Select:
Ilizwi Lakuqala
Sesifikile njalo isikhathi lapho esithola khona amathuba njenge bandla le Methodist in Zimbabwe ukuthi sithakazelele impilo lemfundiso yemuli yako Wesley labanye bakhe njengalaba… unina, uyise, abanewabo,odadewabo labanye abazalwane bokholo, ukuze sithaphe kulo umthombo njalo senze lokho okwakubakhuthaza bona. Isiko leli liyasinceda ukuthi sizazi ukuthi singobani siqakathekisa lokho okutshengisa ukuthi singobani njengabantu ababizwa bethiwa ngama Methodist. Njengoba siholwa yi ndikimba ethi…Ukuthemba uNkulunkulu kuzimo zonke, siyakholwa ukuthi iviki le ka Wesley yalonyaka izasikhuthaza ukuthi sizwisise lapho esivela khona,ilamuhla yethu lekusasa yethu elokhu isahamba.
UNkulunkulu abusise abantu ababizwa ngokuthi ngama Methodist.
Revd Dr D Muzenda
(Omele u Mission Director)
Isibongo
Ugwalo lolulwe Wesley week lulotshwe ngu Rev Chaguduma (R&P Coodinator)
lwatolikelwa esi Ndebeleni ngu Nkosikazi Makoni lo Nkosazana S. Tshuma bephathisana lo Nkosikazi L. Tshuma.
ILANGA LOKUQALA
ISIHLOKO: UKUTHEMBA UNKULUNKULU KUZIMO ZONKE
ISIFUNDO: Habhakhukhi 3: 17-18
“Okuhle kakhulu kukho konke kuyikuba uNkulunkulu ulathi. Ngakhoke, lingesabi ngoba lowo olathi mkhulu kakhulu kulabo bonke abasihlamukelayo”– John Wesley (Journal, June 17, 1739).
Lanxa lamazwi kaJohn Wesley esaziwa njengamazwi akhe ajayelekileyo okuvalelisa ngo1791, wayeke wawabhala ngasemva kugwalo lwakhe lukaNhlolanja 17, 1739 ngesikhathi esizwa ukujula okwakubanzi ngempilo yakhe yakomoya lokubaluleka kokwethembela kuNkulunkulu. Amazwi la ayeyinkuthazo kwabanye bakhe ukuba bangakhulelwa yikwesaba nxa behlangana lezimo eziqeda amandla lothando. Okuqakathekileyo akusi zehlakalo kodwa nguNkulunkulu olathi izikhathi zonke.
Lamhlanje lilanga lokuqala lweviki yezifundo zikaWesley. Sifuna ukukhangela indikimba yalonyaka esungulwe ngoZibandlela. UHabhakhukhi wayengumphrofethi ngesikhathi sombuso weNkosi yakoJuda, uJehoiakim nge7th (century BC). Sasiyisikhathi sodlame kungela lokuthula eAncient Near East (ANE), umbuso weBhabhilona ubusa okwakusethusa uJuda. Umbuso kaIsrayeli weNingizimu owawugoqela imihlobo elitshumi yayisinqotshiwe yiAssyria. Nxa sibala kuHabhakhukhi 1:6-7, sifunda ukuba umvukela weBhabhilona wawulicebo likaNkulunkulu lokuqondisa uJuda. Manje umvukela wawungasindaba emnandi kuHabhakhukhi. Laloba wayesazi ukuthi abantu bakibo babewonile phambi kukaNkulunkulu kwakungalungile kuye ukuba abantu abalolunya babuse abakhethiweyo bakaNkulunkulu. Isahluko sokuqala lesesibili yingxoxo phakathi kukaNkulunkulu loHabhakhukhi lapho uHabhakhukhi abuza khona uNkulunkulu ngokungabonakali kokulunga lokubusa kwakhe phambi kwabakhohlakeleyo lalabo abathwele nzima. Isahluko sesithathu ngumthandazo lapho uHabhakhukhi asenanzelela khona imvelo kaNkulunkulu lobudlelwano bakhe labantu bakhe abeseveza isibindi sakhe sokwethemba ukuthi uNkulunkulu uzenelisa ukukhulula
abantu bakhe kokubi.
Ngokwazi kwakhe ukuthi amaBhabhilona angangena azabhidliza njani indlela zabo abaphila ngazo kanye lokuhanjiswa kwenhlelo zempilo yabo koJuda, uHabhakhukhi wakuveza mgceke ukuthi uzala ekholwa kuNkulunkulu wakhe. Uveza ububi obungavelela abantu bakaNkulunkulu esazi mhlophe ukuba ukholo lwabo lungazunguzwa njani. Laloba kunjalo, ngobunzima langenhlupheko ayekhangelane lakho, uHabhakhukhi wasekhuluma obala wathi, “Ngizathokoza eNkosini, ngijabule kuNkulunkulu wosindiso lwami”. Wayezathokozelelani ekhangelane lokuhlupheka? Ngoba onguye owadala izihlahla zomkhiwa, amavini lezifuyo uyaphila. Nxa ephila silokubhekana lekusasa ngesibindi. Esidlula kikho ayisiso isiphetho.
Nxa sicubungula injongo yombhalo sithola ukuba uHabhakhukhi usipha indlela zokunqoba indubo esihlangana lazo empilweni:
~Zamukele indubo zinjengoba. Ungenzi angani konke kuhamba kuhle khona ngeqiniso kungenjalo.
