onguMsindisi wethu. AmaWisili aqhubeka azuza lelisiko lomkhuleko kuJohn Wesley umsunguli weMethodist. Abazalwane bakaWesley kanye labanye abafundi abambalwa babizwa ngokuthi yi “Holy Club” ngabanye abafundi base Oxford University ngoba babephila impilo yomthandazo.
Kulezikhathi lapho thina, njengabantu loba ibandla esasisuke ebukhoneni bukaNkulunkulu ngenxa yezinhlupho ezinjenge zomnotho lenhlalo, inkinga zemtshado, kanye lokusetshenziswa kubi kwezidakamizwa ngabadala labantwana, lokunye okunenginengi. AmaHubo 85, kulotshiwe embhalweni lapho amaJuda esephumile ebugqilini beseBhabhiloni basebefuna ukubuyiselwa isikhathi esasibalahlekele, lamathuba alahlekayo, lokuphila okwabalahlekelayo. Ukuthunjwa kwakubonakalisa ukubathukuthelela kukaNkulunkulu. Ngendlela efanayo, ngezinye izikhathi sihlangana lobunzima, kuyisibonakaliso sokuthukuthela kukaNkulunkulu ngenxa yokuthi kungenzeka siyekele ukuthandaza. Ngakhoke, isidingo sokubuyela kuNkulunkulu ngomthandazo kanti loNkulunkulu ulindele ukusizwa lokwamukela imithandazo yethu.
Njengebandla, ekuhluphekeni lasekuncindezekeleni, kuhlala kulesidingo sokuthandaza futhi ibandla elithandazyo lilibandla elinqobayo. UNkulunkulu uhlala ekhona etholakala ukuphendula izicelo zethu. Abantu bakaNkulunkulu, bekusimo esiphansi kakhulu futhi bebuthakathaka, lapha bafundiswa indlela yokukhuluma loNkulunkulu. Kasingayekeli ukuthandaza loba sisesigodini, kasingapheli amandla ngenxa yezimo, kodwa kulalokhu sithuthukise isimo sengqondo sokuthandaza iloba ngasiphi isikhathi. IBandla lakuqala kuMisebenzi 2, laba libandla eliqinileyo ngenxa yokuthandaza futhi lathi singenza okufanayo.

Umnakano
Kambe siseselaso isikhathi, ukulangazelela kumbe amandla okuthandaza?
Silawo yini amaqembu okuthandaza njengoJohn Wesley esase University?
Kasicele kuNkulunkulu ukuthi avuselele amandla ethu okuthandaza ukuze sikwazi ukufeza umsebenzi esithunywe ukuba siwenze.

Umkhuleko
Nkulunkulu ophilayo njalo osithandayo, sikhuleka ukuthi uvuselele ulangazelelo, lamandla okuthandaza lokukudumisa. Siphe amandla amatsha lapho siqhuba umsebenzi ophambi kwethu.

^^ go back to the top ^^

Usuku Lwetshumi
Isihloko: Ukuba nguMfundi
Imibhalo: KwabaseEfesu 4:23; KwabaseRoma 14:17; KwabaseKolose1:13

Inhloso yebandla iphathelane lokondla amakholwa ukuze abe ngamaKristu avuthiweyo. Lapho sitholela uMbuso kaNkulunkulu imiphefumulo, kudingeka ukuthi sibondle ukuze labo bazinikele ukuba ngabafundi. Amahamente afanele agcizelele imfundiso efaneleyo. Kubandla lase Efesu, umlobi ukhuluma ngokuvuselelwa kwengqondo, umbiko ofanayo udluliselwa kwabaseKolose (KwabaseKolose 3:10), lapho athi ibandla kalibe lesimo esitsha, esivuselelwa ekumazini lowo owamdalayo. Lapho amakholwa ekhuliswe ngendlela efaneleyo, balakho ukukhohlwa okwayizolo bamukele indlela entsha yokuphila (KwabaseEfesu 4 :22); akhethe indlela acabanga ngayo (Kwabase Efesu 4:23); avumele isimo sakhe sikaKristu, asuse konke okungamvimbela ukukhula. Icebo likaNkulunkulu ngelokuthi abantu bonke bathole usindiso, ngakhoke ivangeli kalibe ngelabo bonke njalo wonke aphatheke kulo. Lokhu kutsho ukuthi abaFundisi labalandeli balomlandu njengoKristu oweza ukuzofuna lokusindisa abalahlekileyo. (Marko 1:16). Loba kunjalo, kulezici ezithile ezivimbela umsebenzi kaNkulunkulu esimeni sobufundi ezinjenga lezi; ukuzesabela, ukuziqhenya, ukuzicabangela wena wedwa, ukungazithembi lokungaqaphelisi. Nxa ubufundi bungenziwa ngendlela eqondileyo, abantu bazakuzwa njengo kutsho kukaPawuli kwabaseRoma.
Olunye uhlupho oluhlangana lemizamo yokuba ngumfundi yikuthi abantu bangakunqabela. Lapho uSanibhalathi loThobia besizwa ukuthi uNehemiya ufuna ukuvuselela imiduli yeJerusalema, bamdabukela bazama ukumenqabela. Kodwa-ke, uNehemiya wayelomoya oqinileyo wokwakha imiduli eyayidilikile. Sihlala sihlangana lezitha lapho sifuna ukuvangela, kodwa kumele siqine sisazi ukuthi singabanqobi ngoKristu osenelisayo.

Umnakano
Kungaba yiphi indlela yokukhulisa amakholwa amatsha lamadala?

Umkhuleko
Siyabonga Baba ngokusibizela emsebenzini wobufundi.Sinike amandla okuqhubekela phambili lanxa sigombolezelwe yibunzima.

^^ go back to the top ^^

Usuku Lwetshumi lanye
Isihloko: Akulutho ngaphandle koMusa
Imibhalo: 2Petro 3:18; KwabaseEfesu 2:8; Genesise 39:1-4

Ukubuyiselwa kwenelisisa umuntu ukuthi aphile ngomusa. Omubi wahluthunela inengi indawo yabo emuseni. Ngokutsho kuka John Piper, “umusa ungamandla hayi nje ukuxolelwa” lokhu kuchaza ukuthi umusa awuwona nje umusa nxa sonile kodwa uyisipho sokwenelisa lamandla kaNkulunkulu ukuba singoni. Johane 1:12-13 usidonsela ekwazini ukuthi bonke abakholwayo futhi abamukela uJesu Kristu banikwe igunya lokuba ngabantwana bakaNkulunkulu. Ukuphila emuseni yikukholwa lokulandela uJesu Kristu, futhi sizuza amandla kaNkulunkulu. Nxa umuntu ebuyiselwa emuseni, ukhokhelelwa ngamandla kaNkulunkulu. Lapho umusa usukutholile, uba ngumanqoba kuzozonke izinto empilweni yakho. Wonke umuntu uzakunanzelela ukuthi khukhona okwahlukileyo ngawe.
Okwesibili, umusa uyakuphakamisa. Umbhalo ku Genesise 37 ulezindaba ezidanisayo empilweni kaJosefa. UJosefa ubonakala ekhangelane lokuwa kwakhe ngazo zonke indlela. Ezondwa ngabafowabo, bemfisela ukufa, wehliswa waba yinto engathengiswa, wathengiswa wahanjiswa ezizweni, kodwa kukho konke lokhu, watholwa ngumusa. Esetholwe ngumusa, kwaqhubekela phambili wamvezela lalowo owayemthengile okokuthi wayengeke engamnaki. Ku Genesise 39:1-4 uthi uPhotifa wabona ukuthi iNkosi yayilo Josefa wamenza waba ngumsizi wakhe. Kodwa-ke, lapho sifuna ukuthi umusa usithole kumele sithembeke.

