IVIKI YEWESLEY
26 Nkwenkwezi – 1 Nhlangula 2024
INDIKIMBA: ABAMELI BAKAKRISTU (2 KWABASEKORINTE 5:20)
[Click/tap on the day of your choice below to jump down the page to the devotions for that day.]
Day 1
Day 2
Day 3
Day 4
Day 5
Day 6
Day 7
ISANDULELO
Mhlaka 24 ku Nkwenkwezi ngomnyaka ka 1738 yimbali yeMethodist. Yilo ilanga elaletha inguquko eyaba khona ngokuzwisisa kuka John Wesley ngokusindiswa langendaba zomoya. Ilanga leli likhangelwa njengelanga ‘lokuzalwa’ kohlelo lweMethodist. Kulapho njengamaMethodist esithola khona isikhathi kuviki yokucina kaNkwenkwezi minyaka yonke ukuze sicabange, sijulise ingqondo ngokuqakatheka kwalelilanga lalokhu okwenzakala ngemva kwalokhu. Ngokwenza lokhu siyabuyela siyekhangela ngempilo ka John, Sussana, loCharles Wesley lemfundiso zabo ukuze sithole ugqozi oluzasibumba njengamakholwa ngaphansi kwebandla leMethodist. Lokhu kucabanga kwenza sizinake ukuthi singobani lokuthi sizichaze ukuthi sivele singobani thina.
Ugwadlwana lolu lulungiswe kuhle kakhulu ukuze lusiphe umdladla wokuzwisisa imbali yethu, ngoba imbali yethu yiyo esenza sibe yilokhu esiyikho namhlanje. Lulungisiwe ukuze lusinceda ukuthi sizwisise ikhathesi yethu ngoba yikhathesi lembali okubumba ikusasa yethu lapho sidinga ukuba qotho njalo sibe ngabammeli abathembekileyo kuKristu.
UNkulunkulu kabusise abantu ababizwa ngokuthi ngamaMethodists.
Revd Dr. K. Paradza (Mission Director)
ISIBONGO:
Ikhomiti yeResearch le Publication yebandla leMethodist eZimbabwe iqhubeka ibonga abakhokheli bebandla ngokuphiwa lelithuba lokuloba njalo lokuncidezela izingwalo ezisetshenziswa ebandleni, lapho ugwadlwana lolu olukhuluma ngeviki yeWesley lungamanye akhona alemvumo leyo yokulotshwa. Ugwadlwana lweviki leWesley, lika 2024 lubhalwe ngumfundisi V. Zengeni lo mfundisi O Chagudhuma. Sifuna ukubabonga ngokuzimisela kwabo lokuzinikela kwabo. Sibonge njalo amakhomithi ethu endimi zesintu abenza isiqiniseko sokuthi ingwalo lezi ziyafundeka ngendimi zabantu bonke abangamaMethodist jikelele. Ngokunjalo ugwalo lolu luhumutshelwe esiNdebeleni nguNkosikazi Kutloisiso D. Lemu encedisana lo Nkosikazi Lizzie Tshuma. Okokucina sibonga isitolo samabhuku seConnexional ababa lesiqiniseko sokuthi igugu lezingwalo lezi ziyafinyelela kumagumbi wonke alumhlaba lapho okulamaMethodist khona, ngendlela zonke zokufinyelela imibhalo. Siqhubeka sibonga amaBishop ethu amaDistrict, abameli bokuloba kumaDistricts, abafundisi abakhulu bemacircuits labanye abafundisi, abameli babalobi kumacircuits lakumasociety ngokuqhuba umsebenzi wokuhambisa ingwalo lezi endaweni zonke.
UNkulunkulu makasibusise sonke.