~Tshela uNkulunkulu ngazo. Ungathuli laloba uNkulunkulu ezazi singakazibiki (Amahubo 38:9; uMathewu 6:8).
~Bekezela eNkosini ngokuthandaza langokufunda ilizwi. UNkulunkulu uzaziveza kuwe ubusubona isizatho sokuthokoza eNkosini laloba ubhekane lendubo ezinjalo.
~Ungabalekeli indubo zempilo ngoba uNkulunkulu ufuna ukuzisebenzisa ukuqinisa ukholo lwakho.
~Ungathandabuzi nxa usemnyameni lokho uNkulunkulu akutshele khona ekukhanyeni.
UHabhakhukhi uyathokoza ekuhluphekeni kodwa ethokozela eNkosini. Lokhu kutshukuthi akaboni sizatho sokuvumela inhlupho zakhona kodwa ulethemba kulowo ophezu kwazo inhlupho.
Siphetha, sifanele sinanzelele ubuMina obusetshenziswa nguHabhakhukhi. Libizo elikhomba isikhulumi kuphela hatshi omunyumuntu. Lapha uHabhakhukhi akanakile ngokuthi abanye abantu bazakuthini ngesimo abakhangelane laso. Indaba uyifaka emahlombe akhe. Ukhuluma ezimele. Indaba zokwethemba uNkulunkulu ngezomzwangedwa. Methembe kuzehlakalo zonke.
ILANGA LESIBILI
ISIHLOKO: UNGENZA NGILALE NGOKUTHULA
ISIFUNDO: AMAHUBO 23: 1-2
“Ukuthula kukaNkulunkulu akusinto embi nje, ayisi kusweleka kohlupho kodwa kuyinto enhle njalo kuyikuzwa uthando lukaNkulunkulu lobukhona bakhe” (John Wesley).
Lamhlanje lusuku lwethu lwesibili lokunanzelela iviki likaJohn Wesley. Ingxoxo yethu lamuhla igxile ekuthuleni esikuthola kuNkulunkulu nxa simethemba. Njengoba sesike sakubona kungxoxo edluleyo lakumazwi aphezulu akhulunywa nguJohn Wesley, ukuthula lokhu akutsho ukusweleka kwenhlupho kodwa kutsho lokho uNkulunkulu akwenzayo siphakathi kwalezo nhlupho.
Amahubo 23 lihubo elalotshwa nguDavida ngesikhathi sakhe eyiNkosi kaIsrayeli. UDavida ukhuluma ngobudlelwano bakhe loNkulunkulu ekuthathela ekubeni kwakhe ngumelusi wezimvu zikayise uJesse ayeyikho khona. Kuhubo, uDavida ubonisa ukuthi ungokabani njalo umnini ngubani.
Laloba uIsrayeli wayemazi ngengomalusi, uDavida wayezwisisa ukuba uyimvu eyeluswa yiNkosi. Kanti kodwa kuyini okwenza iNkosi ibe ngumalusi ohlukileyo kulabanye ongaze uDavida akhulume ngaye kangaka aze amqambe langebizo? Ivesi yesibili ilempendulo; “Uyangilalisa emadlelweni aluhlaza….” Omunye umlobi odumileyo uPhillip Kuler, uthi yena into emangalisayo ngezimvu yikuba kudalwa kwazo kunzima ukuzenza zilale phansi ngaphandle kokuba kwenzeke izinto ezine ezilandelayo.
i. Ukwesaba. Ngokwethuseka kwazo lula, izimvu ngeke zilale phansi ngaphandle ukwesaba konke kususiwe. Zingaqeda ilanga lonke zibalekela impilo yazo. Phezu kwalokhu, ezimithiyo zingethuka kumbe zixotshaniswe yizilo sezingaphunza amazinyane asweleke. Umalusi oqotho uyakwazi lokhu ngakho uba lesiqiniseko sokuthi izimvu zakhe uzikhokhelela lapho ezingeke zifinyelelwe yizilo. Ngokunjalo futhi, izimvu azikwazi ukuzilwela. Nxa zibhekane lezilo, azikwazi ukuzilwela kodwa umalusi wazo nguye ozilwelayo enze indawo yazo ithule ukuze zenelise ukulala ngokuthula. Lakubantu bakaNkulunkulu kwenzeka kanjalo. Abantu bakaNkulunkulu mangqamu nje ngeke balwe izimpi zabo baphumelele kodwa uNkulunkulu nguye obalwelayo. Ukwazi ukuthi uNkulunkulu uyasilwela kuletha ukuthula engqondweni zethu laloba kulemimoya elwisana lathi. Akusimlandu wethu ukuba sizilwe kodwa ngokweNkosi engumalusi wethu.
ii. Ukugudlana. Ngendalo yokuhlala kwazo zingumhlambi izimvu, azenelisi ukulala phansi ngaphandle zekele ukugudlana lezinye zazo. Ingxabano lomhawu emhlambini, ebandleni kumbe emulini kungaba yinto elimazayo kakhulu. Izimvu azihlaliseki ziyabe zibotshiwe njalo zingakhululekanga. Kungenani, umalusi lezo ezibangela ukugudlana uyazazi abesesenza okufanele akwenze. Lokhu kutsho ukuthi asomlandu wethu ukumelana lalabo abalomhawu, labo abenza izimo esikuzo zingasebenzeki lalabo abasididayo nje. Laloba singaba bazi ngamabizo labobantu, uNkulunkulu uyabazi laye njalo wenza lokho okubafaneleyo ukuze sibe lokuthula ngaphakathi kwethu.
iii. Imikhaza. Nxa ziphazamiswa zimpukane kumbe imikhaza, izimvu azilali phansi. Imikhaza yizibungwana ezimunya igazi lamafutha enyamazaneni. Iphila ngokumunya igazi lezimvu. Ngamanye amazwi ayilanto enhle eyitshiyayo ezimvini ngaphandle kokumunya lokho okuqakathekileyo kizo. Lanxa kunjalo, zona ngokwazo izimvu azingeke zimelane lemikhaza.