Umnakano
Kwenzakalani lapho sitholwa ngumusa?

Umkhuleko
Siyabonga baba ngokusithola ngomusa lothando lwakho olungakhethiyo.

^^ go back to the top ^^

Usuku Lwatshumi lambili
Isihloko: Ukubuyiselwa ukuze siphumelele
Imibhalo: Jobe 42:1-17; Jeremiya 29:11

Ukubuyiselwa kuvela ngemva kokulahlekelwa okuthize. Ngokunjalo ukubuyisela kujonge ukwenanisela lokho okwalahlekayo. Kuyimvelo kaNkulunkulu ukuma lababuthakathaka, abancindezelweyo, abalimeleyo, kanye labalungileyo. IBhayibheli lichaza uJobe njengomuntu owayenothile njalo elungile. Wayenothe okokuthi abantwabakhe babelakho ukwenza amadili amanengi endlini yomunye lamunye bethakazelela ukuzalwa kwabo. Wayelemihlambi yenkomo, izimvu, amakamela, lokunengi. (Jobe 1:1-21).
Kusenjalo, izinto zajika ngokuphazima kweso. Yonke imfuyo, abantwana, lokunengi kwatshabalala kwatshiya uJobe enqunu, engumyanga. Ekwamukeleni lokho okwakumehlele uJobe uthi, “ Ngaphuma ngize esiswini sikamama, ngizabuyela khona ngize; iNkosi yapha, iNkosi ibuye yathatha kalidunyiswe ibizo leNkosi” (Jobe 1:21). Kukho konke ukulahlekelwa kwakhe uJobe wala elokhu ethembekile phambi kukaNkulunkulu. Uobe waba lokulahlekelwa okukhulu kakhulu kodwa wala elokhu ethembekile kuNkulunkulu.
Kwezinye izikhathi uNkulunkulu uyavumela ukuthi sihlangane lenhlupho ezinjenge zikaJobe kuyindlela yokuvivinya ukholo lwethu lokumthanda kwethu. Ukubuyiselwa kuletha impumelelo kubantwana bakaNkulunkulu. UJobe wabuyiselwa (42:1ff)ngenxa yokwethembeka kwakhe phakathi kwezilingo zonke lezi. Kodwa-ke kumele sikwazi ukuthi ukubuyisela akutsho ngempahla kuphela kodwa kuphakamisa lemiphefumulo yethu. Isaya 61:7 uthi sizakubusiswa ngokuphindiweyo kulokuhlambalazwa. Kumele sihlale sikhulekela ukubuyiselwa, khona okuzabonakala ngokuphumelela.

Umnakano
Kambe kuyini osokukulahlekele? Lona ibandla selilahlekelwe yini?
Singakuthola njani okulahlekileyo?

Umthandazo
Nkosi yethu, sibuyisele ukuze sithole lokho okwasilahlekelayo.

^^ go back to the top ^^

Usuku Lwetshumi lantathu
Isihloko: Sivuselelwe ukumkhonza kuzimo zonke
Umbhalo: Habakuki 3:16-19

UHabakkuk waphila ngesikhathi sinye loJeremiya. Kusahluko sakuqala (1:2-4) uHabakkuk ukhonona ngobugovu obuveza izimilo zabantu bakoJuda. Izono zabantu bakoJuda yizo ezazizabaholela ekuthunjweni yiBhabhiloni. Ukuthunjwa lokhu kwakusitsho ingozi enkulu kubantu bakaNkulunkulu.
Ngokunjalo, silanda isiphetho sesahluko sesithathu (3:17ff) uHabakkuk wathandaza esithi ukukhonza kwakhe kanye lokubonga akukho esimweni esingabonakala ngamehlo. Loba into zonke zingagonqama, loba umkhiwa ungavezi impoko, kungekho izithelo evinini,liphuthe ukuthela, amasimu angavezi ukudla, izimvu zichithwe esibayeni, kungabi khona inkomo esibayeni, uthi yena uzakuthokoza eNkosini. Yiso isimo sengqondo somuntu ozwisisa ukuthi ubudlelwano bakhe loNkulunkulu abeyamanga ekufumbathisaneni. Kasikhonzi uNkulunkulu ngoba kukhona asiphe khona. UNkulunkulu kasifumbathisi ngezinto zalumhlaba ukuze simkhonze. Simkhonza ngobunguye bakhe, hatshi ngoba kukhona asenzele khona. Phakathi kwezimo zonke simkhonza ngoba unguBaba wethu, uMdali wethu njalo.

Umnakano
Kungaba kuyini okufuqa ukukhonza uNkulunkulu ngensuku zalamuhla? Kungaba yibudlelwano, ukwesaba kumbe izinto zalumhlaba?

^^ go back to the top ^^

Usuku Lwetshumi Lane
Isihloko: Ukuzehlisa yisimilo esibalulekileyo ekwenzeni umsebenzi kaNkulunkulu.
Isifundo: UJohane 3:30; KwabaseFiliphi 2:5-11

Okunye kwesimilo zikaJesu esiswelakala emabandleni ethu lamuhlanje yikuzehlisa. Esikhundleni salokhu, ukuziphakamisa kusibulele njalo kuqhubeka kusibulala. Nxa sifuna ukubayizitsha ezibalulekileyo endlini yeNkosi, kufanele sizehlise. Ukuzesihlisa yiyo insika yokukhonza kwethu okungasetshenziswa ekuphenduleni imimoya elahlekileyo.
UJohane uMbhaphathizi wayemdala kuloJesu ngenyanga eziyisithupha ngokuzalwa (Luka 1:36). Phezu kwalokho, uJohane waqala ngaphambilini kuloJesu isifundisi sakhe ngoba nguye owaphendlela uJesu indlela. Ngokunjalo, uJesu eqala esakhe isifundisi, kwaba lenhlupho ezinengi phakathi kwabalandeli bakaJohane. Abafundi bakhe bazizwa kungani bayethuselwa njalo babefuna ukuqhathanisa uJesu loJohane. Eqinisweni, babezama ukunika uJohane umfanekiso wokuthi uJesu umncinyane kulaye loba laye wayeseqale ukubhaphathiza abantu. Kwaba yisimanga kubo, uJohane kavumanga umbono wabo lokuzama kwabo ukumhuga. Kusahluko setshumi lantathu, wabavezela sobala abafundi bakhe ukuthi, uJesu kumele aphakame; yena uJohane anciphe. Yikho ukuzehlisa okudingakalayo phakathi komsebenzi kaNkulunkulu.
Ukuzehlisa kusenza sigxile njalo seyame Kuye, hatshi ukuzithemba. Ukuzehlisa ngezinye zempawu eziqakathekileyo umKristu wonke okumele abelazo, njalo nxa singazehlisi ngeke sabangamaKristu apheleleyo. Umoya wokuzehlisa owawukuJesu kumele ubephakathi kwethu, njalo lokhu kuyasenza sibe ngamadodana lamadodakazi apheleleyo kaNkulunkulu. Kasikhethi ukuzehlisa, kodwa kufanele sizehlise. Ukuzinza kanye lokuphumelela kwebandla kuqalisela emandleni amalunga ebandla ukuthi bazehlise. AmaKristu wonke ngakho ke, ayakhunjuzwa ukuthi basusele khatshana ukuziqhenya ngoba kubulala umuntu kanye lebandla.

Umnakano:
Yiziphi izifundo esingazithatha kundima esiyibalileyo.?
Kuyini okuvimbela abanengi bethu ukuzehlisa njalo kuyini okuyinzuzo kithi ngokuzehlisa?