Revd. O. Chagudhuma (Research and Publications Coordinator)
ILANGA LAKUQALA ISIHLOKO: ABMELI BAKAKRISTU
ISIFUNDO: 2 KWABASEKORINTE 5: 20
‘Nginika abatshumayeli abalikhulu abangesabi lutho ngaphandle kwesono, abangafuni lutho ngaphandle kukaNkulunkulu, njalo angilandaba kumbe ngabafundisi kumbe ngabatshumayeli; labo bodwa banganyikinya amasango egehena njalo bakhe umbuso kaNkulunkulu emhlabeni.’-John Wesley.
Ummeli ngumuntu olesikhundla esikhulu esihloniphekayo njalo omela ilizwe lakubo kwamanye amazwe. Ngakho injongo yeMethodist yalonyaka eZimbabwe, Abammeli baka Kristu, ikhuluma kithi ebandleni ukuthi singabammeli baka Kristu lapha emhlabeni. Sisemhlabeni kodwa singasibo abomhlaba. Ezulwini likhaya lethu, njalo uJesu Kristu yiNkosi yethu esithumileyo lomlayezo emhlabeni. Umkristu wonke ‘ngothunyiweyo ukuhambisa indaba zikaKristu emhlabeni emele umbuso ka Kristu.
Udumo alube kuNkulunkulu owasipha ibandla leli elicolekileyo le [MCZ] lapho esimkhonza sikhona njalo wasipha ithuba lokuthi simmele ngendlela ezehlukeneyo. Siyaziqhenya ukuba ngama Methodist. Ibandla lamaMethodist linothe kakhulu ngabantu abafundileyo. Abafundisi benza kuhle kakhulu ekufundeni. Kulo umnyaka ka 2024, kulabafundisi abalikhulu lanhlanu e Connexion phose bonke baleziqu zamadigiri awakuqala kuthi abambalwa abaleziqu ezimbili. Kuthi abafundisi abathile sebefundela izifundo zobudokotela. Kuyancomeka lokhu kakhulu. Ngokunjalo abantu labo abamanga bayafunda labo. Bafundile labo kakhulu. Siyaziqhenya ukuba libandla elila bantu abafundileyo. Lokhu kutsho ukuthi singalimela ibandla lethu kuhle ngaso sonke isikhathi. UJohn Wesley ngokwakhe wayekhuthaza ngokufunda. Kweyinye inkulumo yakhe wathi yena ‘amakholwa abalayo ngamakholwa akhulayo. Nxa amakholwa angayekela ukubala ayama ukukhula.’
Ngakolunye uhlangothi labantu basemhlabani bayafunda kakhulu. Kungenani, okusenza sehlukane labafundileyo basemhlabeni yikufanana kwethu loKristu. UJohn Wesley wake wathi ingxenye eqakathekileyo ekuthunyweni kwethu yisifiso sethu sokuba ngcwele njalo silangathelela impilo eqakathekileyo kaNkulunkulu. Ezitsho ngaye uJohn Wesley wathi, ‘Into yakuqala ngempilo yami, yikuba ngcwele, njalo okwesibili engikukhangeleleyo empilweni yami yikuba yisifundiswa.’ Ukufunda ngingela mfundiso enhle yesimilo njalo leyomoya akusilutho; kuyingozi enkulu kakhulu. Bonke abantu labafundisi basebandleni bakhangelelwe ukuba lemfundiso enhle yesimilo leyomoya. Kuphela labo abesaba isono njalo belangazelela ukuba kuNkulunkulu yibo abangenelisa ukumela uKristu ngokupheleleyo kulo umhlaba.
UJohn Wesley njengommeli kaKristu wammela kuhle uKristu, okokuthi ukhangelelwe njengesibonelo esihle hatshi kubandla leMethodist lodwa, kodwa emabandleni wonke amakholwa. Wayezimisele kakhulu ekukholweni kuNkulunkulu, njalo kudingeka ukuthi kube lobungcwele kubo bonke abantu abafelwa nguKristu. Kwesinye isikhathi wabhala wathi,’imfundiso yobuKristu emqoka, igoqela izinto ezintathu: okuyi kuphenduka, ukukholwa lobungcwele…….’