Kungumlandu womalusi ukuyifafaza ngomuthi oyibulalayo ukuze izimvu zilale ngokuthula endaweni engelamikhaza.
iv. Indlala. Izimvu ngeke zilale zisizwa ukuthi kufanele zidinge ukudla. Zifanele zisuthe. Zona ngokwazo azikwazi lapho okulamadlelo aluhlaza. Umalusi nguye okwaziyo azikhokhele khona. UNkulunkulu nguye osipha konke esikufunayo lesikudingayo njengomhlambi wakhe. Ikusasa lethu asilazi ukuthi lisiphatheleni kodwa yena uyazi. (Amahubo 37:3; uIsaya 30:23; uJohane 10:9; 1Petro 2:25). Lokhu kusikhumbuza uthando lukaNkulunkulu lokusikhusela.
Njengoba sesibonile kuzehlakalo zone ezimiswe ngaphezulu, kuloluhambo lwesiKhristu singabhekana lezilo mathupha kumbe ngokomoya kumbe sihlangane lengxabano lesiphila labo, labo abangafuni ukusibona siphumula baze basisusele amanqe ngempilo zethu, sigqagqelwe yimikhaza labo abafuna ukuhlala besimunya amandla ethu ngemikhuba yokungathakazeleli esikwenzayo kumbe siswele indingeko zokuphila. Asingeke senelisa ukunqoba izimo zonke lezi ngokwethu. YiNkosi, uMalusi wethu omelana lezimo zonke ezisihlukumezayo abeseletha ukuthula ngakhoke siyamethemba ezimeni lezi zonke.
ILANGA LESITHATHU
ISIHLOKO: UMHLOBO OWENYULWA EMLILWENI
ISIFUNDO: UGenesis 45: 1-15; uZakhariya 3: 2
“Lina ngempela lingumhlobo owenyulwa emlilweni” – Susanna Wesley.
Mhlaka9 kuNhlolanja, 1709, uJohn Wesley eleminyaka eyisithupha yokuzalwa, indlu yebandla ababehlala kiyo eEpworth yatsha phakathi kobusuku. Abazali, izisebenzi labantwana bonke baphuma phandle nje kalula kodwa umfanomncane uJacky (John) wabuyela wayalala lapho uBetty owayeyisisebenzi emlayele ukuthi amlandele phandle. Uyise, uSamuyeli wasezama kanengi ukuthi amkhuphe kodwa ilangabi elalivelela eleleni elaselitshe laphela lalimvimba. Esekwamkele ukuba senqotshiwe wasuka waya esivandeni ezitshela ukuthi sekuphelile ngoJacky, uJohn. Ndawonye imuli yasikhuleka ukuba uNkulunkulu amukele umphefumulo kaJohn. Kwakungemva komthandazo lapho uJohn abonwa ngomunye umuntu esefasteleni. Akuchithwanga isikhathi kudingwa ilele lokuba bagade, bacabanga ukwenza okwakungaphathisa ngokuphangisa omakhelwane. Omunye wama emahlombe omunye wadonsa uJohn emkhupha ngefasitela uphahla lalo lusiwa kulelo kamelo. UJacky (John) waphila ngesimanga. Kungenxa yesehlakalo somlilo lesi okwakusenza unina, uSusan abize uJohn ngokuthi ‘ngumhlobo owenyulwa emlilweni’ ekuthathela kuZakhariya 3:2, njalo laye uJohn wayezibona enjalo ngokutshisa okwakusenza ivangeli ngaphakathi kwakhe. Imbangela yomlilo owatshisa indlu ayiqedakali. Kucatshangelwa ukuthi umlilo wawuhlose ukutshisa impahla. Amanye amalunga ebandla labomakhelwane ababengathandi intshumayelo zikaSamuyeli Wesley yibo abacatshangelwa ukuba babefuna ukumbulala lemuli yakhe besebuthongweni, ngenhlanhla uNkulunkulu wayivikela imuli, ngesimanga wacezisa uJohn ngenjongo ayelayo ngaye. UNkulunkulu uyazicezisa impilo ezicezisela izizatho ezithile njalo ezinhle.
Kusifundo esibaliweyo, uGenesise uyasikhumbuza ukuthi uNkulunkulu ugcina njani abantu ebagcinela injongo zakhe eziqakathekileyo. Kulindaba sikhunjuzwa ngendaba kaJosefa labanewabo. Nxa sibala uGenesise 37 sihlangana loJosefa ezondwa ngabanewabo ngenxa yokuthandwa kwakhe nguyise langenxa yamaphupho akhe. Inzondo le yabangela ukuthi abanewabo bacabange ukumbulala uJosefa kodwa akusabanga njalo baphetha ngokumthengisela abakoIshmayeli bona abaya laye eGibhithe. Wahlupheka kakhulu uJosefa eyisigqili sikaPhothifa eGibhithe (uGenesise 39-40) uNkulunkulu waze wamkhulula ngesipho sokuchasisa amaphupho, isikhundla esaphetha simenza umsekeli womphathi womhlaba weGibhithe.