Umthandazo
NjengoKristu wazehlisa, sifundise lathi ukuzehlisa njengamaKristu.

^^ go back to the top ^^

Usuku Lwetshumi Lanhlanu
Isihloko: Sivuselelwe njalo sabuyiselwa ukunxusa isizwe ukuba sivuselele ukuzinikela kwaso.
Umbhalo: ll ImiLando 34:14-33

Isimo salowu mbhalo sibonakala ngokunganaki mayelana ngezenkolo loba ukunganaki kwabantu lapho kufanele ukuthi banakekele isizwe ezindabeni zenkolo. Ukuphatheka kwezenkolo kwakuyinhlalayenza lesiko labantu kodwa babengasazinikelanga ngeqiniso kuNkulunkulu. Amakhosi ayevume ukuthandaza izithombe sebelahle ukukhuleka kweqiniso kuJehova. Ngolwazi oluncane uJosiya ayelalo ngokukhuleka uJehova, wacela ukuvuselelwa ngokomoya kwabantu njalo waqala umvukela wenguquko mayelana lokukhonza izithombe. Ngemva kokuthola incwadi yomthetho futhi ezwile kuyo, uJosiya wabiza isizwe ukuba sivuselele ukuzinikela kwaso kuNkulunkulu. Wabona ukuthi ukukholwa nje akwenelanga kodwa ukukhuza isizwe ukuthi sihleleke. Elizweni lalamuhla, ukunganaki kusichaza kangcono isimo sethu sengqondo ngezinto ezikamoya. Sithatha izono zethu kalula, sikhonona futhi sisole izimo ngalokho esiyikho. Siphila elizweni lapho phose yonke imitsho yeBhayibheli khathesi seyenziwa amabizo amabandla, kanti lokuwohloka kokuziphatha kuya kusanda.. IBandla libizwe ukuba libe lilizwi labangezwakaliyo futhi limelane lezimiso zobugwelegwele, incindezelo kanye leminye imikhuba engamukelekiyo. Abakhokheli belizwe kumele bazi ukuthi balomlandu wokwenza okufaneleyo njalo nxa besehluleka, iBandla kumele lingenele limelane njalo libakhumbuze ngomsebenzi wabo.

Umnakano
Kambe silawo yini amandla okukhuluma lokubizela isizwe ekukhulekeni uNkulunkulu ngomoya langeqiniso na?
Silemfundiso bani njalo kambe siyilizwi labangakwazi ukuzikhulumela na?

Umkhuleko
Sisize Nkulunkulu ukungalandeli imvamo yakulumhlaba sizama ukunxusela isizwe ekuvuseleleni ukuzinikela ezintweni zikaNkulunkulu.

^^ go back to the top ^^

Usuku Lwetshumi lasithupha
Isihloko: Ukuhlanganyela kobuKristu okusuka enhliziyweni
Isifundo: Amahubo 133:1-3

Umsebenzi kaNkulunkulu eBandleni uhlanganisa ukukhulisela amakholwa kuKristu akwazi ukuba lobudlelwano labazalwane obusuka enhliziyweni. Njengoba sikhula ebudlelwaneni bethu loKristu, kufanele sikhule ebudlelwaneni bethu labodadewethu lababafowethu. Isizatho sokuba lobudlelwano beqiniso lokuthembeka yikuthi kusivumela ukuba siphile ngokuzwanana omunye lomunye (2 KwabaseKorinte 8:7), kunika ithuba lokufunda komunye lomunye, phakathi kwezinye izizatho. Okuqakathekileyo kukho konke lokhu yikuthi kuyamthokozisa uNkulunkulu, utsho njalo umhubi esifundweni sethu salamuhla. Sakha njani ubudlelwano obuqinileyo? Okulandelayo yikho esingakucabangela: (1) Ukwethembeka/lokuma eqinisweni— khuluma iqiniso ngaso sonke isikhathi, (2) Ukuthobeka— kumqoka ebudlelwaneni, (3) Inhlonipho— ukuhlonipha ukungezwani kwethu lokunanzelela imizwa yomunye lomunye lokuba lesineke kubantu abakucunulayo, (4) Imfihlo- lokho okuhlanganyelwa eqenjini kufuze kuhlale eqenjini lakho, unganyeyi (Izaga 16:28, Titosi 3:10), kanye (5) Izikhathi ezivamileyo—kudingeka uthintane njalonjalo ngezikhathi zonke leqembu lakho ukuze kwakhiwe ubudlelwano beqiniso lobuzwakalayo.

Umnakano
Ucabanga ukuthi kuyini okudala ubutha phakathi kwabazalwane enkonzweni?
Singawaqeda njani amaqembu aphambanisa ubudlelwano?

Umthandazo
Siyabonga Nkosi ngokusihlanganisa njengabantu abakholwayo. Sisize sikhule ngokomoya lapho sisenza ubudlelwano obuqinileyo.

^^ go back to the top ^^

Usuku Lwetshumi Lasikhombisa
Isihloko: Ukubuyiselwa kwabawileyo
Reading: KwabaseGalathiya 6:1-2

Ukugcwaliseka komsebenzi kaNkulunkulu kuhlanganisa ukubuyiselwa kwabawileyo ngemfundiso yeBhayibheli, ukutshumayela lokweluleka. Ngokombhalo esiwubalileyo, kungumlandu wabavuthiweyo ngokomoya ukusiza labo abayabe bewile. Labo abathwala umthwalo wokusiza lokubuyisela abazalwane abawileyo kufanele bazinakekele labo ukuze bangaweli kumjibila ofanayo njalo besebesehluleka emsebenzini kaNkulunkulu. Umbhalo utsho ngokusobala ukuthi uhambo lokubuyisela lufanele lwenziwe ngobumnene. Ukuvivinywa kwesimo sethu kuyimpendulo yethu esonweni somunye. Abantu abagxile emsebenzini kaNkulunkulu abathokozeli ukuwa kwabazalwane, kodwa bayadinga bathole indlela yokubavusa. Abantu abanengi bawile kulo umhlaba ngenxa yezizatho ezahlukeneyo njalo ibandla kumele lingaphumuli ekunikezeni ukubuyiselwa ngendlela epheleleyo. Ibandla elizifunela indawo efaneleyo emsebenzini omkhulu kaNkulunkulu yilelo eligcwele abantu abakulungeleyo ukukhonza njengabagcini babanye.

Umnakano
Kambe sesikulungele ukubuyisela abawileyo na? Silazo izikhali zokubuyisela abawileyo na?
Liphumelela kangakanani ibandla ekubuyiseleni abalenhliziyo ezidabukileyo?

Umthandazo
Baba wethu osezulwini, buyisela iBandla lakho ukuthi libe ngabanxuseli bokubuyisela kubazalwane abawileyo kulo mhlaba olimeleyo.