UMCABANGO Ukwesaba isono lokulangazelela uNkulunkulu yikho okukhangelelweyo kithi abammeli bakaKristu.
ILANGA LESIBILI UMSEBENZI WABOMAMA KUBANDLA LEMETHODIST NJENGABAMMELI BAKAKRISTU
UMARKO 16: 9-11, UJOHANE 1-2, 2 UTIMOTI 1: 5
‘Ngafundela konke okwesi Kristu kumama kulabantu abazi ngezenkolo Engilandi’ John Wesley.
Ngokutshumayela, uJohn Wesley wagqugquzelwa kakhulu ngunina uSusanna Wesley okokuthi uSusanna uthathwa njengomama weMethodism. USusanna wayekhokhela inkonzo yokudumisa emzini wakhe lapho umkakhe engekho, eyayingenwa ngomakhelwane. UJohn Welsey wananzelela uthando lukanina njengomuntu owakhokhela inkonzo yokudumisa leyemfundiso.
USusanna wabhala inkonzo yokholo lwabaphostoli olujulileyo, wafundisa abantwana bakhe ngokholo njalo waphumelela kulokhu. Lokhu kwenza uJohn Wesley waqiniseka ngamandla abesifazana ekuqhubeni lekusekeleni imisebenzi kaNkulunkulu. Waba ngumngane wabancane, abadala, abathatheneyo, abangathathwanga, abaphakameyo labayanga. Abesifazana babelezinto ezihambelanayo ngezimilo zabo; babe ngamakholwa aphathelene lezifundo zevangeli, kakhulu amaMethodist. Ngaphandle kokuba lezifundo zevangeli babekhuthele kakhulu njalo bezimisele. Phezu kwakho konke babengesabi ukusebenza nzima. Ukwenza kwabo kwatshengisa sobala ukuthi abesilisa labesifazana babizelwe ukusebenzela iNkosi.
Ngomnyaka ka 1787, kungakhethelekile ukwala kwabatshumayeli bakhe abesilisa, uJohn Wesley wavumela uSarah Mallete ukuthi atshumayele, njalo impumela yakhona yamangalisa. Ibandla leMethodist eZimbabwe selilandela lokhu ukusetshenziswa kwabomama bethathela kuye njalo sekunikeze amathuba alinganayo kubomama ekuthunyweni ukusebenzela iNkosi. Ngokuzwisisa lokhu inhlanganiso zabomama ezinjengo manyano, GCU, WA, njalonjalo sezabunjwa ukwenelisa omama ukukhonza lokuhambisa ivangeli likaJesu Kristu. Ngaphandle kokusebenza kunhlanganiso zabo, kulabomama ebandleni leMCZ abaphatha inkonzo zokudumisa maviki wonke njengabatshumayeli abagcweleyo njalo abanye bengabafundisi. Obaba labomama bayalingana emehlweni kaNkulunkulu.
Kusuka kumavesi esiwaphiweyo phezulu, uMarko 16 lo Johane 20, sihlangana labomama kuyibo abakuqala ukufakaza [abatshumayeli] umbiko wokuvuka kukaKristu, njalo ubufakazi babo batshiya uphawu olumangalisayo kumbali yesiKristu. Umlobi wencwadi yesibili kuTimothi ukhumbuza uTimothi ngendima omama abayidlalileyo, njengonina logogo wakhe, okholweni lwakhe. Ngezinye indlela umlobi uthi yena uTimothi wathola imfundiso eqakathekileyo kanye lokholo kulaba omama bobabili. Ngabe kungabanga lokholo lemfundiso yalaba omama, uTimothi ngabe kazange afike lapho abakhona, ngakho omama baqakathekile, balamandla njalo bathembekile ukuba ngabammeli bakaKristu emakhaya abo lasephuluphuthini.