UGenesise 45 umayelana ngezehlakalo ezenzakala ngemva kweminyaka engamatshumi amabili kusukela ngesikhathi uJosefa ethengiswa ngabanewabo. Kuyamangalisa ukunanzelela ukuthi laloba basebekhohliwe ngoJosefa, uNkulunkulu yena wayengamkhohlwanga. Okwesibili, ngesikhathi sonke seminyaka engamatshumi amabili akula lamunye wabafowabo owabhubhayo. UNkulunkulu wabagcina ukuze bafakaze kuhle lokho ababethe ngeke kwenzakala kibo okokuthi uJosefa ababuse. Ngezinye izikhathi uNkulunkulu uyabagcina abasizondayo ukuze basibone sesiphumelele empilweni, besibone sesichaphile umfula.
Okwesithathu ngemva kweminyaka engamatshumi amabili, akula loyedwa wabanewabo bakaJosefa owayesetshintshe isithombo lokukhangeleka kwakhe. Ibhayibhili lithi, “UJosefa esebabonile abafowabo wabazi….” (uGenesise 42:7). Bona kodwa abamazanga. Lokhu kutsho ukuthi impilo kaJosefa yayisiqhubeke yaba kuzinga eliphezulu eyabanewabo yona yayimi. Wabacina bengabantu beganga ababeselusa imihlambi yezimvu egangeni, sekwedlule iminyaka engamatshumi amabili babelokhu bekhangeleka bengabantu beganga. Akula okwasekutshintshile kibo. Nxa ufuna impilo yakho ingahambi, iba lolunya komunye umuntu. UNkulunkulu uvame ukuma labahlukunyezwayo. UJosefa ‘njengomhlobo owenyulwa emlilweni’ wayesengale kwabo bona abanewabo basala bengela labenelisa ukukwenza ngaphandle kokwelusa (uGenesis 47:3).
Omunye sengakholwa ukuthi uPhothifa laye lomkakhe abake benza impilo kaJosefa yangabi mnandi labo basebemkhothamela uJosefa befuna amabele. UNkulunkulu uyazitshintsha izinto. Lokhu kuyinkuthazo kibo bonke abahluphekayo behlutshwa yilabo abalomhawu lomona, umlilo eledlula kiwo awusoze uliqede. Lizathi liphuma lapho lizabe selilamandla okwenza lukhulu ukwedlula lokho abantu abalicabangela khona. UNkulunkulu uzaligcinela izizatho zakhe ezithile. Lezitha zenu uzazigcina ukuze zifakaze sokusenzakala lokho abangakufiseli khona khathesi. Okwakho yikuthemba uNkulunkulu ezimeni zonke.
ILANGA LESINE
ISIHLOKO: UKUTHEMBA UNKULUNKULU EKUHLASELWENI NGUSATHANI
ISIFUNDO: Imisebenzi 28: 3-6
“Indlu yangakithi iphazamiswa yimisindo emangalisayo kuliviki…. Ngileqiniso ukuthi yimisebenzi kasathani le… USathani usemsebenzini wakhe ngakithi… Kodwa angesabi, ngoba ngiyazi ukuthi uNkulunkulu umkhulu kuloSathani”– John Wesley [Journal, December 11, 1716]
Siyake sizwe ngokuhlaselwa kwezindlu lapho izinto ezingajayelekanga eziyabe zisenzakala khona okunje ngabantu abaphonguke bavuke sebelele phandle bona bekade bebelele emakamelweni abo, ukuzwa izitsha zigeziswa ngabantu abangabonwayo kumbe izinanakazana njalo njalo. Kwakunjalo endlini yebandla eEpworth lapho uMfundisi uSamuyeli Wesley ayehlala khona lemuli yakhe. Okwenyanga ezimbili kusukela ekuqaleni kukaMpalakazi ngomnyaka ka1716 kusiya ekupheleni kukaZibandlela 1717, kwakusenzakala izinto ezingaqedakaliyo endlini kaMfundisi imuli yaze yavumelana ukuthi yizipoko ezazibahlukumeza. Abantwana babesizwa izisindi zomuntu owayehamba phandle, izivalo lemiduli kuqoqodwa, bebona into engani ngumuntu iphuma iphinde ingene ngomkenke wesamende phansi endlini. Sebejayeli izenzo zesipoko lesi, abantwana baze basetha ibizo lokuthi Old Jeffrey. Ngokuxoxa labanye mayelana ngezehlakalo lezi ezazingaqedakali kangaka zisenzeka endlini kaMfundisi, uSamuyeli Wesley wathola amacebo lemizamo yokusixotsha isipoko kodwa konke akusebenzanga. Amanye amacebo ayegoqela ukunxusa omunye uMfundisi ekukhulekeni lemuli ngezikhathi zantambama, ukuvuthela uphondo nxa babesizwa imisindo yesipoko sakhona iqalisa, ukuthengwa kwenja eyayizabe inkonkotha ngebhonga lapho isipoko sasizabe siqalisa iziga lokusihlabela umkhosi nxa sasiqalisa njalonjalo.