^^ go back to the top ^^

Usuku Lwetshumi Lesificaminwembili
Isihloko: Qaphela izinto ezintsha ezisethuselayo emsebenzini kaNkulunkulu
Isifundo: Nehemiya 3:19-21; 4:1-11

Ukuphatheka emsebenzini kaNkulunkulu ngeke kuthiwe akula bunzima lokwethuselwa. Kufanele kwazakale ngabafuqa umsebenzi ukuthi umsebenzi wokufikisa ilizwi yimpi ngokwayo. Lokhu kubangelwa yikuthi ikhona imimoya ngaphandle ethokozela umumo okhona njalo lokuwohloka kwesimo elizweni. Ukuvuselela imiduli yaseJerusalema kwakuyinto enhle okwakumele wonke umJuda olozwelo lomlandu aphatheke kuwo kodwa abanye babengaboni ngalihlo linye kulowo mbono. Loba uNehemiah wathatha umsebenzi wokuvuselela imiduli wawufaka emahlombe akhe, ababembukele bakhetha ukulwisa ingqubela phambili kulokuthi bangene labo baphatheke emsebenzini lowu.
Lapho siphakathi kohambo lokuvuselela, sihlangana lokuhlupheka lobunzima lokwethuselwa okutsha. Njengoba kusukuma ukwethuselwa okutsha, ibandla kufuze libelezindlela zokulwa lakho futhi livumele umsebenzi kaNkulunkulu ukuba uqhubekele phambili (Kwabase Efesu 3:12). Ngaphandle kwalokhu, kuhlelo lomsebenzi, kwesinye isikhathi sikhangelane lokulahlwa, ukuzondwa phakathi kwezinye inhlupho kodwa kufanele sibe lesibindi njengoba silomlandu wokuqhubeka lomsebenzi. Ngamanye amazwi, ukwethuselwa okutsha akumelanga kusephule kodwa kumele kusinike intshukuntshu yokuthi sibelesibindi njalo simelane lobunzima mangqamu. Izindlela ezintsha zokwenza umsebenzi phakathi kwezimo ezifana lalezi zifanele ukuba zisetshenziswe ukuze sihlale sibalulekile njengebandla. uNehemiya wahlangana lobunzima lokuphikiswa phakathi kohambo lwakhe lokuvuselela imiduli eyayidilikile eJerusalema kodwa kazange wama waze wafeza isifiso sakhe. Kasibeni lomoya ofanayo lathi esikhathini sethu. Njalo sibe lendlela ezintsha zokufinyelela ngaphandle.

Umnakano
Yiziphi indlela ezintsha zokuvangela esilazo ebandleni ezokufinyelela phandle?
Yikuphi ukwethuselwa esihlangana lakho okuvimba umsebenzi kaNkulunkulu?
Singanqoba njani ukwethuselwa okuvukayo endleleni ukuze sihlale sisebenza ngokupheleleyo emsebenzini weNkosi?

Umthandazo
Sinike amandla wokuqhubekela phambili siphakathi komsebenzi owasipha wona Nkosi.

^^ go back to the top ^^

Usuku Lwetshumi Lesificamunwe munye
Isihloko: Ubuyiselwe ukuze waluse izimvu zeNkosi
Isifundo: Johane 21:15-17

Ngezizatho ezehlukeneyo, kwesinye isikhathi siyakhohlwa umsebenzi kaNkulunkulu asifisela wona. Ngamunye, sizinhlanganiso loba njengebandla, siyakhunjuzwa futhi ukuthi saluse izimvu zikaNkulunkulu. Okuphambene lalokho okufanele sikwenze lesiyikho kuba lempumelelo kakhulu kulesifiso sikaNkulunkulu kithi thina esibizelwe ukumsebenzela.
UJohane, uMvangeli, ulandisa ngesehlakalo esenzeka kubafundi ngesikhathi sokubonakala kweNkosi isivusiwe ngaphambi kokwenyuka kwayo. Lesisehlakalo senzeka ngasolwandle lwaseTiberiya (iGalile). Abafundi abangamatshumi lanye, beholwa nguPetro, basebeguquke umbono. Babuyela emuva ukuyathiya inhlanzi bengasanaki umsebenzi uJesu ayebabizele wona (Mathewu 4:18-20). Kukuhle kunjalo, ababambanga lutho ubusuku bonke kwaze kwaba yilapho uJesu ebonakala kubo ekuseni futhi wasebenzisa lezo nhlanzi ezinkulu abazigolayo njengomfanekiso walokho ababekuthunyiwe. Injongo kaJesu kuleyi indaba nguPetro uqobo lwakhe. Kodwa kungani uPetro ephuma kubo bonke abafundi? Mhlawumbe uPetro wayeselahlekelwe yikwethembeka futhi esekhohlwe umsebenzi owayewunikiwe. Nguye owayebuye lecebo lokuthi bayegola inhlanzi abanye basebemlandela. Omunye umbono ungatsho ukuthi, uPetro, njengomholi weqembu, walidukisa iqembu. Wenza okuphambene lalokho okwakukhangelelwe kuye. Ukukhohlwa umlandu kanye lokuguquka kombono kuluphawu lokulahlekelwa luthando lweNkosi, ngakhoke uJesu kwadingeka ukuthi abuze uPetro ukuthi uyamthanda loba hatshi.
NjengeBandla lamuhla, singabe sisemandleni kanye lasekuzinzeni okufanayo lesake saba lakho loba siba buthakathaka insuku zonke na? Kambe iBandla liseyindawo yenduduzo, indawo lapho wonke umuntu ezizwa esekhaya futhi eduduzekile na? Ukwelusa lokondla izimvu zikaNkulunkulu kudinga ukunakekelana lokuthandana njengoba sasithandwa njalo sisathandwa nguNkulunkulu ngokungela bandlululo (Johane 3:16). Kuhambelana lokubanika ukudla okulobunono lokudla okulomsoco, futhi ngokutsho kukaJesu, umuntu akaphili ngesinkwa sodwa kodwa langawo wonke amazwi aphuma emlonyeni kaNkulunkulu (Mathewu 4:4). Lokhu kutsho ukuthi indawo zokutshumayelela kumele ziveze ngokweqiniso lowu umlayezo weqiniso hatshi imfundiso yenkolo engcolileyo. IBandla kumele liphinde likhangelisise ubizo lwalo futhi liqondise lolo bizo lokwelusa izimvu zikaNkulunkulu. Umsebenzi oyinhloko yebandla uphathelane lokunakekela abazalwane, enjabulweni lasezinhlungwini zabo.

Umnakano
Kuyini okufanele sikwenze njengeBandla ukuze singabi lezizatho ezinengi ezokusebenzisa ukubalekela umsebenzi kaKristu?
Kufanele seluse futhi sizise edlelweni izimvu zikaKristu. Bangobani laba abathiwa yizimvu zikaKristu.

Umthandazo
Nkulunkulu wethu olothando lophilayo, sisize ukuba sivuselele ubizo lwethu njengeBandla ukuze seluse futhi sondle umhlambi wakho ngokufaneleyo.

^^ go back to the top ^^

Usuku Lwamatshumi Amabili
Isihloko: Ukuzwisisa isikhathi
Izifundo: Amahubo 90:12, Umtshumayeli: 3:12

Isikhathi siqakathekile, ngoba uNkulunkulu wadala yonke into ngesikhathi. Kwesinye isifundo esiqanjiweyo, uMhlabeleli ukhuluma ngesikhathi njalo ucela uNkulunkulu ukuthi amfundise ngokuqakatheka kwaso. UMtshumayeli ugcizelela ngokuthi ekuqaleni lapho uNkulunkulu edala izinto konke kwenziwa ngesikhathi, njalo into yonke ilesikhathi, kulesikhathi sokuhlanyela lesikhathi sokuvuna, isikhathi sokuthanda lesikhathi senzondo. Lokhu kufakaza ukuthi into yonke yenzakala ngesikhathi sayo njalo yonke into kumele yenziwe ngesikhathi. Isikhathi asimeleli umuntu, thina yithi esimelela isikhathi. Ngokufanayo isikhathi esidlalisekileyo asilakho ukusithola. Kufanele sicele inhlakanipho kuMlimu ukuthi sibe ngabagcini besikhathi lamathuba ethu. Isikhathi esinengi siyabala insuku zethu zokuzalwa silibale ukwazi ukuthi omunye lomunye kufanele aphile usuku ngesikhathi sinye njalo asikwazi ukuthi sisalelwe yisikhathi esinganani sisemhlabeni. Impilo enhle iza ngokuphilela iNkosi okulenhlonipho.
Kuqakathekile ukuthi sizwisise ngezibonakaliso zesikhathi. Ngokunjalo, asikwazi ukuthi uma sisaphila kumele sisebenzise isikhathi ukuthuthukisa impilo zethu lokukhusela umbuso kaNkulunkulu.