UMCABANGO: Yibuphi obunye ubunzima obuhlangana labomama abasebenzela uNkulunkulu? Kungalungiswa njani lokhu?
ILANGA LESITHATHU ISIHLOKO: IBANDLA ELIKHONZA NDAWONYE –AMAHAMENTE
IZIFUNDO: IMISEBENZI 2: 42, AMAHEBERU 10: 24-25
“Ukutshumayela njengo mphostoli, ungahlanganisanga ndawonye labo abaphendukileyo ubafundise ngendlela kaNkulunkulu, kufana lokukhulisa umntwana ukuthi abulawe.” John Wesley.
Amahamente kubandla leMethodist anika isisekelo esiqinileyo ngokuqala kwebandla “leMethodist Movement” ukupha ubufakazi ngoJesu Kristu emhlabeni jikelele, njalo lokulandela imfundiso zakhe ngokuba lesihelo, lokumela iqiniso, ukudumisa lokuzinikela uholwa nguMoya Oyingcwele. Amahamente ngokunye kwensika encedisileyo ekuqineni kwebandla leMethodist kusukela ngo1742. UJohn Wesley ubekholelwa ukuthi izeluleko, ingxabano, lezinqumo kungenziwa ngokupheleleyo langokuthula emihlanganweni yamahamente.
Izizatho zamahamente yilezi:
- Ukuxoxisana lapho kube lokuphambaniselana omunye ko munye
- Ukusizana lokukhuthazana ekuhambeni loNkulunkulu.
- Ukunika ubufakazi bukaJesu Kristu emhlabeni, lokulandela imfundiso ngemisebenzi yesihawu, ukumela iqiniso, ukudumisa, lokuzinikela uholwa nguMoya Oyingcwele.
- Ukuncedisa amalunga ukuthi akhule njalo amazi uJesu Kristu njalo afunde ukuphila impilo elobuKristu.
Sekubonakele impumela emangalisayo ebibonakala ngokungena kwabantu amahamente, uJohn Wesley wabhala wathi,” Ngemva kokucabanga, ngiyabona, ukuthi lokhu yikho sibili [amahemente]
okwakukhona ekuqaleni kwesiKristu. Esikhathini sakuqala, kulabo uNkulunkulu ayebathume ngaphambilini, batshumayela ivangeli kuzinanakazana zonke. …Kodwa kwathi ezinye zalezi sezithole iqiniso, njengokutshiya isono njalo lokudinga ivangeli losindiso, babahlanganisa ndawonye masinyane, babhala phansi amabizo abo, babaxwayisa ukuthi babeluse (Imisebenzi kaJohn Wesley, 1831:177). Amahamente ahle aba luphawu lweMethodist njengoba elesisekelo sombhalo. (Ibhayibhili) phakathi kuka 1745 lo 1748 uJohn Wesley lenhlanganiso yakhe yeMethodist movement bayekethisa amahamente izinto zaqala ukungahambi kuhle. Esenanzelele impumela embi ebangwe yikungenzi kuhle amahamente uJohn Wesley wabhala wathi, “Ibandla lathatha abantu abafakwa istatshi ba-ayinwa bengaka watshwa.”
Ibandla leMethodist eZimbabwe lokhu libambelele kumbono wamahamente noma nje kwezinye indawo kunzima ukulandela indlela kaJohn Wesley. Amahamente alokhu esancedisa ngoba engezelela ukuthi abantu baqhubekele phambili ngokholo lwabo ngoba elokhu ehlanganisa abantu ngamaqembu amancane ukuze abantu bengalahleki ebandleni. Okunye njalo, amahamente ayasondeza amathuba viki ngeviki ebuqothweni bokuthi impilo yobuqhotho ayimanga. Ekuzwisiseni lokhu, akula muntu ongazibiza ngokuthi unguMethodist yena engekho kuhamente elisebenzayo. “UMethodist ngulo ophila ngendlela, etshengisa indlela yokwenza elotshwe ebhayibhilini.”- John Wesley
UMCABANGO: Singawaqinisa njani amahamente ethu ukuze kusetshenzwe ngokuphumelela?