Kungenani le imizamo yonke eyayisenziwa, isipoko sasisiba lolaka oluphindiweyo. Kwaba lapho uSamuyeli Wesley ananzelela khona ukuthi isipoko yinto nje eyadalwayo lokuthi lo owayephakathi kwakhe mkhulu kulaso lapho izinto zonke ezatshintsha khona. UMfundisi omdala weNgilandi, uMfundisi Samuyeli Wesley wabalokholo olukhulu ukwedlula ayelalo wasesilayela isipoko ukuthi siphume endlini yakhe ngegama likaJesu kwabayikuphela, kwabalokuthula endlini kaMfundisi. Ulwazi lungamandla. Awudingisawudo lamatshe nxa ulwisana losathani ngoba ngelinye ilanga uzakuhlasela ukhatshana lesawudo lakho, awudingi kulala ukhanyise ngezibane nxa usilwa loSathani ngoba engakuhlasela laloba izibane zikhanyisa. Kufanele wazi ukuthi uthwele amandla alowo omkhulu kuloSathani.
Kusifundo esifundwayo, uLuka usitshengisa okwenzakala endaweni yeMalta ngemva kwezehlakalo zokubhidlika komkhumbi elwandle lweAdriatic. UPawuli wayesindile engozini yomkhumbi elwandle, nanko sekubuya okunye futhi ngamandla. Ehamba labahlali bendawo, uPawuli walunywa yinyoka eyayibulala khonapho khonapho. Okufanele sikunanzelele yikuthi inyoka ayizange imlume nje kuphela kodwa yazithandela yanamathela ukuze ubuhlungu bayo bungene okuzwayo egazini.
Abantu ababeloPawuli babesazi ukuba inyoka yakhona ibulala njani njalo babelengcazelo zabo ezitshiyeneyo ngesehlakalo lesi. Isimanga kibo kwaba yikuthi uPawuli kethukanga. Wayithintithela emlilweni leyonyoka yafa. Ababelapho babecabanga ukuthi bazabona isandla sikaPawuli sivuvuka kodwa akusenzakalanga ngaleyondlela. UNkulunkulu owakhuphula uPawuli emkhunjini owawusutshona elwandle lweAdriatic wamvikela ekubulaweni yibuhlungu bamathe enyoka. Ethembele kuNkulunkulu wakhe, zonke izehlakalo lezi azizange zimsuse ekholweni uPawuli. Waphongukuyithintithela emlilweni inyoka waseqhubeka ngayekwenza. Ngokwethemba uNkulunkulu ezimeni zonke, amaKhristu afanele afunde ukumthintithela emlilweni uSathani aqhubekele phambili. Akufanelanga baqedwe amandla yilokho uSathani akwenzayo kibo. Omkhulu ngulowo okithi kulezipoko ezisemhlabeni. SiloKhristu singabanqobi abaphindiweyo ngaye. Singasweli ubuthongo ngesihlangana lakho. Silaye “ophethe amakhiye kaDavida. Akuvulayo akekho okuvalayo njalo akuvalayo akekho okuvulayo.” (Isambulo 3:7) Uba uNkulunkulu engowethu, ngubani omelana lathi (AbaseRoma 8:31). Ngempela akekho.ngalokhuke, simethemba ezimeni zonke.
ILANGA LESIHLANU
ISIHLOKO: UKUCEZA YONKE IMIGOQO USIYA EMUSENI WE WENKOSI
ISIFUNDO: AMAKHOSI ESIBILI 4: 18-37
“Isihlalo sobukhosi sikaNkulunkulu siyafinyelekeka kuzo zonke izikhathi, njalo singaya kiso loma yisiphi isikhathi ngesikudingayo loba lenhlupho zethu” – John Wesley
UJohn Wesley wakhuluma ‘ngomusa wokuvikela’. Wawubalisa njengomusa kaNkulunkulu osebenza ebantwini bengakawu nanzeleli, Kusiya ngo John Wesley, lo umusa usebenza esimeni somuntu, uguqulela inhliziyo yomuntu ikhangele kuNkulunkulu. Kungenani-ke, lanxa umusa ukhona kangakanani emuntwini wonke, ingabakhona imigoqo, ibekhona mathupha kumbe ngokomoya, ekwamukeleni lo umusa. Kungalokhu-ke ukuthi amakholwa kumele ananzelele imigoqo njalo bayiceze.
Amakhosi esibili 4: 1-37 usitshengisa isigaba somusa siphathwa ngamalunga omphakathi ababesaziwa njenga ‘bahlali bemingceleni’ njengokwakuyinkulumo yohlelo losuku. Owakuqala wayelezimanga ezimbili, okuyikuthi, wayengumuntu wesifazana njalo engumfelokazi. Owesibili wayengumuntu wesifazana owayengela ndodana. Kodwa-ke, langaphandle kwezehlakalo zabo, umusa wabenela kwaguquka amatafula.