Umnakano
Isikhathi esidlalisekileyo asilakho ukusifumana. Singenza kanjani ukuthi singabi lamaphutha okutshaphaza isikhathi esisiphiwe yiNkosi?

^^ go back to the top ^^

Usuku Lwamatshumi Amabili Lanye
Isihloko: Ukulondoloza inhliziyo yomntwana
Izifundo: Izaga 4:23; Marko 7:21

Indlela abantwana abaziphatha ngayo kubonisa kamhlophe indlela abacabanga ngayo lokusenhliziweni zabo. Luka 6:45 uthi, ‘’Umuntu omuhle uveza okuhle enothweni enhle yenhliziyo yakhe…..ngoba umlomo wakhe ukhuluma ngokugcwala kwenhliziyo.” Umbhalo uphawula obala ukuthi inhliziyo yiyo elawula impilo. Inhloso yokwalusa igxile ekuvikeleni inhliziyo, lapha sisitsho inhliziyo zabantwana. Ukuziphatha komuntu wonke akuphongu kwenzeka, kodwa kutshengisa isimo senhliziyo yomuntu. Njengabazali kuqakathekile ukuthi sigcine kahle abantwana abayinotho kithi kuze babe lekusasa elihle. Abazali abanengi bananzelela inguquko ebantwaneni bese besipha insolo lokungaphatheki kwabo kulokuthi badinge indlela zokonga lokukhulisa abantwana besesebancinyane. Abantwana ‘asibabambeni besebancinyane’ njengalokhu isigogo sigoqwa sisemanzi. Inhliziyo yomntwana yakhiwa yizinto ezitshiyeneyo ezigoqela (1) isimo semuli-imuli ngeyabazali ababili labantwababo na? Abazali bonke bayaphila yini ukuthi bakhulise imuli ngemfanelo? (2) Izinto eziqakathekileyo emulini – imikhuba lamasiko emuli kulakho ukuguqukela umntwana ebuhleni kumbe ebubini? (3) Imilandu yemuli- abazali bonke kumele baphatheke ekukhuliseni abantwana ngendlela efaneleyo. Imuli elungileyo ikhulisa abantwana ngendlela eqondileyo elekusasa elihle.

Umnakano
Abantwana bethu sibafundisa kangakanani ukukhonza uNkulunkulu?
Silesikhathi esaneleyo yini ukwabelana labantwana?
Mizamo bani engenziwa ukuthi abantwana bafundiswe besesebancinyane?

Umthandazo
Sinikela abantwana kuwe Nkulunkulu wethu, Mbalisi loMalusi olungileyo.

^^ go back to the top ^^

Usuku Lwamatshumi Amabili lambili
Isihloko: Imvuselelo yokulwisana lezidakamizwa
Izifundo: 1 KwabaseKorinte.6:19-20; Izaga 20:1

Kuminyaka ye21st century, sihlangana lezinto ezinenginengi. Phakathi kwezinto esihlangana lazo kulobungcitshi bokusebenzisa ubulembu (technology) osebuthuthukise impilo zethu ngendlela ezitshiyeneyo. Sibonile njalo ukuza kwemikhuhlane etshiyeneyo eminye ibangelwa yimisebenzi yabantu. Lakhona singeke silungise okuza kungaphezulu kwamandla ethu, silakho ukwenqabela kuphela imonakalo ebangelwa yithi abantu. Kufanele silwisane lokumemetheka kwezidakamizwa khona osekubhubhise impilo zabontanga. Ikusasa labantu liyatshabalala ngenxa yezidakamizwa. Abanye abantu abadala balesandla kokumemethekisa ukusetshenziswa kwalezo zidakamizwa. Lokhu kutshengisa isihluku abasenzayo bethengisela lokudakisa abantu abatsha. Abanye abantu abatsha balokuthatheka ngezidakamizwa imbangela kuyibunzima bempilo obukhona elizweni lethu. Lakhona silobunzima esibhekane labo, izidakamizwa azilakho ukuletha ukuthula njalo impilo zabatsha ziya zitshabalala lokuphambana kwengqondo. Lokhu yikho okulakho ukubuyisela ilizwe emuva kakhulu.
Kuzifundo zethu zalamuhla, siyalimukiswa ngengozi yokuphatheka kuzidakamizwa. Akulungelanga umphakathi kanye lemizimba yalowo ozisebenzisayo. Unembeza womuntu uyafa besekubangela ukuthi abaphatheke kulokhu benze izinto ezingekho emthethweni okugoqela ukutshontsha lokubulalana. UPhawuli kwabaseKorinte, usifundisa ngokuthi imizimba yethu ilithempeli likaNkulunkulu. Imiselwe ukukhonza uJehova. UNkulunkulu uBaba wadala imizimba yethu ngomfanekiso wakhe. UNkulunkulu uJesu wayihlenga imizimba yethu, kuthi UNkulunkulu uMoya oyiNgcwele uhlala phakathi kwemizimba yethu kuphela nxa ihlanzekile. Aluba umuntu ephatheke kuzidakwamizwa uMoya oyiNgcwele kahlali kundawo ezinjalo.

Umnakano
Yiziphi izinto ezimbi ezilethwa yikuphatheka kuzidakamizwa? Mizamo bani engenziwa ukuthi sinqobe kule impi?

^^ go back to the top ^^

Usuku Lwamatshumi Amabili Lantathu
Isihloko: Imvuselelo yokulanda lokubuyisela konke okulahlekileyo
Isifundo: 1 Samuyeli 30:1-23

Lapha sihlangana lesehlakalo esibuhlungu. Lakhona uDavida wayekhangelane lokulwisana phakathi kwamaIsrayeli lamaFilistiya, amaAmalekhi wona athola ithuba lukuphindisela kuDavida labantu bakhe. Abahlasela babulala njalo bathumba abantu abanengi bethatha lenotho yonke abayifunayo.
Abantu kuzikhathi ezinengi asiboni ngelihlo linye. Lakhona abanye abantu babefuna ukubulala uDavida, yena wakwazi lokhu, kungakho wacela kuNkulunkulu ukuthi baphephiswe. Lakanye uNkulunkulu wangenela ekuhlengweni kwakhe.
Empilweni siyahlangana lobunzima obutshiyeneyo, silahlekelwa yizinto esizithembileyo. Kufanele sazi ukuthi izinqumo ezithathwa kuphuthunywa kazisifikisi ndawo, njalo zilakho ukuletha umonakalo omkhulu empilweni zethu. Kumele sifunde ukubekezela siphe uNkulunkulu isikhathi sakhe. Kungani sidinga amandla? Siyawadinga amandla kaNkulunkulu ngoba silwisana lesitha okufanele sisinqobe. Ufuqo lukaNkulunkulu siyaludinga aluba kumele sinqobe izitha zethu. UDavida wakhangela phambili esazi ukuthi isandla seNkosi sasiduze ukumnqobela. Lathi kuyasweleka sibelethemba ukuthi sizakunqoba iNkosi ingumsizi wethu.
Lapho iNkosi ikhuthaza uDavida ukuthi abawalandele amaAmaleki, uDavida kazange azi ukuthi uzabafumana ngaphi kwendawo. UThixo wasebenzisa umfana ogulayo wamaAmaleki owayetshiywe emuva ukuthi babavumbulule. Kuzinto zonke esihlangana lazo empilweni, uNkulunkulu uyapha indlela esingayisebenzisa ukuze sihlengwe lokubusiswa njengabantu lebandla. Ngokunjalo siyafunda ukuthi kufanele sincedise abasebunzimeni kumbe abancindezelweyo ukuze kusasa babelakho ukusiza thina ukuthi sithole konke esiyabe sikuhluthunelwe yisitha. Ngenxa yokuthi uDavida lebutho lakhe bonga umfana ogulayo kwabaphumelelisa. Lokhu kwabenza babalakho ukuxhumana lemuli ezazithunjiwe. Waba ngumxhumanisi wabo okwasekumele bamphathe kuhle.