ILANGA LESINE ISIHLOKO: IMETHODISM LOKUNIKELA
ISIFUNDO: 2 KWABASEKORINTE 9: 7-15
“Nxa indoda isiba likholwa, isuka ikhuthale, ithembeke njalo icebe. Kodwa, nxa leyondoda, ithola konke ekwenelisayo isebenzele iNkosi ngekwenelisayo, kodwa inganikeli ekwenelisayo, Ngilethemba ngoJudas Isikariyoti kulaleyo ndoda!”- John Wesley
UJohn Wesley wayezwisisa ukuthi olunye uphawu lweqiniso lwamakholwa ngolokupha ngesihle. AmaMethodist akaboni isidingo asuke engasigcwalisanga. Kuntshumayelo yakhe ethi “The Use of Money” Ukusetshenziswa Kwemali, UJohn Wesley watshengisa izimiso ezintathu okumele zilandelwe lapho umuntu emele abelobudlelwano obuhle loNkulunkulu la bantu wathi, “thola konke okwenelisayo, ulondoloze konke okwenelisayo njalo unike konke okwenelisayo.”
Kodwa, kusiya ekupheleni kwempilo yakhe, ngemva kweminyaka engaba ngamatshumi amathathu etshumayele intshumayelo ethi ‘The use of money (Umsebenzi wemali), uJohn Welsey wanakana ngokukhula kweMethodist movement [ihlanganiso], yayisilamalunga azinkulungwani ezingamatshumi amahlanu Engilandi kuphela, njalo kunanzeleleka ukuthi ukukhula lokhu kwakukhona kwamanye amazwe. Ecabanga ngokukhula okungaka kwe nhlanganiso uJohn Wesley wakhathazwa yikukhula kwamaMethodist emnothweni eqathanisa lokusabela kwabo ekuncedeni abahluphekayo. Wabona ukukhula kumnotho njengesitha sokukholwa okuqotho. Okwakumkhathaza kwakungasikho kwenani lebandla kodwa ekufakeni umdladla kokungayisikho ngabantu abazibiza ngokuthi ngamaMethodist, njalo umdladla onjalo usiba yingozi ekukholweni okuqotho. Etshengisa ukwesaba kwakhe, wabhala mhlaka 4 kuNcwabakazi 1786 ukuthi, ‘Angesabi ukuthi abantu ababizwa ngokuthi ngamaMethodist bazaphila kunaphakade eYuropu kumbe eAmelika. Kodwa ngiyesaba, ukuthi bazaphila nje njengeqembu elifileyo, belesimo sokukholwa kodwa bengela mandla. Ngoba lokhu yikho okuzakwenzakala, ngaphandle kokuthi babambelele kumfundiso, kamoya Kanye lokuziphatha abaqala bekulandela.’
UJohn Wesley wayekhangelele ukuthi inotho lokwehluleka yikho okuzasinika uhlupho olukhulu kunhlanganiso yamaMethodist njalo lokholo nje jikelele, njalo lakulabo abazasala lalamhla kuMCZ. Ngo 1789 uJohn Wesley wananzelela ukuthi amaMethodist sebekwazi okubili kuzimiso ezintathu, basebethola konke abakwenelisayo, begcina konke abekwenelisayo, kodwa belohlupho ngokwesithathu. Nxa umuntu ubengakhangela eduze umumo esikuwo khathesi ebandleni le MCZ ubengakuvuma lokhu, njengoba kwakunjalo kudala ngensuku zika John Wesley ezokugcina, abanengi babe njalo balokhu begcina izimiso ezimbili zakuqala ezokuthola lo kulondoloza kodwa balohlupho ngokwesithathu.