Ku Makhosi esibili 4: 18-37 ophiweyo ngaphezulu, umlobi wogwalo lwesibili lwaMakhosi usilandisela ngokwenzakala e Shunem. Udaba lwakhona lude kodwa sifuna ukukhangela ngokwenzakalayo lapho umfana owayezelwe ngemuva kokulinda okukhulu, wagula wafa. Sitshelwa ukuthi umntwana wagula esemasimini loyise lokuthi uyise enelisa ukukwenza yikuthi athume isisebenzi ukuthi sise umntwana owayesegula kunina, kuphela. Singaqala ukubona ukusilela kubaba onjengalo. Okwesibili, umntwana kuthiwa wahlala enyaweni zikanina kwaze kwaba semini, wasesifa. Unina womntwana wamthatha waya laye endlini ephezulu. Kazange atshele umkakhe, uyise womntwana, ukuthi umntwana usefile. Kungani? Ngalezo nsuku ensukwini zakudala kuma Israeli, obaba labomama babelezinto zokwenza ezitshiyeneyo nxa kungaba lemfa. Omama bebelomlandu wokukhala (Jeremiah 9:20), kanti obaba babelomlandu wokungcwaba ofileyo. Mhlawumbe umama wacabanga ukuthi angabikela ubaba womntwana ngalesi sehlakalo wayezahle aphange athinte izihlobo, omalume, labanye, njalo babezahle balungisele umngcwabo ilanga lingakatshoni, yena umama wayengazilungiselelanga kulokhu. Ukutshela umkakhe kwakungumgoqo wokwakumele awuceze ukuze abuyisele impilo yomtanakhe. Kwasinye isikhathi amathemba ethu ayangcwatshwa ngokupheleleyo ngoba siyahamba kakhulu kuzehlakalo zethu.
Kusigatshana u22-23 sitshelwa ngokuthi lanxa umyeni wayengela mcabango wokuthi umntwana usefile, wazama ngazo zonke indlela ukuthi avimbe umkakhe angayi lapho okwakulo Elisha khona isizatho kuyikuthi kwakungayisiso sikhathi esifaneleyo ukukwenza lokhu. Ngaphandle kokuceza lokhu okwakuvela kumkakhe unkosikazi kamvezelanga isizatho sokufuna ukuya emuntwini kaNkulunkulu. Ngumgoqo wesibili owesifazana enelisa ukuwubamba wawungowokunganaki izeluleko ngitsho lakulabo ababeseduze laye. Kwesinye isikhathi njengabantwana baka Nkulunkulu kumele sifunde ukungangeni kumpikisano eziphuma ngabaseduze lathi nxa bebuya beyimigoqo ekufinyeleleni kwethu isihlalo somusa.
Isigatshana 25-26 usitshela ukuthi lanxa uGehazi wayetshelwe ukuthi ayehlangana lowesifazana abuze ukuthi konke kwakuhamba kuhle yini, owesifazana kazange aveze indaba zakhe ku Gehazi. Kodwa wamtshela ukuthi “konke kwakulungile”, waqhubeka esiya emuntwini ka Nkulunkulu; enyaweni zakhe. Lokhu akuhambanga kuhle kuGehazi ngoba ekuqaleni kwakunguye owayejwayele ukuthatha izindaba zalo owesifazana azise kuElisha abuye alethe impendulo kulo owesifazana (4:11-16). Ngokunjalo, kulesisibanga uGehazi wazitshela ukuthi kwakungela muntu okwakumele aye ku Elisha engedlulanga kuye. Kodwa-ke, khathesi, uGehazi kwakumele eqiwe lanxa kwakungasoze kubekuhle kuye, owesifazana kwamhambela kuhle. Kwesinye isikhathi njengabantwana baka Nkulunkulu kumele sifunde ukungembuli izinto zonke kuGehazi ngokwale impilo. Akumelanga siphakamise uGehazi ngokwale impilo ngokubulala impilo yethu eqakathekileyo. Akungahambi kuhle kuGehazi kodwa kuhambe kuhle kithi.
Okokucina, kwakungemuva kokuthi owesifazana enelise ukweqa imigoqo yonke eqanjiweyo phezulu eyayisendleleni yakhe okwenza wayafinyelela isihlalo somusa mathupha njalo uElisha wahamba laye emzini wakhe wabuyisela injabulo yakhe. Indodana yakhe eyayifile yavuswa kwabafileyo. Uyafisa na ukuhluthuna lokhu okutshontshelweyo. Themba uNkulunkulu kuzo zonke izehlakalo uceze imigoqo usiya esihlalweni somusa.
ILANGA LESITHUPHA.
ISIHLOKO: Ukuba yisibonelo Sabakholwayo
ISIFUNDO: Eksodusi 32: 26
“Yekela konke okulusizi, kumbe okuthandabuzayo, kumbe okulokwesaba, uze Kimi ngizakwenza ubungcono bami ngikusize. Yekela bonke ababambelele emiphefumulweni yabo, labafisa ukukhula emuseni, babe lobuqotho, kabeze bahlanganyele lami. Asincedisaneni ukuya ezulwini” – John Wesley
Inkangelelo yethu lamuhla kayibe lokokwenza mayelana lokumela okulungileyo lokufaka isibonelo esihle kumakholwa. Lesi ngesinye sezigaba lapho uJohn Wesley abalokuzinikela okukhulu edweba izibonelo ezisuka ku Jesu Kristu iNkosi uqobo lwakhe. INkosi yethu ayizange ise abantu ababesebunzimeni komunye umuntu. Nxa sibala kuMathewu 11:28 simuzwa esithi, “Buyani kimi, lonke elikhatheleyo lelilobunzima, mina ngizaliphumuza.” Ngokunxusela abantu kuye, uJohn Wesley katsho ukuthi uyaxazulula inhlupho zabantu, kodwa utsho ukuthi angaba yindlela yomthetho abantu abangafunda ngayo. Kumbe njengaku Paul, lapho abantu abangalandela yena njengoba yena walandela uKristu (1 KwabaseKorinte 11:11).