Umnakano:
Kuyini okumele sikwenze emsebenzini kaNkulunkulu njalo kumele sicele bani kuloluhambo?
Yibuphi ubuzima esihlangana labo ekulwiseni usathane kumzamo yethu yokufumana esiyabe sikuthathelwe ngusathane uqobo lwakhe?

^^ go back to the top ^^

Usuku Lwamatshumi Amabili Lane
Isihloko: Imvuselelo lokubuyiselwa kobudlelwano
Izifundo: Luka 10:25-37; Marko 14:17

Umsebenzi webandla ugoqela ukunakekelwa kwabampofu labaswelayo. UJesu watsho ukuthi ekuphileni kwethu sizahlala silabo abaswelayo phakathi kwethu (Marko 14:7). Abaswelayo yilabo abangela kudla, imvunulo, imali zokwelatshwa lokwelaphisa, imali zokufunda lokunye okunenginengi. Kungumsebenzi webandla ukuthatha izinqumo zokuncedisa bonke abaswelayo.
Isifundo somSamariya olungileyo sifundisa ukuthi ukunceda akukhangeli ongowakho ngokuzalwa kumbe ngomhlobo. Kumele sincede umuntu wonke odinga usizo. Ukuba ngomakhelwane abaqotho kutsho ukuthwalelana imithwalo ngezikhathi zobunzima. Ingxoxo kaJesu legqwetha kuLuka, isifundisa ngokubanzi ngomakhelwane olungileyo. Ukuze samukele ilifa lombuso wezulu kufanele sibeqotho kukho konke esikwenzayo. Igqwetha lilandisa kumbhalo ukuthi umakhelwane uyini ngokombuso wezulu. ‘’Ngubani umakhelwane wami?‘’ kuphikisa igqwetha likhuluma loJesu. Kungakho uJesu umphendula ngokupha umfanekiso wendoda eyahamba isuka eJerusalema isiya eJerikho. Wahlangana lezigebengu zamlimaza zamtshiya endleleni. UmPrista lomLevi bambona olimeleyo bamedlula bengaphanga usizo kodwa umSamariya wathinteka lapho ebona undoda olimeleyo, wambopha amanxeba akhe wamhambisa esibhedlela ukuze athole usizo.
Isifundo lesi sifakaza ubukhona lokuphatheka kwamaKristu kunhlelo zokunceda kuzigaba esihlala kuzo. UJesu uletha isifundo esichasisa ukuthi umakhelwane ngubani. Sijwayele ukuthi umakhelwane ngumuntu esakhelane laye lapho esihlezi khona. Abantu abayabe besebunzimeni obutshiyeneyo kungakhathalekile ukuthi bahlala duzane kwethu bangomakhelwane bethu ngokufanayo. Kungumlandu wami lawe ukunakekela abanye bethu uma besenkingeni.
Ibandla lamaWisili lenza umsebenzi omkhulu ngeMeDRA ukuphathisa abaswelayo labahlukulezekileyo kundawo ezinengi kugoqela lamakhomithi akhangelana labaswelayo labadinga uncedo (umsebenzi weChristian Social Responsility committees). Ngokunjalo sonke kufanele silandele okufundiswa nguJesu sincedisa lapho okuswelakala khona kuze sifinyelele umbuso wezulu.
Abakhonzi bonke kungumlandu wabo ukusebenzisa impahla yabo kugoqela izimali ukupha uncedo, njalo lokhu kwenza ibandla lazakale ngemisebenzi yalo emihle. UJesu wathi, ‘’wangibona ngilambile, awungiphanga okokudla, wangibona nginqunu awungiphanga imvunulo’’….. ngokufanayo uJesu uthi nxa singaphatheki ekuncedeni abaswelayo silahla yena uqobo lwakhe. Asithandaneni ngoba lokhu kungumfuziselo kokwakhelana okuhle.

Umnakano
Njengebandla, yiziphi ezinye izinto esingazenza ukuphatheka ekuncediseni abampofu labaswelayo kumphakathi wethu?

^^ go back to the top ^^

Usuku Lwamatshumi Amabili Lanhlanu
Isifundo –Ibandla elivusekelileyo libandla elithandazayo
Imbhalo – Mathewu 6:6; Luka 11:11-13

Umthandazo yikhulumisana loNkulunkulu “Uzangibiza njalo ngizamphendula ngimtshengise usindiso lwami” AmaHubo 91:15-16. Isikhathi esisithathayo loNkulunkulu emthandazweni singathulula amanye amandla amangalisayo njalo, okungaba yimbali umhlaba ongakaze uhlangane layo. UNkulunkulu uyaphendula singathandaza. Lapho sithandaza, sizihlanganisa loNkulunkulu njalo sidala ubudlelwano laye. Lapho sibika esikuzwayo, lemthwalo yethu ekukhulumisaneni laye, kuba yindlela yokumdumisa uNkulunkulu (Amahubo 34: 1-4), ukuvuma izono (I Johane1: 1-9) kumbe ukubonga (Kwabase Efesu 5: 4-20). Kulezinto iBhayibheli elithi kumele sizinanzelele lapho sithandaza, ezinye yazo yilezi:
(1) Linda, uthandaze kokuphela ukuze unqobe konke okufuna ukwenzakala njalo ukuze wenelise ukuma phambi kweNdodana yoMuntu (Luka 21: 36)
(2) Thandaza ukuze ungangeni esilingweni. Sihlangana lezilingo nsukuzonke lapho sihamba empilweni, kodwa siyakhuthazwa ukuthi sithandaze nsukuzonke njalo sinanzelele ukuze singangeni ezilingweni. (Mathewu 26: 41)
(3)Thandazela labo abasezikhundleni (I Timothi 2 :1-2) ukuze bahlale ngokuthula, ngokwesaba uNkulunkulu njalo ngobungcwele.
(4)Thandazela izitha zakho,busisa labo abakuqalekisayo, thandazela labangakuphathi kuhle (Luka 6-28). Umthandazo uqakathekile, uyinsika yempilo yomKristu njalo uNkulunkulu usiphendula ngomthandazo. Ibandla eliphumelelayo libandla elithandazayo. Umsebenzi kaNkulunkulu udinga ibandla elithandazayo ngokunjalo lapho singena kulo umsebenzi, kumele siqale singene emthandazweni sizihlanganisa loNkulunkulu, onguye umthombo wamandla.

Umnakano
Silabo yini ubudlelwano loNkulunkulu emthandazweni?
Singazivikela njani ukungangeni ezilingweni?

Umthandazo
Sincedise Nkosi ethandekayo lapho sihlangana lezilingo, singaweli phakathi kwazo.