IMCZ ilabantu abanengi abanothileyo. Bayatholakala endaweni zonke zomnotho kodwa ibandla liyatshikatshika ukuba lenotho yokwenza umsebenzi wokuhambisa ilizwi kanye lokukhangela amalunga ahluphekayo ebandleni. Imali ikhona ezikhwameni zabantu kodwa kayibuyiswa ku alithari. Impumela ekucineni yikuthi siyayengwa yibunengi babantu; abantu abanengi abangela zithelo ezibambekayo zomoya, ngakho kusikhokhela endleleni yehlanganiso efileyo leyo uJohn Wesley ayesesaba ukuthi izaba njalo. Ukuzihlola kuyadingeka kithi sonke singakaphuzi kakhulu. Ngalendaba uJohn Wesley wabhala wathi,’njengoba kungelalutho olungaba sobala kakhulu ngaphandle kokuthi sonke silandele imithetho eyakuqala ngaphandle kowesithathu, ukona kwethu kuyabe sekuphindwe kabili kulakuqala.’ Ukuzinikela ekunikeleni kukaJohn Wesley kwakufanana empilweni yakhe yonke. Nxa singamaMethodist aqotho njalo amakholwa aleqiniso, kumele silandele enyaweni zakhe.
UMCABANGO Awukhuthalelanga izimiso zakuqala ezimbili njalo utshiya esesithathu? Kulesidingo sokuthi sizihlole ngokwethu ngamunye!
ILANGA LESIHLANU ISIHLOKO: UKUTSHUMAYELA LOKUDUMISA NGOKUHLABELELA
IZIFUNDO: ABAHLULELI 5: 2-31, UEXODASI 15: 20-21
Laloba abantu bakudala bakoIsrayeli babesabela ngokuthi uNkulunkulu ungubani lokuthi wenzeni ngamahubo lokugida, kunjalo lakuMethodist ngendaba zokuhlabela. Isihlabelelo seMethodist siluhlelo lwamahubo atshengisa ukholo lwethu ukuthi uNkulunkulu ngubani, lalokhu azabe ekwenza kithi njalo aqhubeka ekwenza. Lokhu kwakunjalo kusukela kudala eminyakeni yama1700. UCharles Wesley waye ngumlobi omkhulu wengoma njalo ingoma zakhe zilokhu zisetshenziswa ekudumiseni enkonzweni zalamhla, konke ngesilungu langesintu. Izingoma lezi ziyaqinisa ukholo lemfundiso zenhlanganiso yeMethodist.
Ukuhlabela luphawu oluqakathekileyo lokutshumayela, ngoba kuncedisa intshumayelo.
Kunjalo, njengoba kuphawuliwe ekuqaleni, lokhu akuqalanga ngoCharles. Leli lilifa alithatha kubokhokho bokholo, njengakuIsrayeli endala, njalo laqhutshwa kuzizukulwane, kuze kufike kusikhathi sethu. Kusukela kumavesi abhalwe phezulu lapha, sinikezwe izehlakalo lapho ukuhlabela kusetshenziswa njengophawu lwethemba lokubonga ekuthini uNkulunkulu ngubani njalo usenzelani, ikakhulu lapho esilwela thina abantu bakhe.
Ngokunjalo, ukutshumayela lokuhlabelela kuyafana nje lokutshumayela. Kuyasetshenziswa ezimfeni, emitshadweni, lapho kuvulwa amatshe ukuqamba nje okulutshwana.
Amaphimbo lamazwi ezingoma enza ukholo lwethu lukhumbulekhe. Izingoma zithinta umphefumulo. Kwesinye isikhathi uJohn Wesley wathi yena lapho ekhuthaza abantu ababizwa ngokuthi ngamaMethodist ukuthi bahlabele ngobucikho langomoya, “hlabela okulomvutho langesibindi esiqotho. Nanzelela ungahlabeli angazathi ufile kumbe ulele. Ungaklabalali ukuze uzwiwe ngaphezulu kwabantu bonke ebandleni kodwa lwisa ukuthi amazwi enu wonke ahambelane ndawonye.”