Kulesi siqephu esisibalayo sitshengiswa ngesehlakalo esenzakala ngaphansi kwentaba ye Sinai lapho uMose wayeqanse phezu kwentaba esiya kwamukela imithetho eyayivela kuNkulunkulu. Ngemuva phose kwamalanga angamatshumi amane nxa uMose wayephezu kwentaba, inhlangano yako Isyraeli yaphelelwa yikubekezela bancenga uAaron ukuthi abenzele ithole elenziwe ngegolide (onkulunkulu) elalizabakhokhela besiyangena eCanaan (Exodus 32:1). Ngamafitshane, inhlanganiso yonke yaphatheka kulesi senzo sobudlova ngaphandle koyedwa (uMose) owaye phezu kwentaba.
Ebona lokhu okwakwenziwe ngabahlali base Israel ngobunengi babo, uMoses kazange acindezelwe ngumfutho wabantu. Wema ngalokhu ayekukholelwa. Kungenani, wayesazi ukuthi babekhona abanye ababengavumelani lombono wokuba lethole legolide kodwa mhlawumbe amazwi abo ayengazwakali ngokwakusenzakala. Elabantu abanye eceleni kwakhe, uhambo lokuya Elizweni Lesithembiso kwakumele luphutshe, kuyiwa phambili kokuphela, emuva yinkani! Kodwa-ke, singazake siqhubeke silabantu esingela qiniso labo kusiya ngokuthi bemi ngaphi, ngakhoke kuyadingeka ukuthi sikwazi. “Bonke abafuna abangabe Nkosi abeze kimi. Babe njengami. Ngiyisibonelo senu”. Kubo bonke abantu ama Levi yiwo wodwa agijimela ngemuva kuka Moses.
Okusemqoka lapha yikuthi umuntu owabiza abanye abantu ukuthi babelaye lapho endaweni eqondileyo wayengazange aphatheke kusenzo esibi eselizwe lonke. Wayengayisiyo ingxenye yomvukela. Wayemi eqinisweni njalo eyisibonelo esihle ngokumayelana ngokuba yisibonelo
sokuba kuluhlu luka Nkulunkulu. Ngokuzwisisa okufanayo, yilabo abangela sici kuphela abangenelisa ukuba yizibonelo zabakholwayo. Yibo kuphela abangasifundisa ngokubalandela njengoba labo belandela uKristu. Inkosi Yethu uJesu Kristu wake wathi, “Ngendlela efanayo, yenzani izibane zenu zikhanye phambi kwabanye, ukuze babone imisebenzi yenu elungileyo, badumise uYihlo osezulwini” (Mathewu 5:16). Ngamanye amazwi, zedlule insuku lapho ababesikhuthaza ukuthi sibalalele lokhu abakutshoyo singabilendaba ngalokhu abakwenzayo. Sifuna ukwamukela kokubili, isithunywa lenkulumo athunywe ngayo. Ngokunjalo-ke, banini yizibonelo kithi.
ILANGA LESIKHOMBISA
ISIHLOKO: Phana konke okwenelisayo
ISIFUNDO: Imisebenzi 10: 1-8
“Angesabi ukuthi abantu ababizwa ngokuthi ngamaWisili bazaswelakala kungaba se Europe kumbe eAmerica. Kodwa ngiyesaba, funa babekhona njenge qembu lokholo elifileyo, sebelokholo olungelamandla. Njalo lokhu kuzakuba yisimo ngokungathandabuzi, ngaphandle kokuthi babambelele kukho konke, imfundiso, umoya, njalo lemfundiso enhle okungathi ngayo baqale ukuphumela egcekeni” – John Wesley.
Umutsho ophezulu ungomunye wemitsho ejwayelekeliyo esuka ku John Wesley, kodwa ungasetshenziswa kuhle ngama Wisili alamuhla. Uhlezi ukuzwa kuphoselwa nje lapho abantu abayabe bebona angani kufanele kuMvuselelo lapho abayabe bezama ukuncenga abantu kumbe ibandla bebafundisa ngokukhula emoyeni. Lokhu akukho kubi, kodwa ayisikho lapho uJohn Wesley ayewusebenzisa khona lo umutsho. Eqinisweni, uJohn Wesley wayesebenzisa lo umutsho nxa wayefundisa “ngokupha”. Kuntshumayelo yakhe ethi ‘ukusetshenziswa kwemali’ akutshumayela ngo 1744, uJohn Wesley wafundisa ngemithetho emithathu. Wafundisa ngokuthi, zuza konke okwanelisayo, londoloza konke okwenelisayo njalo uphe konke okwenelisayo.
Kungenani-ke, eminyakeni emilutshwana engakafi ngoNcwabakazi mhlaka 4 ngo 1786, uJohn Wesley wacabangisisa ngokukhula kohambo lwe Wisili sekulenani lamalungu ayeseduze le 50 000 eEngland kuphela, njalo ukukhula okwakunanzeleleka lakwamanye amazwe. Emcabangweni wakhe wayekhathazekile ngendlela abantu abasebenothe ngayo lokukhula komnotho yohambo l Wisili kusiya ngababebamba ngayo ugatsha lwe Christian and Social Responsibility. U John Wesley wayengaxabani lodaba lokuphumelala, ayisikho lokhu.