^^ go back to the top ^^

Usuku Lwamatshumi Amabili Lasithupha
Isifundo- Abantu abasemsebenzini bahlengiwe ukuze basebenze
Umbhalo – uTimothi 1:9

Nguye owasihlengayo njalo wasikhetha singafanele kodwa kungumcabango wakhe wasendulo umhlaba ungakabikho. Ngalokho –ke bodadewethu labafowethu, lamuhla siyakhunjuzwa ukuthi sahlengwa ukuze sisebenze endlini yeNkosi. Kumele sinanzelele ukuthi ikholwa lonke lidalelwe ukuba lusizo lapho siqhubekelisa Ukuthunywa Okukhulu (Mathewu 28 v 20) Umdlalo wenguqu/webhola singawusebenzisa njengesibonelo lapho izinkulungwane zabantu bebuthana ukubukela abantu abangamatshumi amabili lamabili endaweni yokudlalela. Ngokutshiyana esiyikho khona , kumele sisekelane emsebenzini weNkosi njalo siyakhunjuzwa ukuthi asikho emncintiswaneni. Akumelanga sifise iziphiwo zabanye. Ukuze sonke sidale umehluko emsebenzini esiwubizelwe nguNkulunkulu, uNkulunkulu wapha umuntu munye ngamunye isipho sakhe. Lapho sijabulela iNyanga yeVangeli, njenga maWisili, sibizelwe, ukuthi senze umsebenzi ngendlela zonke.

Umnakano
Dinga izindlela ezokukhuthaza abanye ukuze basebenzise izipho zabo abaziphiwa nguNkulunkulu ukuze umsebenzi weNkosi
uhambe.

Umthandazo
Sincedise Nkulunkulu othandekayo ukuze sikhumbule ukuthi sasindiswa ukuze sisize abanye.

^^ go back to the top ^^

Usuku Lwamatshumi Amabili Lesikhombisa
Isifundo – Amandla alethwa luthando lobuzalwane.
Imibhalo – I KwabaseKorinte 13:1-13; Imisebenzi 2:1-13

Amandla ebandla agxile kuthando. Uthando luqakathekile empilweni yomuntu, yemuli, esigabeni lasebandleni. Ngothando kulempilakahle, ukuhlaliseka lokuthembela kumaKristu. Ibandla liba lesisindo lapho lihlanganisa wonke umuntu kungalani leziphiwo kanye lokuthi sisuka ngaphi. Ibandla laseKorinte laqakathekisa izindimi zezingelosi. Okwadala ukuthi amalunga acine eqakathekisa ukukhuluma ngezindimi okuyikho kubo okwakuphawula ibandla leqiniso. Lokhu kukholwa lokuziphatha kwadabula ibandla phakathi okwacina kudala ukuxokozela.
Labo ababekhuluma ngendimi babecabanga ukuthi babengcwele ukwedlula labo ababengenelisi ukukhuluma ngendimi. Ngalokho ke labo ababengenelisi bazibona bengasibantu. Amaqembu adaleka ebandleni kusiya ngokuthi umuntu wayekhuluma indimi okunganani.
UPawuli uza exwayisa ngale imfundiso egcizelela ukuthi phezu kokukhuluma ngendimi, ibandla leqiniso libonakala ngothando njalo nxa kungela thando konke kuyize. Izindimi zodwa azichazi ukuthi ibandla leqiniso linjani kumbe ukuthi ubuKristu beqiniso bunjani. Lanxa –nje kunjalo, ngokukhuza lesi senzakalo esasibangelwe yikukhuluma ngendimi, uPhawuli katsho ukuthi ukukhuluma ngendimi kubi. Hatshi. Akutshoyo yikuthi kumele kuqale uthando, yilo isisekelo. Izindimi ezikhulunywa kungelathando kuba ngumsindo nje ongela ncedo. Lokhu singakufakaza ngokukhangela ibandla lakuqala. Ibandla lendulo kuMisebenzi 2 lathola amandla ngoba abantu ababesuka kuzindawo ezitshiyeneyo bahlangana eJerusalema behlanganela into eyodwa. Amandla ebandla asekuhlanganeni kwalo bengamakholwa alothando lapho bedumisa. Uthando lweqiniso luyaqinisa, ibandla.

Umnakano
Uthando yisisekelo sokuhlanganelana kwamaKristu. Bakhona abantu abangathandekiyo yini ebandleni?

Umthandazo
Nkosi elesihawu njengalokhu wasithanda okungelamgoqo sifundise ukuthanda abanye.

^^ go back to the top ^^

Usuku Lwamatshumi Amabili Lasitshiyaminwembili
Isifundo: sivuselelwe ukuba litswayi lokukhanya komuntu wonke.
Imibhalo: Mathewu 5:13-16

UMathewu 5-7 lugwalo lwemfundiso yentabeni- kumavesi13-16, uJesu usebenzisa itswayi lokukhanya njengomzekeliso, ukwethula umbiko wokuthi abafundi bayini njalo bakhangelelwe ukuthi benzeni.
Abafundi litswayi lomhlaba njengalokhu beyikukhanya emhlabeni. AbaJuda besikhathi sikaJesu babethola itswayi labo ngokuthela amanzi olwandle emagodini ukuze amanzi aphephuke atshiye itswayi phakathi kwegodi. Enye indlela kwakuyikucenga itshebetshebe elalithathwa ekhunjini lolwandle ngokuhluza itswayi kulelotshebetshebe usebenzisa amanzi angangcolanga. Lawa manzi yiwo ayezwakala ebabelela njengetswayi ngemva kokuhluza.
Lokhu okuhluziweyo kwakucina kungasezwakali ubuyikho letshebetshebe lelo lalo lalicina lingaselancedo okokuthi lokulima kulo kwakucina kungancedi. Lapha elalingatholakala liloncedo khona kulapho liqgiba amagodi ngokunjalo yikho sisizwa uJesu ethi “Aliselancedo” ngaphandle kokuthi lilahlwe linyathelwe ngezinyawo. Lokhu kutsho ukuthi abafundi (ibandla) kwakumele bazivikele ukuze bangapheli lokhu kubabelela okunjengo kwetswayi.
Ibandla lalamuhla kumele libelempilo njalo lifanele, ukuze lilethe ukuthula lapha okuswelakala khona. Ukuba yikukhanya kuye wonke umuntu yiwo umlandu wethu njengebandla njalo ibandla kumele kube yindawo lapho umuntu wonke ahlaliseka khona, egoqwa, elaywa, ekhuzwa njalo esiliswa.
Ibandla lingaba yikukhanya komhlaba kuphela nxa ligoqela konke lokhu okubethwe ngaphezulu. Ngokuqathanisa, ibandla lingeke libe yikukhanya komuntu wonke nxa ligcwele ngabantu abayizihwaba, abazalwane abangaxoleliyo, abantu abalimazayo njalo abangelathando. UNkulunkulu ufuna sibe yingxenye yomsebenzi wakhe. Kodwa umbuzo uthi; Siyafisa njalo sizimisele, yini ukuthi uNkulunkulu asisebenzise njengamaKristu? Kumele siphile lokho esikutshumayelayo ngoba siyikukhanya osekufakwe phezulu ukuze abanye labo baphile. Woba yikukhanya kuwe qobo lwakho, emulini yakho, esigabeni, emsebenzini njalonjalo.
Kumele sithandane siphathane ngokulinganayo njalo ngokwenza njalo siba yikukhanya kumuntu wonke. Ubunzima esilabo lamuhla yikuthi abanye bethu batshengisa umfanekiso wokuba yikukhanya letswayi ebandleni kodwa bephila okutshiyeneyo ekhaya, esigabeni lalapha abasebenzela khona. Nxa siyikukhanya ebantwini bonke, akumelanga sibembaxambili.

Umnakano
Singavuselelwa njani ukuze sibe litswayi lokukhanya kuzulu.

Umthandazo
Buyisela ukukhanya kwethu Nkosi ethandekayo sibe yikukhanya kweqiniso.