Ukuhlabelela kulendlela yokungena kuhlabe umxhwele kuveze imizwa yethu lendlela uNkulunkulu asebenza ngayo ebandleni. Ukuhlabela kuyahlanganisa ibandla.
UMCABANGO: Ngokuhlabelela siyadumisa njalo sikhonze uNkulunkulu. Yiziphi ingozi ezingalethwa ngamanye amakhorasi kunkolo yeMethodist?
ILANGA LESITHUPHA ISIHLOKO: UBUBI BEZIDAKAMIZWA
ISIFUNDO: IZAGA 23: 20-21; 29-32 UHABHAKUKU 2: 15-16
“Ungumuntu na? UNkulunkulu ukwenze waba ngumuntu; kodwa wena uzenza inyamazana. Utshiyana ngaphi lenyamazana umuntu? Akusikho kakhulu ekucabangeni lase kuzwisiseni na? Kodwa wena ulahla konke ukucabanga olakho. Uyazikhipha ukuzwisisa. Wenza konke okwenelisayo ukuzenza inyamazana, hatshi isiwula, hatshi uhlanya kuphela kodwa ingulube, ingulube engcolileyo.-“ (John Wesley, “ Ekhuluma lesidakwa)
Izidakamizwa ludubo osoludabule inhlalo yabantu, ukukholwa, ezemnotho njalo lemfundiso ephathelane lempilo yabantu. Ibandla lalo liphakathi kobubi lobu. Lokhu kungoba labo abasebenzisa izidakamizwa ngezinye indlela balobudlelwano lamalunga ebandla; njalo asingeke sale ukuthi abanye balabo abasebenzisa izidakamizwa ngamalunga ebandla. Ngaphandle kwalokhu, amalunga ebandla kabaphili emoyeni kodwa ebantwini. Baphila emhlabeni wonalo okulabantu abasebenzisa izidakamizwa. Lokhu kutsho ukuthi kumele siqaphele ngoba abantwana baphakathi kwazo izidakamizwa.
Ngokunjalo, ayisibo bodwa ababhemayo okumele sikhangelane labo. Kulalabo abathengisayo labanikayo, ngokunjalo uJohn Wesley wayengela mazwi amahle kubo ngesikhathi sakhe, njengoba lathi singafanelanga ukumelana lalabo abezidakamizwa. Imbali yemfundiso yeMethodist iyasitshengisa ukuthi uJohn Wesley wayezwisisa ngendlela ayesenza ngayo izinto. Wayengakhalimeli kuphela izidakwa leziphofu kuphela, kodwa wayekhalimela lalabo abathengisayo abalecala lokudala izidakwamizwa ngasekuqaleni. Mhlaka 11 Mbimbitho ngo 1743 wathatha amanyathelo alukhuni ngezidakwa ezazise sontweni. Kacinanga lapho, kodwa wasola lesi senzo ngesikhathi sokusebenza kwakhe konke. Mhlaka 14 Nhlolanja 1744 uJohn Wesley watshumayela intshumayelo elesihloko esithi, “Ukusetshenziswa kwemali.” Kule intshumayelo watshengisa ukuthi, “Asitholi lutho ngokuzwisa umakhelwane ubuhlungu emzimbeni wakhe. Ngakho akumelanga sithengise iloba yini ephambanisa impilo.” UJohn Wesley wakhuthaza abantu ukuthi bayekele konke okubutshwala lokunye okudakayo, njalo wakhangela labo ababuthengisayo ‘njengabanika utshefu’ ‘lababulali’. Ukuzwisisa kwakhe kwakuyikuthi indawo kuphela elungele utshwala ‘kusegehena’. Ukuzwisisa kukaJohn Wesley abelakho, lokulandelwa ngamaMethodist khathesi yikuthi ukunatha utshwala buqeda ubuntu. Ukunatha utshwala lo kusebenzisa ezinye izidakamizwa yikubiza okungalunganga emzimbeni womuntu. Umbono kaJohn Wesley lo weyame kuzimiso zebhayibhili, ikakhulu kuZaga 23 onikezwe ngaphezulu. Ngokubona komlobi wogwalo lweZaga, akulanto enhle lakancane ephuma ekunatheni utshwala kumbe izidakamizwa, ngakho amakholwa onke abadala labancane, kumele baxwayiswe ngokufaneleyo.