Kungenani-ke, wayekhangela lokhu okwakusenzakala ngalesi sikhathi, okuphose kufane lalokhu okwenzakala lamuhla, okuyikuthi, imizamo yokukhulisa umnotho iyethusa kumaKristu. U John Wesley wananzelele indlela abantu ababebambe ngayo imithetho eyakuqala emibili, lo owokuzuza konke okwenelisayo lowokulondoloza konke okwenelisayo, bayekela ngabomu ukwenza owesithathu omayelana lokupha konke, njengokulungisela ubunzima. Ukukhathazeka kwakhe kwakungaseyikho kokukhula kwebandla njengoba ibandla laselikhulile njalo lilokhu liqhubeka likhula, kodwa wayesekhathazeka ngokwehluleka ukuhlela ukumisa kwamathuba ngabantu okuthiwa ngama Wisili. Yikho lapho akhuluma khona ukuthi wayesesaba ukuthi ibandla {movement} lalizaphila njengeqembu lokholo olufileyo. Iqembu elingayiso isibonelo sendalo kaNkulunkulu eyokupha (John 3:16). Ephendula kulesi sehlakalo esingenhle watshumayela intshumayelo elesihloko esithi, “Imbangela yokungahleli kuhle izinto kwamaKristu”. Kuntshumayelo le uJohn Wesley waqonqosela amaWisili ukuthi alandele umthetho wesithathu, okuyikuthi baphe konke abakwenelisayo esithi, “Nxa umuntu esiba ngumKristu ubangokhutheleyo, othembakeleyo njalo ophumelelayo. Khathesi ke, lomuntu nxa esezuza konke akwenelisayo alondoloze konke akwenelisayo, angabe esapha konke akwenelisayo, ngibalethemba elikhulu ngo Judas Iscariot ukwedlula lowo muntu”. Le yinkulumo elamandla.
Kusuka kulo umugca esibala ngawo, sitshengiswa ngesehlakalo esabakhona e Caesarea, indawo engaba phose ngamakhilomitha angu 104 kusiya eNyakatho Ntshonalanga kwe Jerusalema. ICaesarea yayilidolobha elikhuli lase Judea. ULuka usitshela kule incwadi ukuthi eCaesarea kwakuhlala umCenturian wase Roma uCornelias, onhliziyo yakhe yayisidiniwe ngenganekwana zamahedeni lenkolo eziyize, njalo zaseziguqukele kumaJuda bethemba ukuthi lokhu kwakuzaba lethela insindiso.
Sifuna ukukhangela kule indoda ngale indlela. Okwakuqala esikuqaphelayo yikuthi wayengum Roma. Lokhu kwakusitsho ukuthi wayelamathuba ayengeke atholwa ngamaJuda aphila esikhathini sakhe ngaphansi kombuso wama Roma. Okwesibili, wayengumphathi wamabutho (ekhokhela iqembu lamabutho alikhulu). Lokhu kutsho ukuthi wayephile impilo elesithunzi, ngokomkhonomi, njalo wayesenelisa ukuhola abuye alondoloze konke ayekwenelisa.
NjengomRoma (Gentile) wayengavunyelwa ukunikela umhlatshelo eTempelini lama Juda, ngokunjalo wayenikela kwabaswelayo. Wayelomusa kakhulu kwabaswelayo, ikakhulu abesiJuda ababengelawo amathuba omkhonomi ngokuncindezelwa ngumbuso owawukhona. Wayesipha ngokukhululeka kwabaswelayo. Kakwazanga ukuthi ilizwi lika Nkulunkulu laselikutshilo ukuthi, “lowo olomusa kulabo abampofu uyazibekela eNkosini, njalo uzambusisa ngalokhu akwenzileyo”. (Izaga 19:17). Eqinisweni wayengamzwanga uJesu Kristu esithi, “INkosi izaphendula, ‘Ngiyakutshela iqiniso, loba yini owayenzela oyedwa walaba abafowethu, ukwenzele mina” (Mathew 25:40). U Cornelious wabhadala ngokweqiniso. Ingelosi ye Nkosi yamtshela ukuthi imithandazo yakhe kuhlangana lezipho zakhe kwabampofu kwakufikile njenge sikhumbuzo somnikelo phambi kwe Nkosi. Singakhuluma ngo Cornelious njengomuntu owabamba yonke imithetho yomithathu, eyikuthi azuze konke, ulondoleze ubuye uphe konke okwenelisayo.
Ngengabantwana beNkosi silethamsanqa kundlela thize, siphiwa ingqobe yilizwi leNkosi ukuthi sihlole indlela esiphatha ngayo abasigombolozeleyo labangatholiyo. Sabelana njani esilakho labazali bethu asebekhulile, labanye abangaphandle emakhaya? Sibakhangela njani abanawethu abakhangelele kithi empilweni ukuthi sibancedise ukuhlanganisa izinto?
Siyenelisa yini ukuthi sabelane labo njengabantwana begazi linye?” Sibakhangela njani abanye bethu eNkonzweni esihlanganyela labo Nsonto zonke? Asidubeki ngokudinga ukuphakama ngokugxoba amakhanda abanye? Kuliqiniso nje ukuthi siphila ngomthandazo kodwa siyasilela ekupheni, ngakho-ke imithandazo yethu iyaqhula. Siyakhuthazwa lapha ukuthi sifunde kuCornelious silandele imithetho yomithathu efakwe phansi ngu John Wesley.
Methodist Church: Hillside Circuit 
You must be logged in to post a comment.