^^ go back to the top ^^

Usuku Lwamatshumi Amabili Lesificamunwe munye
Isifundo – Ungavumeli ukholo lwakho lufe ngenxa yezilingo.
Imibhalo – KwabaseKolose 1:23; I KwabaseKorinte 16:13

Izilingo yingxenye yempilo lapha emhlabeni. Lokhu kutsho ukuthi asingeke sizisuse, kodwa kumele sizinqobe. Isenzakalo sakhona asilula njalo kwesinye isikhathi uzibona usugqilazwa yizilingo. Lokhu kucina kunyikinya ukholo lwethu.
IsiKristu sethu siyaxega lapho sihlangana lobunzima. Kodwa kumele siqhubeke sitshengisa impawu zobuKristu esilazo njalo singavumeli ukuhluthulelwa ukholo lwethu. Ubunzima bomhlaba buzaqhubeka bulathi lezizukulwane zethu zizahlangana labo. Kodwa siyakhuthazwa ukuthi sime siqine ngoJesu Kristu osipha amandla. UPawuli kwabaseFiliphi 4:13 uthi “Ngilamandla ezinto zonke ngo Jesu Kristu onginika amandla. Ngimelele inqe yiluphi ulutho njalo ngilingana nqe laluphi ulutho ngaye uJesu onginika amandla.”
Ngalokho-ke ebunzimeni lebuhlungwini asiqhubekeni ngokholo ngoJesu Kristu osipha amandla. Kundatshana ebethiweyo, umlobi ukhuthaza ibandla laseKolose ukuthi bame isibindi njalo baqhubeke ngokholo, bengasuswa ethembeni levangeli.

Umnakano
Singenzani ukuze ukholo lwethu luqine ngezikhathi zobunzima?

Umthandazo
Baba osezulwini siyakubonga ngokuhamba lathi ngaso sonke isikhathi. Baba siyakhuleka ukuthi usiphe amandla njalo wenze ukholo lwethu luqine kungalani lomumo wempilo.

^^ go back to the top ^^

Usuku Lwamatshumi Amathathu
Isifundo: Ibandla elinqobayo
Imibhalo:Mathewu 16:18; Amahubo 102:16-20

UMathewu 16:13-20 ulandisa kabanzi ngoKuvuma Okhulu (Great Confession) okwenzakala eCaesarea Philiphi. Abafundi bonke sebetshengise ulwazi lwalokho abantu ababekutsho ngokuthi uJesu ungubani, kwafika isikhathi sokuthi batshengise kuJesu ukuthi bayazwisisa ngokugcweleyo ukuthi ungubani. UPetro wafakaza ukuthi uJesu nguMesiya, iNdodana kaNkulunkulu ophilayo. Kwaba ngemva kwalokho lapho uJesu afunga kuPetro wathi, “Phezulu kwalelidwala ngizayakha ibandla lami njalo amasango eHadesi, awazukuyikhulela,”
Umqondo wokunqoba lo uvela ngaphi? Umdlalo webandla loDiyabhorosi, uyafanana lomdlalo wegundwane lomangoye. USathane uhlezi elwisa ibandla kodwa iNkosi ihlezi iqaphile ukuthi ilwele abantu bayo. Nxa iNkosi izayakha ibandla layo uzakhanya ekukhazimuleni kwakhe. Uzalalela umthandazo wabayanga njalo angawukhangeleli phansi. AmaHubo 102:16-17. Amasango eGehena awangeke abisele emuva ibandla lalabo abakholwa bemanyene loKristu. UJesu uhlezi evikela ibandla lakhe, abasengozini, abahlukuluzwayo, labadabukileyo. Nxa ibandla lisakhelwa edwaleni, alinyikinyeki. Kodwa uKristu yena qobo lwakhe uyasilwela, njalo nxa uKristu ekwelethu icele ngubani ongasilwisa? Uyatsho uPawuli kubandla leRoma. (KwabaseRoma 8:31-39). Abantu bonke, imihlobo, izindimi, bayavunyelwa njalo bamkelekile kuKristu. Akula okumele azizwe etshiywe ngaphandle ngoba uJesu Kristu wasifela sonke. Ngalokho –ke ibandla elihlezi livangela liyaphumelela ngenxa yokwakhelwa phezu kwaleli dwala njalo liyalwelwa izimpi zalo.

Umnakano
Sikhangelelwe ukuthi senzeni ukuze sinqobe?
Ngubani okumele anqobe?

Umthandazo
Siyabonga Nkosi ukwakha ibandla lakho phezulu kwedwala eliqinileyo njalo elingaguqukiyo.

^^ go back to the top ^^

Usuku Lwamatshumi Amathathu Lanye
Isifundo – Sivuselelwe ukuze sibe ngabavuseleli
Imibhalo – Hezekeli 37

Umeli ngumuntu othenjiweyo ukwenza umsebenzi womunye . Indikimba yethu lonyaka ithi “UNkulunkulu wokuvuselela lokubuyisela” Lokhu kutsho ukuthi umsebenzi wokuvuselela lokubuyisela ngokaNkulunkulu. Kodwa –ke njengomsebenzi wonke nje ophathelane lezomoya lempilo yomoya, uNkulunkulu uyafaka abantu ukuthi benze umsebenzi wakhe.
Kulo umbhalo, uHezekeli wahlonitshwa ukuba aphetheke ekuvuseleleni lekubiseleni abakoJuda. Owakhe umsebenzi njengo meli kwaku yikwethula njengomeli lokho akutshelwa nguNkulunkulu (prophecy), ekhuluma amazwi anika ithemba kulabo abasebephelelwe lithemba. UHezekeli wakhuluma phezulu kwamathambo lawa abalempilo. Lokhu kwabuya ngemva kwabantu bako Israyeli sebedelwe nguNkulunkulu ngenxa yesono ngalokho bangena ekugqilwazweni eBhabhiloni, Ukuhlala kwabo eBhabhiloni kwaba kude (iminyaka engamatshumi ayisikhombisa). Lokhu kwaletha ukuphelelwa lithemba. Yikho okwakumelwe ngamathambo awomileyo, ayechaphazekile esihotsheni ngobunengi bawo. UHezekeli wabuya njengomeli wenguquko kulabo ababengaselathemba. Ngokunjalo siphila endaweni lasesikhathini lapho abantu bonke sebephelelwe lithemba lokholo ngenxa yezinto lomumo ohluphayo kanye lobunzima. Ibandla laphakanyiswa ukuze libe nguMmeli kaNkulunkulu ukuze libuyisele abawileyo lalabo abalemiphefumulo esitshabalala. UNkulunkulu uyasibiza ukuthi sikhumbule labo abehluleka ukukhula, sime labo abengenelisi ukuzimela njalo sibe ngabatshisekela ukuletha ukuvuselela kanye lokukholwa kulabo lokhu osekubaphelela. AbaMmeli bazakhanya ngomdladla kumbe intshukuntshu njalo lokuthanda uNkulunkulu, ukuba leqiniso kanye lobuqotho. Abameli bokuvuselela bayadingakala ngokuphangisa kumaphuluphithi, ezindaweni ezilozulu, kuzimuli, njalonjalo, ukuze bavuselele abantu bakaNkulunkulu. Ngamunye ngamunye njalo njengebandla asiphakameni sibengabaMmeli bokuvuselela kuzigaba ezitshiyeneyo zempilo.

Umnakano
Kudingakalani ukuze ubenguMmeli wokuvuselela?
Sizimisele okunganani ukuthi sibe ngabaMmeli bokuvuselela njengoEzekiel?

Umthandazo
Nkulunkulu othandekayo, siphe amandla lentshukuntshu ukuze sibengabameli bakho beqiniso bokuvuselela.

^^ go back to the top ^^