UMCABANGO: Yiziphi izifundo amaMethodist alamhlanje angazifunda phakathi kwemfundiso kaJohn Wesley mayelana lengozi yezidakamezwa lotshwala na?
ILANGA LESIKHOMBISA ISIHLOKO: UKUHLALA OTHANDWENI LONKULUNKULU
IZIFUNDO: JOHANE 15: 1-12; KWABASEROMA 8: 35-39; 1JOHANE 4: 7:12
‘Ukholo luthando ku Nkulunkulu lakumakhelwane, kusitsho kuye wonke umuntu emhlabeni.’ – John Wesley
UJohn Wesley wafinyeza ukuphila kwesi Kristu ngemithetho emithathu elula, ethi, ‘ungalimazi, yenza okuhle, njalo hlala ethandweni loNkulunkulu.’ Okuqakathekileyo kulesi isifinqo sika John Wesley yikuthi nxa ungenzi okwesithathu, ukuhlala othandweni lukaNkulunkulu, awusoze ubelamandla okwenza okunye lokhu okubili.’ Lokhu kutshengisa ukuthi uthando luqakatheke kanganani. Luyasenelisa njalo luvule izindlela zokwenelisa zonke ezinye izinto.
Intshumayelo zikaJohn Wesley eziqakathekileyo zazingezothando lukaNkulunkulu. Zazifudumeza inhliziyo ezibandayo. UJohn Wesley wathi, ‘Nxa sikhangela ngethemba kuKristu uthando lukaNkulunkulu luyathululelwa enhliziyweni zethu ngoMoya Oyingcwele. Ngakho singaletha inhliziyo zethu ngothando kuNkulunkulu, lakubangane, lebantwini jikelele lakuzitha zethu. Ukuba lothando kuNkulunkulu kutsho ukumnika lokho okumfaneleyo, okuluthando.’
Ukuba sothandweni loNkulunkulu, kumele sibe lesikhathi elizwini lakhe. Nxa umuntu ehlala elizwini likaNkulunkulu, kwanda ukukhulumisana laye. Ukukhuleka lakho kuqakathekile njengoba kuyindlela esikhuluma ngayo loNkulunkulu. UJobe wahlala elizwini likaNkulunkulu ngakho wayesethandweni loNkulunkulu, okwenza wanganyikinywa ngesikhathi senhlupho zakhe ngoba uthando lunqoba konke.
Ukuhlala othandweni loNkulunkulu;
- Lungisa ubudlelwano bakho loNkulunkulu.
- Lungiselela inhliziyo elokubonga kuNkulunkulu.
- Qeda isikhathi esiqondileyo udumisa, utshengisa ukubonga kuye.
Khangela uthando lukaNkulunkulu njengencwadi yothando
- Bala ilizwi lakhe ukhangelele ukuzwa lokubona okutsha okusuka kuNkulunkulu.
- Buza uMoya Oyingcwele imibuzo.
UMCABANGO Thanda uNkulunkulu ngoba yena wakuthanda kuqala ngothando olunaphakade. Uthando lwethu kuNkulunkulu lukhula lapho siludlulisela kwabanye. Umuntu othanda abanye abantu uthanda uNkulunkulu. Ungomunye wethu yini othanda uNkulunkulu?
Methodist Church: Hillside Circuit 
You must be logged in to post a comment.